നിറം നല്‍കും ചില 'വീട്ടു' കാര്യങ്ങള്‍

Published: Wednesday, January 11, 2012, 17:04 [IST]

ഇരുണ്ടുപോയ ചര്‍മം നോക്കി നെടുവീര്‍പ്പിടുന്നവരുണ്ട്. ബ്യൂട്ടി പാര്‍ലറുകള്‍ തോറും കയറിയിറങ്ങി നടക്കുന്നവരുമുണ്ട്. ആദ്യം മനസിലാക്കേണ്ടത് ചര്‍മത്തിന്റെ നിറം പോകാനുള്ള കാരണമാണ്. ചിലരില്‍ വെയില്‍ അമിതമായി ഏല്‍ക്കുന്നതും പിഗ്മെന്റേഷനും ചര്‍മത്തിനുണ്ടാകുന്ന അലര്‍ജിയും ഇരുണ്ട നിറത്തിന് കാരണമാകാറുണ്ട്. ചിലരുടെ ചര്‍മത്തിന്റെ സ്വാഭാവിക നിറം തന്നെ ഇരുണ്ടതായിരിക്കും.

ചര്‍മത്തിന് നിറം നല്‍കാനുള്ള ചില വഴികളുണ്ട്. വീട്ടില്‍ തന്നെ ചെയ്യാവുന്ന ഇത്തരം മാര്‍ഗങ്ങളെക്കുറിച്ചറിയൂ.

പാല്‍പ്പൊടി, തേന്‍, നാരങ്ങാനീര്, ബദാം ഓയില്‍ എന്നിവ ചേര്‍ത്ത് മുഖത്തു തേയ്ക്കുന്നത് ചര്‍മത്തിന് നിറം നല്‍കും. ദിവസവും ഇത് അടുപ്പിച്ചു ചെയ്താല്‍ കുറച്ചാഴ്ചകള്‍ക്കുള്ളില്‍ തന്നെ ഫലം കാണും. ചര്‍മത്തിന് നിറത്തോടൊപ്പം തിളക്കം നല്‍കാനും ഇൗ മിശ്രിതം സഹായിക്കും.

ഓറഞ്ച് തൊലി ഉണക്കിപ്പൊടിച്ച് തൈരില്‍ ചേര്‍ത്തു പുരട്ടുന്നത് ചര്‍മത്തിന് നിറം നല്‍കും. ഇത് മുഖത്തു പുരട്ടി പതിനഞ്ചു മിനിറ്റ് കഴിഞ്ഞ് കഴുകിക്കളയാം. ഉടനെ ചൂടോ വെയിലോ കൊള്ളാതിരിക്കാനും ശ്രദ്ധിക്കണം.

നിറം വര്‍ദ്ധിക്കാനുള്ള ഏറ്റവും ലളിതമായ മാര്‍ഗമാണ് മുഖത്ത് പാല്‍ പുരട്ടുന്നത്. ഇത് നല്ലൊരു ക്ലെന്‍സര്‍ മാത്രമല്ലാ, വരണ്ട ചര്‍മത്തിനുള്ള പരിഹാരം കൂടിയാണ്.

ഇത്തരം മാര്‍ഗങ്ങള്‍ കുറച്ചു ദിവസം അടുപ്പിച്ചു ചെയ്താല്‍ തന്നെ കാര്യമായ വ്യത്യാസമുണ്ടാകും.