സൗന്ദര്യം, പുരുഷന്‍ അവഗണിക്കുന്നവ

ഉറങ്ങുമ്പോള്‍ വശം തിരിഞ്ഞുറങ്ങുന്നവരുണ്ട്. ഇത് സ്ത്രീയായാലും പുരുഷനായാലും മുഖചര്‍മത്തിന് ദോഷം വരുത്തുന്ന ഒന്നാണ്. തലയിണയില്‍ തടഞ്ഞ് മുഖത്തിന്റെ ഈ ഭാഗത്ത് കൂടുതല്‍ ആയാസമുണ്ടാകാന്‍ സാധ്യതയുണ്ട്. ഇത് ചര്‍മം ചുളിയുന്നതിന് കാരണമാകുന്നു.

സ്ത്രീകളെ അപേക്ഷിച്ച് പുകവലി ശീലം കൂടുതല്‍ പുരുഷനാണ് ഉള്ളത്. പുകവലി ആരോഗ്യത്തിനു മാത്രമല്ല, ചര്‍മത്തിനും നല്ലതല്ല. ചര്‍മത്തില്‍ ചുളിവുകള്‍ വീഴാന്‍ ഇടയാക്കുന്ന ഒരു ശീലമാണിത്. ശരീരത്തിലെ രക്തപ്രവാഹത്തെ കുറയ്ക്കുന്നതു വഴിയും പുകവലി ചര്‍മത്തിന് ദോഷം ചെയ്യുന്നു.

മൊബൈല്‍ ഫോണ്‍ സ്ത്രീപുരുഷ ഭേദമില്ലാതെ ഉപയോഗിക്കുന്ന കാലഘട്ടമാണിത്. ചര്‍മത്തില്‍ അണുബാധ പോലുള്ള പ്രശ്‌നങ്ങളുണ്ടാകാന്‍ ഇത് വഴി വയ്ക്കുന്നു.

മുടിസംരക്ഷണത്തില്‍ അധികം ശ്രദ്ധിക്കാത്ത പുരുഷന്മാരുണ്ട്. താരന്‍ പോലുള്ള പ്രശ്‌നങ്ങളുണ്ടാകാനും മുടി കൊഴിയാനും ഇത് ഇട വരുത്തുന്നു. താരന്‍ അധികമായാല്‍ മുഖചര്‍മത്തെയും പുരികത്തേയും വരെ ഇത് ബാധിക്കും.

മിക്കവാറും സ്ത്രീകള്‍ പുറത്തു പോകുമ്പോള്‍ സണ്‍സ്‌ക്രീന്‍ കൂടുതല്‍ ഉപയോഗിക്കുന്നവരാണ്. എന്നാല്‍ പുരുഷന്മാരാകട്ടെ, ഇക്കാര്യത്തില്‍ വലിയ ശ്രദ്ധ കൊടുക്കാറുമില്ല. എന്നാല്‍ ഇത് ചര്‍മത്തിനു ദോഷം ചെയ്യും. അള്‍ട്രാവയലറ്റ് രശ്മികള്‍ ചര്‍മത്തില്‍ കരുവാളിപ്പും ക്യാന്‍സര്‍ പോലുള്ള രോഗങ്ങളും വരുത്തും.

സ്ത്രീകള്‍ കടലമാവും ചെറുപയര്‍ പൊടിയുമെല്ലാം ചര്‍മസംരക്ഷണത്തിന് ഉപയോഗിക്കുമ്പോള്‍ ഇവ വിട്ട് സോപ്പ് കൂടുതല്‍ ഉപയോഗിക്കുന്ന ശീലമാണ് പുരുഷന്മാര്‍ക്കുള്ളത്. ചര്‍മത്തിലെ ഈര്‍പ്പം മുഴുവന്‍ വലിച്ചെടുത്ത് ചര്‍മം വരണ്ടതാക്കാന്‍ ഇട വരുത്തുന്ന ഒരു ശീലമാണിത്.