നല്ല ചര്‍മം, 10 കല്‍പന

Skin Care

oi-Saritha

By Veena

Published: Tuesday, February 7, 2012, 14:16 [IST]

ചര്‍മത്തിന്റെ സൗന്ദര്യത്തിന് ചര്‍മസംരക്ഷണം മാത്രമല്ലാ, മറ്റു ചില കാര്യങ്ങളും കൂടിയുണ്ട്.

സൗന്ദര്യം കൂട്ടാനായാണ് മേക്കപ്പിടുന്നത്. എന്നാല്‍ മേക്കപ്പ് ചര്‍മത്തിന് നല്ലതല്ല. ഇതിലെ രാസവസ്തുക്കള്‍ ചര്‍മത്തിന് ദോഷം വരുത്തുകയാണ് ചെയ്യുന്നത്. അതുകൊണ്ട് മേക്കപ്പിട്ടാലും ആവശ്യം കഴിഞ്ഞാലുടനെ ഇത് നീക്കം ചെയ്യാന്‍ മറക്കരുത്. ദിവസവും മേക്കപ്പിടുന്നവരാണെങ്കില്‍ ലളിതമായ മേക്കപ്പിടാന്‍ ശ്രദ്ധിക്കണം.

വെള്ളം, പഴച്ചാറുകള്‍ എന്നിവ ധാരാളം കുടിയ്ക്കുക. ശരീരത്തിലെ വിഷാംശം പുറത്തു കളയാന്‍ വെള്ളം സഹായിക്കും. ചര്‍മത്തിന്റെ ആരോഗ്യത്തിന് ഇത് വളരെ പ്രധാനമാണ്.

നല്ല ഉറക്കവും ചര്‍മത്തിനു വേണം. ഉറക്കക്കുറവ് ചര്‍മത്തില്‍ കരുവാളിപ്പും ക്ഷീണവും വരുത്തും.

വ്യായാമം ചെയ്യേണ്ടത് ശരീരത്തിന് മാത്രമല്ലാ, ചര്‍മസൗന്ദര്യത്തിനും പ്രധാനമാണ്. ചര്‍മത്തിലേക്ക് കൂടുതല്‍ രക്തപ്രവാഹം എത്തുവാനും ഓക്‌സിജന്‍ ലഭിക്കാനും ഇത് സഹായിക്കും.

ടെന്‍ഷന്‍, സ്‌ട്രെസ് എന്നിവ ചര്‍മസൗന്ദര്യത്തെ ബാധിക്കും. ഇതകറ്റാന്‍ യോഗ, മെഡിറ്റേഷന്‍ എന്നിവ പതിവാക്കുക.

കടുത്ത വെയില്‍ ഒഴിവാക്കുക. വെയിലുണ്ടെങ്കിലും ഇല്ലെങ്കിലും പുറത്തുപോകുന്നില്ലെങ്കിലും സണ്‍സ്‌ക്രീന്‍ പുരട്ടുക. ചര്‍മത്തില്‍ രാത്രി കിടക്കുമ്പോഴും നൈറ്റ് ക്രീമുകള്‍ പുരട്ടുന്നത് ഈര്‍പ്പം നിലനിര്‍ത്താന്‍ സഹായിക്കും.

ആഴ്ചയിലൊരിക്കലെങ്കിലും എണ്ണ പുരട്ടി കുളി പതിവാക്കുക. ഇത് ചര്‍മത്തിന് നല്‍കുന്ന ഗുണം ഏറെയാണ്.

നല്ല ഭക്ഷണം ചര്‍മസൗന്ദര്യത്തിന് അത്യാവശ്യം. വിശപ്പു മാറാനും രുചിക്കും കഴിയ്ക്കുന്നതിന് പകരം പോഷകഗുണമുള്ള ഭക്ഷണങ്ങള്‍ ശീലമാക്കുക.

രാസപദാര്‍ത്ഥങ്ങള്‍ക്ക് പുറമെ പോകാതെ പ്രകൃതിദത്ത സൗന്ദര്യമാര്‍ഗങ്ങള്‍ ഉപയോഗിക്കുക. അടുക്കളയിലെ പല പച്ചക്കറികളും പഴവര്‍ഗങ്ങളും സൗന്ദര്യസംരക്ഷണത്തിനുതകും.

പഴവും പാലും ചേര്‍ത്ത് മുഖത്തു പുരട്ടുന്നത് ചര്‍മത്തിന്റെ മിനുപ്പും തിളക്കവും നിലനിര്‍ത്താനുള്ള ഒരു പ്രധാന മാര്‍ഗമാണ്.