സണ്‍ടാന്‍ പ്രകൃതിദത്തമായി അകറ്റാം

നാരങ്ങാനീര്

നാരങ്ങാനീര്, പനിനീര്‍, കക്കിരി എന്നിവകൊണ്ടുരു പ്രയോഗം ഉണ്ട്. വെയിലേറ്റുണ്ടാകുന്ന കറുത്തപാടുകളെ അകറ്റാന്‍ നാരങ്ങാനീരിന് കഴിയുന്നതോടൊപ്പം ഇതിലെ കക്കിരി, പനിനീര്‍ എന്നിവയുടെ സാന്നിധ്യം ചര്‍മ്മത്തിന് കുളിര്‍മ്മ നല്‍കുകയും ചെയ്യുന്നു.

പാല്‍, മഞ്ഞള്‍

നാരങ്ങാനീരുള്‍പ്പെടുന്ന മറ്റൊരു മിശ്രിതം കൂടിയുണ്ട്. തിളപ്പിക്കാത്ത പാല്‍, മഞ്ഞള്‍ എന്നിവ പേസ്റ്റ് രൂപത്തിലാക്കി അതില്‍ അല്പം നാരങ്ങാനീര്‍ കൂടി ചേര്‍ത്ത് മുഖത്തും കരുവാളിപ്പുള്ള മറ്റ് ശരീരഭാഗങ്ങളിലും തേച്ച്പിടിപ്പിക്കുക. അല്പസമയത്തിന് ശേഷം നല്ല വെള്ളം ഉപയോഗിച്ച് കഴുകിക്കളയാം.

ഓട്‌സ്‌

ഓട്‌സിന്റെ പല ഉപയോഗങ്ങളും നമുക്കറിയാം. ഓട്‌സിനൊപ്പം മോരും ചേര്‍ത്ത് ചര്‍മ്മത്തില്‍ പുരട്ടുന്നത് സൂര്യനില്‍ നിന്ന് സംരക്ഷണം നല്‍കും.

തൈര്

ഓട്‌സ്‌പൊടി, തൈര്, നാരങ്ങയുടേയും തക്കാളിയുടേയും നീര് എന്നിവയെല്ലാം നന്നായി യോജിപ്പിച്ച് ചര്‍മ്മത്തില്‍ പുരട്ടാം. അരമണിക്കൂറിന് ശേഷം നല്ല തണുത്ത വെള്ളത്തില്‍ കഴുകിക്കളഞ്ഞാല്‍ ചര്‍മ്മത്തിന് തിളക്കം കൂടും.

കടലപ്പൊടി

കടലപ്പൊടി, നാരങ്ങാനീര് എന്നിവ തൈരുമായി ചേര്‍ത്ത് പാടുകളുള്ള ഭാഗത്ത് നിത്യവും തേയ്ക്കുക. തേച്ച് പിടിപ്പിച്ച് അല്പനേരം വെയ്ക്കണം. പിന്നീട് കഴുകിക്കളയാം.

തേങ്ങാവെള്ളം

തേങ്ങാവെള്ളം കൈകളിലും മുഖത്തുമെല്ലാം സ്ഥിരമായി ഉപയോഗിക്കുന്നത് വെയിലേറ്റുണ്ടാകുന്ന പാടുകള്‍ക്കെതിരെ ഫലപ്രദമാണ്. കൂടാതെ ഇതിന്റെ സ്ഥിരമായ ഉപയോഗം ചര്‍മ്മത്തെ മൃദുവുമാക്കുന്നു.

മഞ്ഞള്‍

മഞ്ഞള്‍പ്പൊടിയും നാരങ്ങാനീരും ചേര്‍ന്ന മിശ്രിതം ആഴ്ചയില്‍ മൂന്ന് തവണ ഉപയോഗിക്കുക. ചര്‍മ്മത്തിലധികം വന്ന കറുപ്പ് നിറം മാറ്റാനും വെയിലിനെ പ്രതിരോധിക്കാനും ഇതിന് കഴിയും.

ബദാം

ബദാം രാത്രിയില്‍ വെള്ളത്തില്‍ കുതിര്‍ത്തിട്ട് രാവിലെ നല്ലവണ്ണം അരച്ചെടുക്കുക. അതില്‍ തുല്യ അളവില്‍ പാല്‍പ്പാട ചേര്‍ത്ത് നല്ലവണ്ണം യോജിപ്പിച്ച് കുഴമ്പുരൂപത്തിലാക്കുക. ഇത് കരുവാളിപ്പുള്ള ഭാഗങ്ങളില്‍ തേയ്ക്കുന്നത് നല്ലതാണ്.

പപ്പായ

പപ്പായ കൊണ്ട് കരുവാളിപ്പുള്ള സ്ഥലങ്ങളില്‍ മസ്സാജ് ചെയ്യുന്നത് ഗുണകരമാണ്. ആന്റി ഏജിംഗ് ഘടകങ്ങളുള്ള പപ്പായ ചര്‍മ്മത്തിന് ഏറെ നല്ലതാണ്.

മുള്‍ട്ടാനി മിട്ടി

മുള്‍ട്ടാനി മിട്ടി എന്ന പ്രത്യേകതരം മണ്ണ് മുഖത്ത് പുരട്ടുന്നതും വെയിലേറ്റുള്ള കരുവാളിപ്പ് വലിയ തോതില്‍ കുറക്കാന്‍ സഹായിക്കും. ചര്‍മ്മത്തിലെ മൃതകോശങ്ങളെ നീക്കം ചെയ്യാന്‍ സഹായിക്കുന്നതിനാല്‍ ഫെയ്‌സ്പാക്കുകളിലെ പ്രധാന ഘടകമാണ് മുള്‍ട്ടാനി മിട്ടി.