മധുരിക്കും സൗന്ദര്യം

Skin Care

oi-Saritha

By Veena

Published: Friday, June 1, 2012, 17:12 [IST]

സൗന്ദര്യസംരക്ഷണത്തിന് തേനിന്റെ പങ്ക് ഒഴിവാക്കിക്കളയാനാവില്ല. നല്ല നിറം നല്‍കുന്നതിനോടൊപ്പം ധാരാളം ചര്‍മപ്രശ്‌നങ്ങള്‍ക്കുള്ള പരിഹാരം കൂടിയാണ് ഇത്.

തേനും മഞ്ഞളും കൂടിച്ചേര്‍ത്താല്‍ നല്ല ഫേസ് പാക്കാണ്. വരണ്ട മുഖമുളളവര്‍ ഇതില്‍ അല്‍പം പാലും ചേര്‍ക്കണം. ഇത് മുഖത്തുതേച്ച് പതിനഞ്ചു മിനിറ്റിനു ശേഷം കഴുകിക്കളയണം. മുഖം വൃത്തിയാകാനും നിറം വര്‍ദ്ധിക്കാനും ഇത് സഹായിക്കും.

ദിവസവും അല്‍പം തേനുപയോഗിച്ച് മുഖം കഴുകിയാണ് ചര്‍മത്തിന് തിളക്കമേറും.

തേന്‍ അല്‍പം ചൂടാക്കി തൈരു ചേര്‍ത്ത് മുഖത്തു പുരട്ടുക. പതിനഞ്ചു മിനിററിനു ശേഷം തണുത്ത വെള്ളം കൊണ്ട് കഴുകാം.

കറുവാപ്പട്ട പൊടിച്ചതും നാരങ്ങാനീരും തേനും ചേര്‍ത്ത് മുഖത്തും കഴുത്തിലും തേക്കുക. അല്‍പസമയം മസാജ് ചെയ്ത ശേഷം കഴുകിക്കളയാം.

തേന്‍ മുട്ടയുടെ മഞ്ഞയും ഒലീവെണ്ണയും കൂട്ടിച്ചേര്‍ത്ത് പേസ്റ്റാക്കി മുഖത്തു തേക്കാം. മുഖത്തിടുന്നതിനു മുന്‍പ് ചൂടുവെള്ളത്തില്‍ മുക്കിപ്പിഴിഞ്ഞ തുണി അല്‍പനേരം മുഖത്തിടുന്നതും നല്ലതാണ്. മുഖത്തെ ദ്വാരങ്ങള്‍ തുറക്കുവാനാണിത്. ഇത് മുഖത്തെ അഴുക്കുനീക്കുകയും ചര്‍മത്തിന് പുതുജീവന്‍ നല്‍കുകയും ചെയ്യുന്നു.

ഓട്‌സും വെളളവും കൂട്ടിക്കലര്‍ത്തി പേസ്റ്റ് രൂപത്തിലാക്കുക. പിന്നീട് ആപ്പിള്‍ കഷ്ണങ്ങളും തേനും ഒലീവ് എണ്ണയും ഒരുമിച്ച് മിക്‌സിയുപയോഗിച്ച് അരക്കുക. പിന്നീട് ഇതിലേക്ക് തയ്യാറാക്കി വച്ചിരിക്കുന്ന ഓട്‌സ് പേസ്റ്റും മുട്ടമഞ്ഞയും ചേര്‍ത്തടിക്കുക. ഈ മിശ്രിതം ഫേസ് പാക്കായി ഉപയോഗിക്കാം.

മുഖത്തെ പാടുകള്‍ മായ്ക്കുന്നതിനും തേന്‍ ഏറെ സഹായകമാണ്.