ചര്‍മസംരക്ഷണത്തിന് നാളികേരം

സൗന്ദര്യത്തില്‍ നാളികേരത്തിന് ചെയ്യാന്‍ കഴിയുന്ന കാര്യങ്ങള്‍ ധാരാളമുണ്ട്. വെളിച്ചെണ്ണയായാലും നാളികേരപ്പാലായാലും വെള്ളമായാലും ഇതിന്റെ ഗുണങ്ങള്‍ നീണ്ടു പോകുന്നു. ഇതെക്കുറിച്ച് വിശദമായി അറിയേണ്ടേ.

നാളികേരം കൊണ്ട് നല്ലൊന്നാന്തരം സ്‌ക്രബര്‍ ഉണ്ടാക്കാം. നാളികേരപ്പാലോ എണ്ണയോ അല്‍പം ബേക്കിംഗ് സോഡയുടമായി ചേര്‍ത്താല്‍ നല്ലൊന്നാന്തരം സ്‌ക്രബറായി. ഇത് മുഖത്തുരസി അല്‍പസമയം കഴിഞ്ഞ് ചൂടുവെള്ളം കൊണ്ട് കഴുകിക്കളയാം.

ചെറുപയര്‍ പൊടിയില്‍ നാളികേരവെള്ളം ചേര്‍ത്തും ഫേസ് സ്‌ക്രബറാക്കാം. ഇത് മുഖത്ത് ഒന്നു രണ്ടു മിനിറ്റ് ഉരച്ച ശേഷം കഴികിക്കളയാം.

നാളികേരവെള്ളം നല്ലൊരു മോയിസ്ചറൈസറായും ഉപയോഗിക്കാം. നാളികേരവെള്ളം രാത്രി കിടക്കാന്‍ പോകുന്നതിന് മുന്‍പ് കൈകാലുകളില്‍ പുരട്ടി കിടക്കുന്നത് നല്ലതാണ്. വരണ്ട ചര്‍മത്തിന് ഇത് പ്രത്യേകിച്ച് ഗുണം ചെയ്യും.

നാളികേരപ്പാലും നല്ലൊരു മോയിസ്ചറൈസറാണ്. ഇതിന് പുറമെ ചൂടുകുരു പോലുള്ള പ്രശ്‌നങ്ങള്‍ക്ക് ഇത് ഗുണം ചെയ്യും. ചര്‍മത്തിന് മാര്‍ദവവും തിളക്കവും വര്‍ദ്ധിക്കുകയും ചെയ്യും. നാളികേരപ്പാലില്‍ ചെറുനാരങ്ങാനീര് ചേര്‍ത്തും പുരട്ടാം.

നാളികേരവെള്ളം മുഖത്തു പുരട്ടുന്നത് മുഖക്കുരു മാറാനുള്ള നല്ലൊരു വഴിയാണ്.

വെളിച്ചെണ്ണയും നല്ല മോയിസ്ചറൈസറായി ഉപയോഗിക്കാം. കുളി കഴിഞ്ഞ് അല്‍പം വെളിച്ചെണ്ണ പുരട്ടുന്നത് ചര്‍മം ഈര്‍പ്പമുള്ളതാകാന്‍ നല്ലതാണ്.