മഞ്ഞുകാലത്തിന് ഫ്രൂട്ട് സ്‌ക്രബുകള്‍

മിക്കവാറും പഴവര്‍ഗങ്ങളില്‍ ചെറിയ തോതില്‍ ആസിഡുകള്‍ അടങ്ങിയിട്ടുണ്ട്. ഇവ മുഖം വൃത്തിയാക്കുകയും ബാക്ടീരിയകളെ കൊല്ലുകയും ചെയ്യും. പ്രകൃതിദത്ത മാര്‍ഗമായതു കൊണ്ട് ഇത് ചര്‍മത്തിന് ദോഷം വരുത്തുകയുമില്ല.

കിവി ഫ്രൂട്ട് കറ്റാര്‍ വാഴയുമായി ചേര്‍ത്ത് മുഖത്തു മസാജ് ചെയ്യാം. ഇതില്‍ അല്‍പം പഞ്ചസാര ചേര്‍ത്താല്‍ ബോഡി സ്‌ക്രബറായി ഉപയോഗിക്കാം. കിവി ഫ്രൂട്ടിന്റെ പള്‍പ്പും കുരുവും സ്‌ക്രബര്‍ മിശ്രിതമുണ്ടാക്കാന്‍ ഉപയോഗിക്കാം.

കസ്റ്റാര്‍ഡ് ആപ്പിള്‍ ഉടച്ച് അതില്‍ തൈരോ പാല്‍പ്പാടയോ ചേര്‍ത്താല്‍ നല്ലൊരു സ്‌ക്രബറായി. ഇത് അഴുക്കു നീക്കുക മാത്രമല്ലാ, ബ്ലാക് ഹെഡ്‌സ് അകറ്റുകയും ചെയ്യും.

ചിക്കുവെന്ന പേരില്‍ അറിയപ്പെടുന്ന സപ്പോട്ട കൊണ്ടും സ്‌ക്രബറുണ്ടാക്കാം. ചിക്കു ഉടച്ച് അതില്‍ തേന്‍ ചേര്‍ത്താല്‍ മതി. വരണ്ട ചര്‍മമുള്ളവരാണെങ്കില്‍ ഇതില്‍ നെയ്യു ചേര്‍ക്കാം. ഇത് മുഖത്തു പുരട്ടി മസാജ് ചെയ്ത് തണുത്ത വെള്ളത്തില്‍ കഴുകിക്കളയാം.

ആപ്പിളിന്റെ തൊലി നീക്കി ഉടച്ച് ഇതില്‍ ചെറുനാരങ്ങാനീര്, പാല്‍പ്പൊടി എന്നിവ ചേര്‍ത്ത് മുഖത്തു പുരട്ടാം. ഇത് ചര്‍മത്തിന് നിറം വയ്ക്കുന്നതിനും ചര്‍മം ബ്ലീച്ച് ചെയ്യുന്നതിനും സഹായിക്കുന്നു. ഏതു തരം ചര്‍മത്തിനും ചേരുന്ന ഒരു സ്‌ക്രബറാണിത്.

മുഖത്തെ മോയിസ്ചറൈസര്‍ നിലനിര്‍ത്തുന്നതിനുള്ള ഒരു പ്രധാന മാര്‍ഗമാണ് മസ്‌ക് മെലന്‍ കൊണ്ടുണ്ടാക്കുന്ന സ്‌ക്രബ്. ഇതില്‍ മുള്‍ത്താണി മിട്ടി, ഫുള്ളേഴ്‌സ് എര്‍ത്ത് എന്നിവ ചേര്‍ത്ത് മുഖത്തിടാം. ചര്‍മത്തിന്റെ ചുളിവ് മാറ്റുവാനുള്ള നല്ലൊന്നാന്തരം സ്‌ക്രബറാണിത്.