വീട്ടിലുണ്ടാക്കാം ബ്ലീച്ച്‌

Skin Care

oi-Saritha PV

By Veena

Updated: Thursday, July 19, 2018, 11:45 [IST]

കാശും കൊടുത്ത് കെമിക്കലുകള്‍ അടങ്ങിയ ബ്ലീച്ച് വാങ്ങി മുഖം വെളുപ്പിക്കേണ്ട. വെളുക്കാന്‍ തേച്ചത് പാണ്ടാകുമോ എന്ന ഭയവും വേണ്ട.സമയവും അല്‍പം അധ്വാനവുമുണ്ടെങ്കില്‍ വീട്ടിലിരുന്നു തന്നെ ബ്ലീച്ച് ചെയ്യാം, അതും സ്വാഭാവിക രീതിയില്‍. ഇതിനായി ബ്ലീച്ചിങ്ങ് മിശ്രിതങ്ങള്‍ നമുക്കു തന്നെ ഉണ്ടാക്കാം.

തരിവലുപ്പമുള്ള പഞ്ചസാരയും ഒലീവെണ്ണയും കൂട്ടിച്ചേര്‍ത്ത് മുഖം സ്‌ക്രബ്ബ് ചെയ്യാം. മുഖത്തെ മൃതകോശങ്ങള്‍ അകറ്റുവാനും നിറം വര്‍ദ്ധിക്കാനുമുളള നല്ലൊരു മാര്‍ഗമാണിത്.

നാരങ്ങയും പാല്‍പ്പാടയും നല്ലൊരു ബ്ലീച്ചാണ്. നാരങ്ങാ ഇനത്തില്‍ പെട്ട എല്ലാ തരം പഴവര്‍ഗങ്ങളും ബ്ലീച്ച് ഉണ്ടാക്കാന്‍ നല്ലതാണ്. ഓറഞ്ചിന്റെ തൊലി ഒരു ദീവസം വെയിലത്ത് വച്ച് ഉണക്കുക. ഇത് മിക്‌സിയില്‍ അടിച്ച് അതിന്റെ കൂടെ പാല്‍പ്പാടയും ചേര്‍ത്ത് ഉപയോഗിക്കാം. 10 മിനിറ്റിന് ശേഷം കഴുകിക്കളയാം.

നാരങ്ങ, ചെറുവെള്ളരി, കടലമാവ് എന്നിവ ചേര്‍ത്തും ബ്ലീച്ച് ഉണ്ടാക്കാം. ചെറുവെള്ളരി മിക്‌സിയില്‍ അടിച്ച് അതിലേക്ക് നാരങ്ങാനീരും അല്‍പം കടലമാവും ചേര്‍ത്ത് ബ്ലീച്ചായി ഉപയോഗിക്കാം.

അസിഡിക് ഗുണമുള്ളതു കൊണ്ട് തക്കാളി കൊണ്ട് ബ്ലീച്ച് ചെയ്താല്‍ ഗുണവും ഉടനടി ലഭിക്കും. തക്കാളി മിക്‌സിയിലടിച്ച് അല്‍പം നാരങ്ങാനീരും ചേര്‍ത്ത് മുഖത്തു പുരട്ടുക. അല്‍പസമയം കഴിഞ്ഞ് കഴുകിക്കളയാം.

മഞ്ഞള്‍പ്പൊടിയും നാരങ്ങാനീരും ചേര്‍ത്താന്‍ നല്ല ബ്ലീച്ചായി. എന്നാല്‍ ശുദ്ധമായ മഞ്ഞള്‍പ്പൊടിയാണ് ഉപയോഗിക്കേണ്ടത്. പാചകത്തിന് വാങ്ങുന്ന മഞ്ഞള്‍പ്പൊടിയില്‍ മറ്റു മിശ്രിതങ്ങളുള്ളതു കൊണ്ട് മുഖത്ത് അലര്‍ജിയുണ്ടാകാം. മഞ്ഞള്‍ വാങ്ങി പൊടിക്കുന്നതാണ് നല്ല മാര്‍ഗം.

വൈറ്റ് വിനാഗിരി മുഖത്തെ പാടുകള്‍ മാറാനും നിറം വര്‍ദ്ധിക്കുവാനും നല്ലതാണ്. ഇത് പഞ്ഞിയില്‍ മുക്കി മുഖത്ത് പുരട്ടാം.

ഇത്തരം ബ്ലീച്ചുകള്‍ അലര്‍ജിയോ മറ്റ് അസ്വസ്ഥതകളോ ഉണ്ടാക്കില്ലെന്നതു തന്നെയാണ് പ്രധാന ഗുണം.