മുഖം മിനുക്കാന്‍ കറ്റാര്‍ വാഴ

Skin Care

oi-Saritha

By Veena

Published: Friday, May 25, 2012, 13:11 [IST]

പ്രകൃതിദത്ത സൗന്ദര്യവര്‍ദ്ധക വസ്തുക്കളില്‍ കറ്റാര്‍ വാഴയുടെ സ്ഥാനം എടുത്തു പറയുക തന്നെ വേണം. പലതരം ചര്‍മപ്രശ്‌നങ്ങള്‍ക്കുമുള്ള നല്ലൊന്നാന്തരം പരിഹാരമാര്‍ഗമാണിത്.

ഇവ തനിയെ ഉപയോഗിക്കാം. എന്നാല്‍ ഇതിന്റെ നീര് നേരിട്ട് ചര്‍മത്തില്‍ പുരട്ടിയാല്‍ ചിലര്‍ക്ക് ചര്‍മത്തില്‍ അസ്വസ്ഥത അനുഭവപ്പെടും. ഇവ കൊണ്ട് പല തരത്തിലുള്ള ഫേസ്പായ്ക്കുകയും ഉണ്ടാക്കാം.

സൂര്യാഘാതം മാറാനും സണ്‍ ടാന്‍ മാറാനും കറ്റാര്‍വാഴ കൊണ്ട് പായ്ക്കുണ്ടാക്കാം. കറ്റാര്‍ വാഴപ്പോളയില്‍ നിന്നും നീരെടുത്ത് ഇതില്‍ അല്‍പം ചെറുനാരങ്ങാനീരും ചേര്‍ത്ത് മുഖത്തു പുരട്ടാം. 10 മിനിറ്റ് കഴിഞ്ഞ് ഇളം ചൂടുവെള്ളം ഉപയോഗിച്ച് കഴുകിക്കളയുകയുമാകാം. വെയിലത്തോ ചൂടിലോ പോയി വന്നാല്‍ ഈ ഫേസ്പായ്ക്കു പുരട്ടുന്നത് ടാന്‍ മാറ്റും.

മുഖത്തിന് നിറം വയ്ക്കാനും തിളക്കം നല്‍കാനും കറ്റാര്‍വാഴയുടെ നീര് പനിനീരുമായി ചേര്‍ത്ത് മുഖത്തു പുരട്ടിയാല്‍ മതിയാകും. ഈ മിശ്രിതം കണ്‍തടമൊഴികെയുള്ള ഭാഗത്ത് പുരട്ടി നല്ലപോലെ മസാജ് ചെയ്യുക. അല്‍പം കഴിഞ്ഞ് തണുത്ത വെള്ളത്തില്‍ കഴുകിക്കളയാം. ആഴ്ചയില്‍ ഒരിക്കലെങ്കിലും ഇങ്ങനെ ചെയ്യുന്നത് ഗുണം ചെയ്യും.

മുഖക്കുരു, മുഖക്കുരുവിന്റെ പാടുകള്‍ എന്നിവ മാറാനും കറ്റാര്‍ വാഴ നല്ലതാണ്. കറ്റാര്‍ വാഴപ്പോള അല്‍പം വെള്ളം ചേര്‍ത്ത് തിളപ്പിക്കുക. ഇത് മിക്‌സിയില്‍ അരച്ചെടുത്ത് ഇതിലേക്ക് തേന്‍ ചേര്‍ത്ത് നല്ലപോലെ ഇളക്കണം. ഈ മിശ്രിതം മുഖത്തു പുരട്ടി അല്‍പം കഴിഞ്ഞ് കഴുകിക്കളയാം.

മുഖത്തുള്ള വടുക്കള്‍ മാറ്റാനും കറ്റാര്‍ വാഴ വളരെ നല്ലതാണ്. കറ്റാര്‍ വാഴയുടെ ജെല്ലിനൊപ്പം വെള്ളരിക്കാ നീര്, തൈര് എന്നിവ കൂട്ടിച്ചേര്‍ത്ത് പായ്ക്കുണ്ടാക്കി ഉപയോഗിക്കാം.