മുഖത്തെ ചുളിവുകള്‍ മാറ്റാം

Published: Saturday, February 25, 2012, 15:04 [IST]

മുഖത്തെ ചുളിവുകള്‍ പ്രായക്കൂടുതല്‍ തോന്നുന്നതിനുള്ള പ്രധാന കാരണമാണ്. സ്ത്രീകളുടെ കാര്യത്തില്‍ ആര്‍ത്തവവിരാമത്തിന് ശേഷം ചുളിവുകള്‍ കൂടുതലാകുകയും ചെയ്യും. ഈസ്ട്രന്റെ ഉല്‍പാദനം കുറയുന്നതാണ് ഇതിന് കാരണമായി പറയാറുള്ളത്. ഡ്രൈ സ്‌കിന്‍, ചര്‍മരോഗങ്ങള്‍ തുടങ്ങിയവ മറ്റു ചില കാരണങ്ങളാണ്.

മുഖത്തെ ചുളിവുകള്‍ മാറ്റുന്നതിന് സ്വന്തമായി ചെയ്യാവുന്ന ചില വഴികളുണ്ട്.

ധാരാളം വെള്ളം കുടിയ്ക്കുകയെന്നത് പ്രധാനമാണ്. ഇത് ചര്‍മത്തിന്റെ വരള്‍ച്ചയും അതുവഴി ചുളിവുകളും കുറയ്ക്കുന്നു. ഇതുപോലെ തന്നെ ഭക്ഷണവും പ്രധാനം. ഇലക്കറികള്‍, ബീന്‍സ്, ബെറികള്‍, ഓറഞ്ച് തുടങ്ങിയ ഭക്ഷണങ്ങള്‍ ചര്‍മത്തില്‍ ചുളിവു വരാതിരിക്കാന്‍ സഹായിക്കും.

വൈറ്റമിന്‍ ഇ ക്യാപ്‌സൂളുകള്‍ പൊട്ടിച്ചൊഴിച്ച് അതില്‍ തൈര്, തേന്‍, നാരങ്ങാനീര് എന്നിവ ചേര്‍ത്ത് മുഖത്തു പുരട്ടുന്നത് ചുളിവുകള്‍ മാറാന്‍ നല്ലതാണ്. സ്ത്രീകള്‍ക്കും പുരുഷന്മാര്‍ക്കും ഒരേപോലെ ഉപയോഗിക്കാവുന്ന മാര്‍ഗമാണിത്.

ആപ്പിള്‍, പൈനാപ്പിള്‍, തക്കാളി എന്നിവയുടെ പള്‍പ്പ് മുഖത്തു പുരട്ടുന്നതും മുഖത്തെ ചുളിവുകള്‍ അകറ്റാന്‍ നല്ലതാണ്.

ചെറുനാരങ്ങാനീരില്‍ പഞ്ചസാര ചേര്‍ത്ത് മുഖത്തു മസാജ് ചെയ്യുന്നതും ചുളിവ് മാറാന്‍ സഹായിക്കും. ചെറുനാരങ്ങാനീരില്‍ വൈറ്റമിന്‍ സി അടങ്ങിയിട്ടുണ്ട്. ഇത് ചര്‍മത്തിന് ഗുണം ചെയ്യുന്നു. പഞ്ചസാരയിലെ ഗ്ലൈകോളിക് ആസിഡ് മൃതചര്‍മത്തെ അകറ്റാന്‍ സഹായിക്കും.

മുന്തിരി തൊലി നീക്കി മുഖത്ത് മസാജ് ചെയ്യുന്നതും ചുളിവകറ്റാന്‍ നല്ലതാണ്. മുട്ടവെള്ളയും ഈ ഗുണം നല്‍കുന്നു.

ആവണക്കെണ്ണ മുഖത്തു പുരട്ടി അല്‍പനേരം മസാജ് ചെയ്യുന്നതും ചര്‍മത്തിലെ ചുളിവകറ്റാന്‍ സഹായിക്കും.