വിയര്‍പ്പുകുരു അകറ്റാം

Published: Thursday, May 24, 2012, 10:10 [IST]

വേനല്‍ക്കാലത്ത് ചര്‍മത്തെ അലട്ടുന്ന ഏറ്റവും മുഖ്യ പ്രശ്‌നമാണ് വിയര്‍പ്പുകുരു. ചൂടും വിയര്‍പ്പും സഹിക്കാനാവില്ല. അതോടൊപ്പം ചൂടുകുരുവിന്റെ ചൊറിച്ചിലും അസ്വസ്ഥതയും കൂടിയായാലോ. ഇതൊഴിവാക്കാന്‍ ചില വഴികളുണ്ട്.

വേനല്‍ക്കാലത്ത് രണ്ടോ മൂന്നോ തവണ കുളിയ്ക്കുക എന്നത് വളരെ പ്രധാനം. അതും തണുത്ത വെള്ളത്തില്‍ കുളിയ്ക്കാന്‍ ശ്രദ്ധിക്കുക. ഇത് ചൂടുകുരു വരാതെ തടയും. കാരണം ചൂടുകാലത്ത് ശരീരത്തില്‍ വിയര്‍പ്പും അഴുക്കും അടിഞ്ഞു കൂടാന്‍ സാധ്യത കൂടുതലാണ്. ഇത് ബാക്ടീരിയ വരാനും കാരണമാകും. എപ്പോഴും ചര്‍മം വൃത്തിയായി സൂക്ഷിക്കുകയെന്നതാണ് പ്രധാനം.

മൃതകോശങ്ങളാണ് വിയര്‍പ്പുകുരുവിന് കാരണമാകുന്നത്. വേനല്‍ക്കാലത്ത് ആഴ്ചയില്‍ രണ്ടു തവണയെങ്കിലും മൃതകോശങ്ങള്‍ നീക്കം ചെയ്യണം. ദേഹം പയര്‍പൊടി, കടലമാവ് എന്നിവയിട്ട് ഇഞ്ച കൊണ്ടോ മറ്റേതെങ്കിലും സ്‌ക്രബര്‍ കൊണ്ടോ ഉരച്ചു കഴുകണം.

എണ്ണമയമുള്ള ചര്‍മമുള്ളവരാണെങ്കില്‍ ആഴ്ചയില്‍ മൂന്നോ നാലോ തവണം മൃതകോശങ്ങള്‍ നീക്കം ചെയ്യണം. ചര്‍മസൗന്ദര്യത്തിനും ഇത് ഗുണം ചെയ്യും.

വേനല്‍ക്കാലത്ത് കോട്ടന്‍ വസ്ത്രങ്ങള്‍ മാത്രം ഉപയോഗിക്കുക. അയഞ്ഞ വസ്ത്രങ്ങള്‍ ഉപയോഗിക്കാനും ശ്രദ്ധിക്കുക. ഇത് വിയര്‍ക്കാതിരിക്കാന്‍ സഹായിക്കും. വിയര്‍പ്പായാല്‍ വസ്ത്രങ്ങള്‍ മാറ്റുകയും വേണം. അല്ലെങ്കില്‍ ഇത് ശരീരത്തില്‍ അഴുക്കടിഞ്ഞു കൂടാന്‍ ഇട വരുത്തും.

വേനല്‍ക്കാലത്ത് പൗഡര്‍ ഉപയോഗിക്കുന്നത് നല്ലതാണ്. ഇത് വിയര്‍പ്പകറ്റാന്‍ ഒരു പരിധി വരെ സഹായിക്കും.