നഖം കാക്കും ചെറുനാരങ്ങ!

നഖങ്ങള്‍ നോക്കിയാല്‍ ഒരാളുടെ വൃത്തിയും സൗന്ദര്യവും അറിയാമെന്നു പറയും. നഖങ്ങള്‍ വൃത്തിയായി സൂക്ഷിക്കുന്നത് അല്‍പം ബുദ്ധിമുട്ടു പിടിച്ച പണി തന്നെയാണ്. നഖങ്ങളില്‍ കറ പറ്റാനും നഖങ്ങള്‍ ഒടിയാനും എല്ലാം വളരെ എളുപ്പം. ഇതിനുള്ള മാര്‍ഗമാണ് മാനിക്യൂര്‍. ഇതിന് ബ്യൂട്ടിപാര്‍ലറില്‍ പോണമെന്നില്ല, ചെറുനാരങ്ങയുണ്ടെങ്കില്‍ വീട്ടില്‍ തന്നെ ചെയ്യാവുന്നതേയുള്ളൂ.

ചെറുചൂടുവെള്ളത്തില്‍ കൈ ഇറക്കി വച്ച് അല്‍പനേരം കഴിഞ്ഞു നഖത്തില്‍ ചെറുനാരങ്ങ മുറിച്ച് ഉരയ്ക്കുക. നഖം വൃത്തിയാക്കാനുള്ള ഏറ്റവും എളുപ്പമാര്‍ഗമാണിത്. പിന്നീട് ചൂടുവെള്ളം കൊണ്ട് കഴുകി ഏതെങ്കിലും മോയിസ്ചറൈസര്‍ പുരട്ടാം.

ചെറുനാരങ്ങ മുറിച്ച് അല്‍പം ഉപ്പിട്ട് നഖത്തില്‍ ഉരച്ചാലും നല്ല നിറം ലഭിക്കും. കറുത്ത പാടുകള്‍ പോവുകയും ചെയ്യും. പിന്നീട് ഒരു ബ്രഷില്‍ അല്‍പം സോപ്പോ ഷാംപൂവോ പുരട്ടി ഉരച്ചു കഴുകാം. കൈ തുടച്ച ശേഷം മോയിസ്ചറൈസര്‍ പുരട്ടുക.

നാരങ്ങാനീരും ഉപ്പും ചെറുചൂടുള്ള വെള്ളത്തിലിട്ട് കൈ ഇറക്കി വയ്ക്കുന്നത് മറ്റൊരു മാനിക്യൂര്‍ രീതി തന്നെയാണ്.

വരണ്ട ചര്‍മമുള്ളവര്‍ ചെറുനാരങ്ങ ഉപയോഗിച്ചാല്‍ നഖങ്ങള്‍ക്ക് ചുറ്റുമുള്ള തൊലി കൂടുതല്‍ വരണ്ടതാകും. ഇത് ഒഴിവാക്കാന്‍ നാരങ്ങാനീരും ഗ്ലിസറിനും കൂട്ടിച്ചേര്‍ത്ത് നഖം വൃത്തിയാക്കാം.

ചെറുചൂടുള്ള വെള്ളത്തില്‍ നാരങ്ങാനീരും അല്‍പം പഞ്ചസാരയും ചേര്‍ത്ത് കൈകള്‍ ഇറക്കി വയ്ക്കാം. അഞ്ചു മിനിറ്റ് കഴിഞ്ഞ് കൈ കഴുകിയ ശേഷം മോയിസ്ചറൈസര്‍ പുരട്ടാം.