ബ്ലാക് ഹെഡ്‌സിന് പരിഹാരവുമുണ്ട്

ബ്ലാക് ഹെഡ്‌സ് പലര്‍ക്കുമുള്ള സൗന്ദര്യപ്രശ്‌നമാണ്. ചെറിയ കറുത്ത കുത്തുകള്‍ മുഖത്തുണ്ടാകുന്നതാണ് ബ്ലാക് ഹെഡ്‌സ്. ആദ്യം നിറം കുറഞ്ഞു വരുന്ന ഇത്തരം കുത്തുകള്‍ പിന്നീട് വ്യക്തമായ കറുത്ത നിറത്തില്‍ പ്രത്യക്ഷപ്പെട്ട് മുഖത്തിന് അഭംഗിയുണ്ടാക്കുന്നു. ഇത്തരം ബ്ലാക്‌ഹെഡ്‌സുകള്‍ വെയിലേറ്റാല്‍ കൂടുതല്‍ വ്യക്തതയോടെ തെളിഞ്ഞു വരും.

ബ്ലാക് ഹെഡ്‌സ് അകറ്റാന്‍ ലേസര്‍ ട്രീറ്റുമെന്റ്, പീലിംഗ്, ഓയിന്റ്‌മെന്റുകള്‍ തുടങ്ങി നിരവധി മാര്‍ഗങ്ങളുണ്ട്. എന്നാല്‍ ഇവ ചെയ്യാന്‍ ബുദ്ധിമുട്ടുള്ളവര്‍ക്ക് വീട്ടില്‍ തന്നെ പരീക്ഷിക്കാവുന്ന പല മാര്‍ഗങ്ങളുമുണ്ട്.

മുട്ട വെള്ള ബ്ലാക് ഹെഡ്‌സ് നീക്കാന്‍ പറ്റിയ നല്ലൊരു മാര്‍ഗമാണ്. മുട്ട വെള്ള എടുത്ത് നല്ലപോലെ ഉടയ്ക്കുക. ഇത് മുഖത്തു പുരട്ടുക. ഒരു ടിഷ്യൂ പേപ്പര്‍ എടുത്ത് കണ്ണുകളുടെ സ്ഥാനത്തും വായ, മൂക്ക് എന്നിവിടങ്ങളിലും ദ്വാരമിടുക. ഈ ടിഷ്യൂ പേപ്പര്‍ മുഖത്തിട്ടിരിക്കുന്ന മുട്ടപായ്ക്കിന്റെ മുകളിലായി പതിയ്ക്കുക. ഇതിനു മുകളില്‍ വീണ്ടും മുട്ട വെള്ള പുരട്ടുക. ഉണങ്ങിക്കഴിയുമ്പോള്‍ ടിഷ്യൂ പേപ്പര്‍ മുകളിലേക്ക് ഉയര്‍ത്തി അടര്‍ത്തി മാറ്റണം. ബ്ലാക് ഹെഡ്‌സ് നീക്കം ചെയ്യാനുള്ള നല്ലൊരു വഴിയാണിത്. ബ്ലാക് ഹെഡ്‌സ് മാത്രമല്ല, മുഖത്തെ പാടുകളും വടുക്കളും അകറ്റാനും ഈ മുട്ട ഫേസ്പായ്ക്ക് സഹായിക്കും.

മുഖത്ത് ആവി പിടിയ്ക്കുന്നതും ചൂടുള്ള വെള്ളത്തില്‍ തുണി മുക്കിപ്പിഴിഞ്ഞ് മുഖത്ത് ബ്ലാക് ഹെഡ്‌സുള്ള ഭാഗത്ത് പിടിയ്ക്കുന്നതും നല്ലതു തന്നെയാണ്. ബ്യൂട്ടി പാര്‍ലറുകളില്‍ ഉപയോഗിക്കുന്ന എക്‌സ്ട്രാക്ടര്‍ ടൂള്‍ ഉപയോഗിച്ച് ബ്ലാക് ഹെഡ്‌സിനെ പുറത്തേക്കു അമര്‍ത്തി കളയുകയുമാകാം. എന്നാല്‍ മുഖത്ത് പാടുകള്‍ വീഴാതെ ശ്രദ്ധിക്കണം.

ടൂത്ത് പേസ്റ്റു കൊണ്ടും ബ്ലാക് ഹെഡ്‌സിന് പരിഹാരം കാണം. ഒരു ടൂത്ത് ബ്രഷില്‍ അല്‍പം പേസ്റ്റെടുത്ത് ബ്ലാക് ഹെഡ്‌സുള്ള ഭാഗത്ത് പതുക്കെ ബ്രഷ് ചെയ്യുക. അധികം അമര്‍ത്താതെ അല്‍പനേരം ഇത് അടുപ്പിച്ചു ചെയ്യണം. ഇങ്ങനെ ചെയ്യുന്നത് ബ്ലാക് ഹെഡ്‌സ് അകലാന്‍ സഹായിക്കും. ചൂടുവെള്ളത്തിലിട്ട് സ്റ്റെറിലൈസ് ചെയ്ത ടൂത്ത് ബ്രഷ് വേണം ഇതിനായി ഉപയോഗിക്കാന്‍. അല്ലെങ്കില്‍ അണുബാധ വരാന്‍ സാധ്യത കൂടുതലാണ്.

ചെറുനാരങ്ങാനീര്, ബദാം ഓയില്‍, ഗ്ലിസറിന്‍ എന്നിവ തുല്യഅളവിലെടുത്ത് മുഖത്തു പുരട്ടുന്നതും ബ്ലാക് ഹെഡ്‌സ് അകലാന്‍ നല്ലതാണ്. ഇത് മുഖത്തെ മറ്റു പാടുകളുടെ നിറം കുറയ്ക്കാനും സഹായിക്കും.