മഞ്ഞുകാലത്തും ചര്‍മത്തിന് നിറം കൂട്ടാം

ക്രീമുകളുപയോഗിച്ച് ചര്‍മം മസാജ് ചെയ്യുന്നതിന് പകരം കുളിക്കുന്നതിന് അരമണിക്കൂര്‍ മുന്‍പ് എണ്ണ തേച്ചു മസാജ് ചെയ്യുക. ഇതിന് ഒലീവ് ഓയിലോ കടുകെണ്ണയോ ഉപയോഗിക്കാം. ചര്‍മം വരളുന്നതിന് ഇവ രണ്ടും നല്ല പരിഹാരങ്ങളാണ്. കഴുകിക്കളയാമെന്നുള്ളതു കൊണ്ട് ഈര്‍പ്പം നിലനിര്‍ത്തിക്കൊണ്ടു തന്നെ എണ്ണമയം നീക്കാമെന്ന ഗുണവും ഇവയ്ക്കുണ്ട്.

വിന്റര്‍ ചര്‍മസംരക്ഷണത്തിന് ക്രീമുകളേക്കാള്‍ നല്ലത് ലോഷനുകളാണ്. ഇത് ശരീരത്തിലേക്ക് പെട്ടെന്നു തന്നെ ആഗിരണം ചെയ്യപ്പെടും. മാത്രമല്ലാ, ക്രീമുകള്‍ക്ക് കട്ടി കൂടുതലായതു കൊണ്ട് ചര്‍മസുഷിരത്തിലേക്കുള്ള ഓക്‌സജന്‍ പ്രവാഹത്തെ അത് തടസപ്പെടുത്തും. എന്നാല്‍ ലോഷനാകട്ടെ ഇത്തരം പ്രശ്‌നം ഉണ്ടാക്കുന്നില്ല.

പാല്‍പ്പാട ഉപയോഗിച്ച് വീട്ടിലുണ്ടാക്കുന്ന ഫേസ് മാസ്‌കുകള്‍ വളരെ പ്രയോജനം ചെയ്യും. പാല്‍പ്പാട, തേന്‍, ചെറുനാരങ്ങാനീര് എന്നിവ ചേര്‍ത്താല്‍ നല്ല ഫേസ് മാസ്‌കായി. ചര്‍മത്തിന് നിറം നല്‍കുന്നതിന് മാത്രമല്ലാ, ഈര്‍പ്പം നിലനിര്‍ത്തുന്നതിനും ഇവ സഹായിക്കുന്നു.

മഞ്ഞുകാലത്ത് രാത്രി കിടക്കുമ്പോഴും ലോഷനുകളും ക്രീമുകളും പുരട്ടുന്നത് നല്ലതാണ്. രാത്രി കട്ടി കൂടിയ ക്രീമുകള്‍ ഉപയോഗിക്കാം. പകലുപയോഗിക്കുന്ന ക്രീം രാത്രിയും രാത്രി ഉപയോഗിക്കുന്ന ക്രീം പകലും ഉപയോഗിച്ചാല്‍ പ്രയോജനം കിട്ടിയെന്നു വരില്ല.

തണുപ്പില്‍ നല്ല ചൂടുവെള്ളത്തില്‍ കുളിക്കുന്നത് സുഖമാണെങ്കിലും ഇത് ചര്‍മത്തിലെ ഈര്‍പ്പം നഷ്ടപ്പെടുത്തുകയാണ് ചെയ്യുന്നത്. ഇളം ചൂടുവെള്ളം കുളിക്കാനുപയോഗിക്കാം.

മഞ്ഞുകാലത്ത് ഒരു തവണ മാത്രം ലോഷനോ ക്രീമോ ഉപയോഗിച്ചതു കൊണ്ട് ഗുണമുണ്ടായെന്നു വരില്ല. പ്രത്യേകിച്ചും യാത്ര ചെയ്യേണ്ടി വരികയാണെങ്കില്‍. ചര്‍മം വരളുന്നതിനനുസരിച്ച് ലോഷന്‍ പുരട്ടണം. ഇത് എപ്പോഴും കയ്യില്‍ കരുതുന്നത് നല്ലതായിരിക്കും.