മഞ്ഞുകാലത്ത് മുഖക്കുരു കൂടുമോ

മുഖക്കുരുവിന് ചൂടുകാലം, തണുപ്പുകാലം എന്നിങ്ങനെയുള്ള വ്യത്യാസമൊന്നും ഇല്ലെന്നു തന്നെ പറയാം. എന്നാല്‍ മഞ്ഞുകാലത്ത് ചിലരുടെ മുഖത്തെങ്കിലും മുഖക്കുരു വരുന്നതായി കാണാറുണ്ട്. ഇതിന് പല കാരണങ്ങളുമുണ്ട്.

മഞ്ഞുകാലത്ത് ചര്‍മം വരളാന്‍ സാധ്യത കൂടുതലാണ്. ഇതുകൊണ്ടു തന്നെ കോള്‍ഡ് ക്രീമീന്റെ ഉപയോഗവും കൂടും. ശ്രദ്ധിച്ചിട്ടുണ്ടോ, കോള്‍ഡ് ക്രീമിന് കട്ടി വളരെ കൂടുതലാണ്. ഇത് മുഖത്തു പുരട്ടുന്നത് മുഖത്തെ സുഷിരങ്ങള്‍ അടയാന്‍ കാരണമാകും. മുഖത്ത് അഴുക്കും കൂടും. ഇത് മുഖക്കുരുവിനുള്ള സാധ്യത വര്‍ദ്ധിപ്പിക്കും.

ചൂടുകാലത്ത് വിയര്‍ക്കുമെങ്കിലും ഇത് ഒരുവിധത്തില്‍ ചര്‍മത്തിന് നല്ലതാണ്. വിയര്‍പ്പിലൂടെ ചര്‍മത്തിനടിയിലെ അഴുക്ക് പുറക്കേയ്ക്കു പോരും. ചര്‍മം വൃത്തിയായിരിക്കാന്‍ ഇത് കാരണവുമാകും. എന്നാല്‍ തണുപ്പു കാലത്ത് ഈ പ്രക്രിയകള്‍ നടക്കുന്നില്ല. ഇതു കൊണ്ട് ചൂടില്ലെങ്കിലും ചര്‍മത്തില്‍ അഴുക്കടിഞ്ഞു കൂടാന്‍ സാധ്യതയേറുകയും ചെയ്യും.

ചൂടുകാലത്ത് മുഖം വിയര്‍ക്കുമ്പോള്‍ നാം എപ്പോഴും കഴുകും. എന്നാല്‍ മഞ്ഞുകാലത്ത് ഇത് പൊതുവെ ആരും ചെയ്യാറില്ല. ഇതും മുഖം വൃത്തികേടാകാനുള്ള ഒരു കാരണം തന്നെയാണ്. ഇതുവഴി അഴുക്ക് മുഖത്തുണ്ടാകും. മുഖക്കുരുവിന് കാരണമാകുകയും ചെയ്യും.

നല്ല വെയിലുളള സമയത്ത് പുറത്തിറങ്ങുമ്പോള്‍ സണ്‍സ്‌ക്രീന്‍ പുരട്ടാന്‍ ആരും മറക്കാറില്ല. എന്നാല്‍ മഞ്ഞുകാലത്ത് ഈ ശ്രദ്ധ വയ്ക്കില്ല. സൂര്യപ്രകാശം കഠിനമാകുന്നതും മുഖത്ത് കുരുക്കളും പാടുകളും ഉണ്ടാകാന്‍ സാധ്യതയുണ്ടാക്കും.

ഇതിന് പരിഹാരമാര്‍ഗങ്ങളുമുണ്ട്. തണുപ്പു കാലത്ത് കോള്‍ഡ് ക്രീം അധികം കട്ടിയില്ലാത്തത് ഉപയോഗിക്കുക. അല്ലെങ്കില്‍ അല്‍പം മാത്രം പുരട്ടുക.

മുഖം കഴുകാന്‍ മറക്കരുത്. പുറത്തു പോയി വരുമ്പോള്‍ ഇക്കാര്യം യാതൊരു കാരണവശാലും മറക്കുകയുമരുത്. മുഖം കഴുകുമ്പോള്‍ വരണ്ടു പോകുകയാണെങ്കില്‍ കഴുകിക്കഴിഞ്ഞ് മോയിസ്ചറൈസര്‍ പുരട്ടാം.

മഞ്ഞുകാലത്ത് ദാഹം കുറവാണെങ്കിലും നല്ലപോലെ വെള്ളം കുടിയ്ക്കുക ഇത് ഒരു പരിധി വരെ ചര്‍മത്തിനുണ്ടാകുന്ന ആരോഗ്യപ്രശ്‌നങ്ങള്‍ ഒഴിവാക്കും.

ഏതു കാലമാണെങ്കിലും സണ്‍സ്‌ക്രീന്‍ ഉപയോഗം നിര്‍ത്തരുത്. ഇത് വെയില്‍ കൊണ്് ചര്‍മത്തിനുണ്ടാകുന്ന പ്രശ്‌നങ്ങള്‍ അകറ്റും.