ഫേസ് പാക്ക് പൂക്കള്‍ കൊണ്ടും

Published: Friday, December 2, 2011, 14:07 [IST]

വിവിധ തരം ഫേസ് പാക്കുകളുണ്ട്, സൗന്ദര്യം വര്‍ദ്ധിപ്പിക്കാന്‍. അപ്പോള്‍പ്പിന്നെ പൂക്കളെ ഒഴിച്ചു നിര്‍ത്തണോ. പ്രകൃതിദത്തമായ ഈ മാര്‍ഗം പോക്കറ്റ് കാലിയാക്കുകയുമില്ല, പാര്‍ശ്വഫലങ്ങളുണ്ടാക്കുകയുമില്ല.

ഫഌവര്‍ ഫേസ്പാക്കുണ്ടാക്കാനും എളുപ്പമാണ്. പൂക്കളുടെ ഇതളുകള്‍ നല്ലപോലെ അരക്കുകയേ വേണ്ടൂ. മിക്കവാറും എല്ലാ തരം പൂക്കളും ഇതിനുപയോഗിക്കുകയുമാകാം. പൂക്കള്‍ കൊണ്ടുള്ള ഫേസ്പാക്ക് മഞ്ഞുകാലത്തിന് വളരെ യോജിച്ചതുമാണ്.

പനിനീര്‍ സൗന്ദര്യവര്‍ദ്ധക വസ്തുവാണ്. അതുകൊണ്ടുതന്നെ ഇതു നല്‍കുന്ന റോസപ്പൂക്കള്‍ കൊണ്ട് ഫേസ് പാക്കുണ്ടാക്കാം. റോസിതളുകള്‍ അരച്ച് പാലും ഗോതമ്പുപൊടിയും ചേര്‍ത്ത് മുഖത്തിടാം. ഉണങ്ങിയ റോസിതളുകള്‍ പൊടിച്ചും ഈ മിശ്രിതമുണ്ടാക്കാം. ഇത് ഉണങ്ങിയ ശേഷം കഴുകിക്കളയുക. ചര്‍മത്തിളക്കവും നിറവും വര്‍ദ്ധിക്കും.

ചെണ്ടുമല്ലി എന്ന പേരില്‍ അറിയുന്ന മെറിഗോര്‍ഡ് നിറം കുറഞ്ഞവര്‍ക്ക് പറ്റിയ ഫേസ് പാക്കാണ്. ഇവയ്ക്ക് ഔഷധഗുണവുമുണ്ട്. ഇവ അരച്ച് തൈരിന്റെയോ പാല്‍പ്പൊടിയുടേയോ കൂടെച്ചേര്‍ത്താല്‍ നല്ല ഫേസ് പാക്കായി. കാരറ്റ്‌നീരും വേണമെങ്കില്‍ ചേര്‍ക്കാം.

സണ്‍ ടാന്‍ മാറാന്‍ മുല്ലപ്പൂ കൊണ്ടുള്ള ഫേസ് പാക്ക് നല്ലതാണ്. മുല്ലപ്പൂവിതള്‍ വെള്ളത്തിലിട്ട് തണുപ്പിച്ച് പാല്‍പ്പാടയുമായി ചേര്‍ത്ത് ഫേസ് പാക്കുണ്ടാക്കാം. വരണ്ട ചര്‍മത്തിന് ഇത് നല്ല ഗുണം ചെയ്യും.

തണുപ്പുകാലത്ത് മുഖക്കുരു ഉണ്ടാകാനുള്ള സാധ്യത കൂടുതലാണ്. ചര്‍മസുഷിരങ്ങള്‍ അടഞ്ഞിരിക്കുന്നത് കാരണമാണിത്. വൈറ്റമിന്‍ ഇ ഓയില്‍, അരിപ്പൊടി എന്നിവയുടെ കൂടെ ചെമ്പരത്തിപ്പൂ അരച്ച് ചേര്‍ത്ത് ഇത്തരം ഫേസ്പാക്കുണ്ടാക്കാം.

പൂക്കള്‍ കൊണ്ടുള്ള ഫേസ് പാക്കിട്ടാല്‍ വെയില്‍ കൊള്ളുവാന്‍ പാടില്ലെന്ന കാര്യം ഓര്‍ത്തിരിക്കണം.