കണ്‍തടത്തിലെ കറുപ്പകറ്റണോ?

Skin Care

oi-Saritha

By Veena

Published: Monday, March 12, 2012, 11:07 [IST]

കണ്‍തടം കറുക്കുന്നത് പലരുടേയും സൗന്ദര്യപ്രശ്‌നമാണ്. പാരമ്പര്യം മുതല്‍ ഉറക്കക്കുറവും ടെന്‍ഷനും അനാരോഗ്യകരമായ ഭക്ഷണ, ജീവിത ശീലങ്ങളും അമിതമായ ടിവി, കമ്പ്യൂട്ടര്‍ ഉപയോഗവും ഇതിന് കാരണമാകുന്നുണ്ട്. ഈ പ്രശ്‌നം പരിഹരിച്ച് കണ്ണുകളുടേയും മുഖത്തിന്റേയും ഭംഗി കളയാതിരിക്കാനുള്ള ചില വഴികളിതാ,

വൈറ്റമിന്‍ ഇ, ബദാം ഓയില്‍ തുടങ്ങിയവ കൊണ്ട് കണ്ണിന് ചുറ്റും മസാജ് ചെയ്യുന്നത് നല്ലതാണ്. വളരെ മൃദുവായി വേണം മസാജ് ചെയ്യാന്‍. ഇത് രക്തപ്രവാഹം വര്‍ദ്ധിപ്പിക്കുകയും കണ്‍തടത്തിലെ കറുപ്പു കുറയ്ക്കുകയും ചെയ്യും.

ഉരുളക്കിഴങ്ങ്, വെള്ളരിക്കാ എന്നിവയുടെ നീര് കണ്ണിന് ചുറ്റും പുരട്ടുന്നത് നല്ലതാണ്. ഇവ കനം കുറച്ച് വട്ടത്തില്‍ അരിഞ്ഞും കണ്ണിന് മുകളില്‍ വയ്ക്കാം.

വൈറ്റമിന്‍ എ, ഇ എന്നിവ അടങ്ങിയ ഭക്ഷണസാധനങ്ങള്‍ കഴിയ്ക്കണം. ഇലക്കറികളും ഭക്ഷണത്തില്‍ ഉള്‍പ്പെടുത്തുക.

പഞ്ഞി പനിനീരില്‍ മുക്കി കണ്ണിന് മുകളില്‍ വയ്ക്കുന്നതും നല്ലതാണ്. ടീ ബാഗും ഇങ്ങനെ ഉപയോഗിക്കാം.

ധാരാളം വെള്ളം കുടിയ്ക്കുക. ആരോഗ്യപരമായ പ്രശ്‌നമാണ് ഇതെങ്കില്‍ വെള്ളം ഏറ്റവും നല്ല പരിഹാരമാണ്.

ഭക്ഷണത്തില്‍ ഉപ്പു കുറയ്ക്കുന്നത് കണ്ണുകളുടെ സൗന്ദര്യത്തിന് നല്ലതാണ്. ഉപ്പ് ശരീരത്തില്‍ വെള്ളം കെട്ടിനിര്‍ത്തുകയും ഇത് തൂങ്ങിയ കണ്ണുകള്‍ക്കും കറുത്ത പാടുകള്‍ക്കും വഴിയൊരുക്കുകയും ചെയ്യും.

ഉറക്കക്കുറവാണ് കറുത്ത പാടുകള്‍ക്ക് കാരണമെങ്കില്‍ പരിഹാരം നല്ല ഉറക്കം തന്നെ.

ചര്‍മാരോഗ്യം മെച്ചപ്പെടുത്താനുള്ള വ്യായാമങ്ങളുണ്ട്. ഇവ ശീലിക്കുക. യോഗയിലെ പ്രാണായാമം തുടങ്ങിയവ ചര്‍മത്തിന്റെ ആരോഗ്യത്തിന് വളരെ നല്ലതാണ്.

കടുത്ത വെയിലത്ത് ഇറങ്ങുന്നത് ഒഴിവാക്കുക. ഇങ്ങനെ പോകണമെങ്കില്‍ സണ്‍ഗ്ലാസ് ഉപയോഗിക്കുക.