സൗന്ദര്യസംരക്ഷണത്തിന് തക്കാളി

Published: Monday, December 19, 2011, 17:12 [IST]

തക്കാളി ഭക്ഷണപദാര്‍ത്ഥമാണെങ്കിലും സൗന്ദര്യസംരക്ഷണത്തിനും ഉപയോഗിച്ചു വരുന്ന ഒന്നാണ്. മുഖക്കുരുവിനും മുഖചര്‍മം വൃത്തിയാക്കാനും തക്കാളിക്ക് പ്രത്യേക കഴിവുണ്ട്.

മുഖത്തെ വലിയ കുഴികള്‍ മുഖസൗന്ദര്യത്തിന് ദോഷം ചെയ്യുന്ന ഒന്നാണ്. ഇവയില്‍ അഴുക്കും എണ്ണമയവും പിടിച്ച് ചര്‍മം വൃത്തികേടാകാനും സാധ്യത കൂടുതലാണ്. തക്കാളി നാരങ്ങാനീരില്‍ കൂട്ടിക്കലര്‍ത്തി മുഖത്തു തേച്ചു പിടിപ്പിച്ച് പതിനഞ്ച് മിനിറ്റിന് ശേഷം കഴുകിക്കളയാം. ഇത് മുഖത്തെ കുഴികള്‍ ചെറുതാക്കും.

എണ്ണമയമുള്ള ചര്‍മത്തില്‍ മുഖക്കുരു വരാന്‍ സാധ്യത കൂടുതലാണ്. ഇതിന് തക്കാളിയും വെള്ളരിക്കാനീരും കൂട്ടിച്ചേര്‍ത്ത് മുഖത്തു തേക്കാം. അല്‍പം കഴിഞ്ഞ് കഴുകിക്കളഞ്ഞാല്‍ എണ്ണമയം മാറും. മുഖക്കുരു വരാതിരിക്കുകയും ചെയ്യും.

മുഖത്തെ പാടുകളും വടുക്കളും മാറ്റാനും തക്കാളിക്ക് കഴിയും. ഇതിലെ വൈറ്റമിന്‍ എ, സി, കെ എന്നിവയാണ് ഈ ഗുണം നല്‍കുന്നത്. തക്കാളി മുറിച്ച് മുഖത്ത് അല്‍പനേരം ഉരസുന്നത് വടുക്കളും പാടുകളും മാറാന്‍ സഹായിക്കും.

തക്കാളി നീരും തൈരും കൂട്ടിച്ചേര്‍ത്ത് മുഖത്തു തേച്ചാല്‍ സൂര്യാഘാതം കാരണമുണ്ടാകുന്ന കരുവാളിപ്പ് മാറിക്കിട്ടും.

തേനും തക്കാളി നീരും കൂട്ടിച്ചേര്‍ത്ത് മുഖത്തു പുരട്ടുന്നത് മുഖചര്‍മം തിളങ്ങാന്‍ നല്ലതാണ്.