മുഖം കഴുകുമ്പോള്‍ ശ്രദ്ധിക്കൂ

മുഖം കഴുകുമ്പോള്‍ എന്താണ് ഇത്ര പറയാനുള്ളതെന്നാകും. എന്നാല്‍ സൗന്ദര്യത്തില്‍ ശ്രദ്ധിക്കുന്നവരാണെങ്കില്‍ മുഖം കഴുകുമ്പോഴും ചില കാര്യങ്ങള്‍ ശ്രദ്ധിക്കുക തന്നെ വേണം.

മുഖം കഴുകാന്‍ ഏറ്റവും നല്ലത് ചെറുചൂടുള്ള വെള്ളമാണ്. ഇത് ചര്‍മസുഷിരങ്ങള്‍ തുറക്കാന്‍ സഹായിക്കും. മുഖം പെട്ടെന്ന് വൃത്തിയാവുകയും ചെയ്യും.

മുഖത്ത് സോപ്പ് ഉപയോഗിക്കാതിരിക്കുകയാണ് നല്ലത്. പകരം ഫേസ് വാഷ് ഉപയോഗിക്കാം. ആല്‍ക്കലൈന്‍ ബേസുള്ള ഫേസ് വാഷ് ഉപയോഗിക്കരുത്. അല്‍പം ഫേസ് വാഷ് എടുത്ത് മുഖത്ത് ഒന്നു രണ്ടു മിനിറ്റ് മസാജ് ചെയ്ത ശേഷം കഴുകിക്കളയാം. ക്ലോക്ക്, ആന്റി ക്ലോക്ക് രീതിയില്‍ മസാജ് ചെയ്യണം. ഫേസ് വാഷ് മുഴുവനായും കഴുകിക്കളയുകയും വേണം.

മുഖം കഴുകാന്‍ ഫേസ് സ്‌ക്രബറുകള്‍ ഉപയോഗിക്കുന്നവരുണ്ട്. ഒരിക്കലും അമിതശക്തിയില്‍ സ്‌ക്രബറുകള്‍ മുഖത്ത് ഉപയോഗിക്കരുത്. ഇത് നല്ല ചര്‍മകോശങ്ങളെ നശിപ്പിക്കും. ആഴ്ചയില്‍ ഒന്നോ രണ്ടോ ദിവസം മാത്രം ഇവ ഉപയോഗിക്കാം.

മുഖം കഴുകാന്‍ പയറുപൊടി, കടലമാവ് തുടങ്ങിയ സ്വാഭാവികമാര്‍ഗങ്ങള്‍ ഉപയോഗിക്കുന്നതു നല്ലതാണ്.

കഴുകിയ ശേഷം മൃദുവായ ടവല്‍ കൊണ്ട് മുഖം മൃദുവായി ഒപ്പുക. അമര്‍ത്തിത്തുടയ്ക്കുന്നത് മുഖത്തെ കോശങ്ങളെ കേടു വരുത്തും.