ചര്‍മസൗന്ദര്യം, ആണുങ്ങള്‍ അറിഞ്ഞിരിക്കൂ

മുഖം വൃത്തിയാക്കി വയ്ക്കുന്നത് തന്നെ പ്രധാനം. ദിവസവും ചുരുങ്ങിയത് രണ്ടു തവണയെങ്കിലും മുഖം കഴുകണം. വീര്യം കുറഞ്ഞ സോപ്പോ മറ്റോ ഉപയോഗിക്കുന്നതും നന്ന്. കെമിക്കലുകള്‍ അടങ്ങിയ സോപ്പുകള്‍ക്കും ക്രീമുകള്‍ക്കും പകരം പ്രകൃതിദത്ത മാര്‍ഗങ്ങളായിരിക്കും കൂടുതല്‍ നല്ലത്.

മൃതചര്‍മം അകറ്റേണ്ടത് വളരെ പ്രധാനം. ഇതിന് മുഖം ആവി പിടിക്കുകയും സ്‌ക്രബ് ചെയ്യുകയും വേണം. ഫേസ് സ്‌ക്രബുകള്‍ ഉയോഗിക്കുമ്പോള്‍ കണ്‍തടവും കണ്‍പോളകളും ഒഴിവാക്കുകയും വേണം. ഷേവ് ചെയ്യുന്നതിന് മുന്‍പ് സ്‌ക്രബ് ചെയ്യുന്നത് ഷേവിംഗ് കൂടുതല്‍ എളുപ്പമാക്കും. റേസര്‍ കൊണ്ടുള്ള മുറിപ്പാടുകളും കുറയും.

ഷേവിംഗിന് ശേഷം മോയിസ്ചറൈസര്‍ ഉപയോഗിക്കുന്നത് കൂടുതല്‍ ഗുണം ചെയ്യും. ആല്‍ക്കഹോള്‍ അടങ്ങിയ മോയിസ്ചറൈസറുകള്‍ ഒഴിവാക്കുന്നതാണ് നല്ലത്. മോയിസ്ചറൈസറല്ലെങ്കില്‍ ടോണര്‍ ഉപയോഗിക്കാം. എണ്ണമയമില്ലാത്ത മോയിസ്ചറൈസര്‍ ഉപയോഗിക്കുന്നതായിരിക്കും കൂടുതല്‍ നല്ലത്.

കണ്‍തടത്തിലെ ചര്‍മസംരക്ഷണത്തിന് അണ്ടര്‍ ഐ ക്രീമുകള്‍ ഉപയോഗിക്കാം. ചെറിയ അളവില്‍ ക്രീമെടുത്ത് വളരെ മൃദുവായി പുരട്ടാം. ഈ ഭാഗത്തെ ചര്‍മം വളരെ മൃദുവാണ്.