എണ്ണമയമുള്ള ചര്‍മത്തിന് പരിഹാരം

Skin Care

oi-Saritha

By Veena

Published: Friday, February 17, 2012, 14:31 [IST]

വരണ്ട ചര്‍മം പോലെ എണ്ണമയമുള്ള ചര്‍മത്തിനുമുണ്ട് ദൂഷ്യവശങ്ങള്‍. മുഖക്കുരു പൊതുവെ ഇത്തരം ചര്‍മമുള്ളവര്‍ക്കാണ് വരാറ്. മുഖത്തെ എണ്ണമയവും പൊടിയും കൂടിക്കലര്‍ന്ന് ചര്‍മത്തില്‍ അഴുക്കും അതുവഴി അലര്‍ജികളും ഉണ്ടാകാനുള്ള സാധ്യതയും കൂടുതല്‍. എണ്ണമയമുള്ള ചര്‍മമുള്ളവര്‍ ചെയ്യേണ്ട ചില പ്രധാന കാര്യങ്ങളുണ്ട്.

മുഖം ദിവസവും രണ്ടോ മൂന്നോ തവണമയെങ്കിലും കഴുകി വൃത്തിയാക്കണം. വീര്യം കുറഞ്ഞ സോപ്പോ പയറുപൊടിയോ ഉപയോഗിക്കാം.

മുഖത്ത് സ്‌ക്രബ് ചെയ്യുന്നത് നല്ലതാണ്. ഇത് ചര്‍മത്തിലെ അഴുക്കു നീക്കുവാനും ചര്‍മകോശങ്ങള്‍ക്ക് ഓക്‌സിജന്‍ ലഭിക്കുവാനും സഹായിക്കും.

മുഖത്ത് പുരട്ടുന്ന മോയിസ്ചറൈസര്‍ എണ്ണമയമുള്ളതാവരുത്. മോയിസ്ചറൈസര്‍ പുരട്ടിയാല്‍ എണ്ണമയം അധികമാണെന്നു തോന്നുകയാണെങ്കില്‍ ഒരു പഞ്ഞി കൊണ്ട് പതുക്കെ തുടക്കാം.

വെള്ളരിക്കാ നീരും നാരങ്ങാനീരും ചേര്‍ത്ത് പുരട്ടുന്നത് എണ്ണമയമുള്ള ചര്‍മത്തിന് നല്ലതാണ്. വെള്ളരിക്ക തക്കാളി ചേര്‍ത്ത് അരച്ചിടുന്നതും ഗുണം ചെയ്യും.

മുട്ടവെള്ളയും എണ്ണമയമുള്ള ചര്‍മത്തിന് യോജിച്ചതാണ്. ഇത് മുഖത്തു പുരട്ടി ഉണങ്ങുമ്പോള്‍ കഴുകിക്കളയാം.

മുള്‍ത്താണി മിട്ടി പുരട്ടുന്നത് മുഖത്തെ എണ്ണമയം നീക്കുകയും ചര്‍മത്തിന് മാര്‍ദവമുണ്ടാക്കുകയും ചെയ്യും.

ആപ്പിള്‍, നാരങ്ങാനീര് തുല്യഅളവിലെടുത്ത് മുഖത്തു പുരട്ടുന്നത് നല്ലതാണ്. ഇത് 15 മിനിറ്റ് കഴിഞ്ഞ് കഴുകിക്കളയാം.

പനിനീരും തുളസിനീരും തുല്യഅളവിലെടുത്ത് പുരട്ടുന്നതും നല്ലതാണ്.

എണ്ണമയമുള്ള ചര്‍മമുള്ളവര്‍ ഇതിന് ചേര്‍ന്ന ക്രീമുകളും ലോഷനുകളും തെരഞ്ഞെടുക്കാന്‍ ശ്രദ്ധിക്കണം.