സൗന്ദര്യ, മുടി സംരക്ഷണത്തിന് കാപ്പിപ്പൊടി

വരണ്ട മുഖത്തിന് പറ്റിയ നല്ലൊന്നാന്തരം ഫേസ് പായ്ക്കാണ് കാപ്പി. മൂന്ന് സ്പൂണ്‍ കാപ്പി ഒരു സ്പൂണ്‍ പാലുമായി ചേര്‍ത്ത് മുഖത്തു തേയ്ക്കാം. ഉണങ്ങുമ്പോള്‍ കഴുകിക്കളയാം. ഇത് മുഖത്തെ വരള്‍ച്ച അകറ്റും. കാപ്പിപ്പൊടി, കൊക്കോ പൗഡര്‍, പാല്‍ എന്നിവ ഒരുമിച്ചു ചേര്‍ത്തും മുഖത്തു തേയ്ക്കുന്ന ഫേസ് പായ്ക്കുണ്ടാക്കാം.

മുടി കൊഴിയുന്നത് തടയുവാനും കാപ്പി നല്ലതാണ്. എസ്‌പ്രെസോ കാപ്പി (കൂടുതല്‍ കട്ടി കൂടിയ കാപ്പി) മുടിയ്ക്കു ചേര്‍ന്ന നല്ലൊന്നാന്തരം കണ്ടീഷണറാണ്. മുടിയ്ക്കുള്ള ഹെന്ന ചെയ്യുമ്പോള്‍ അതില്‍ കാപ്പിപ്പൊടി ചേര്‍ത്താല്‍ മുടിയുടെ കരുത്തും തിളക്കവും വര്‍ദ്ധിക്കും. ഇത് മുടിയെ സംരക്ഷിക്കാനുള്ള ഒരു ആവരണമായി പ്രവര്‍ത്തിക്കുകയാണ് ചെയ്യുന്നത്.

കാപ്പിപ്പൊടി വെണ്ണയുമായോ കൊക്കോ ബട്ടറുമായോ ചേര്‍ത്ത് ദേഹത്ത് മസാജ് ചെയ്യാം.ഇത് ചര്‍മത്തിന് ചുളിവ് വരാതിരിക്കാനും ഈര്‍പ്പം നിലനിര്‍ത്താനും സഹായിക്കും.

കൈ, കാല്‍ സംരക്ഷണത്തിനുള്ള മാനിക്യൂര്‍, പെഡിക്യൂര്‍ എന്നിവയ്ക്കും കാപ്പിപ്പൊടി നല്ലതാണ്. പുരികത്തിന് കറുപ്പുനിറം നല്‍കാനും കാപ്പിപ്പൊടി നല്ലതാണ്. കാലുകള്‍ വിണ്ടുകീറുന്നത് തടയുവാന്‍ കാപ്പിപ്പൊടിക്കു കഴിയും. കാപ്പിപ്പൊടി വെള്ളം ചേര്‍ത്ത് പേസ്റ്റാക്കി ഈ ഭാഗങ്ങളില്‍ പുരട്ടി തിരുമ്മുകയേ വേണ്ടൂ.

കാപ്പി കുടിക്കുന്നതോടൊപ്പം കാപ്പിയുടെ ഇത്തരം ഗുണങ്ങള്‍ കൂടി പരീക്ഷിച്ചു നോക്കൂ.