മഴ നനഞ്ഞാൽ പണി പാളും! ചർമ്മത്തെയും പാദങ്ങളെയും അണുബാധയിൽ നിന്ന് രക്ഷിക്കാൻ ഈ മുൻകരുതലുകൾ മതി

കേരളത്തിലടക്കം വിവിധ സംസ്ഥാനങ്ങളിൽ കനത്ത മഴ തുടരുമെന്നാണ് കാലാവസ്ഥാ വകുപ്പിന്റെ (IMD) പുതിയ മുന്നറിയിപ്പ്. മഴ കനക്കുമ്പോൾ റോഡിലെ മലിനജലത്തിലൂടെ നടക്കേണ്ടി വരുന്നത് പലർക്കും ഒഴിവാക്കാനാവില്ല. എന്നാൽ ഇത്തരത്തിൽ മലിനജലവുമായി സമ്പർക്കമുണ്ടാകുന്നത് ചർമ്മരോഗങ്ങൾക്കും ഫംഗസ് ബാധയ്ക്കും വഴിവെച്ചേക്കാം. ഈ മൺസൂൺ കാലത്ത് ആരോഗ്യം സംരക്ഷിക്കാൻ കൃത്യമായ ശുചിത്വം പാലിക്കേണ്ടത് അത്യാവശ്യമാണ്. മഴ നനഞ്ഞ് വീട്ടിലെത്തിയാൽ ഒട്ടും വൈകാതെ തന്നെ പ്രതിരോധ നടപടികൾ സ്വീകരിക്കണം.

നഗരങ്ങളിലെ റോഡുകളിലൂടെ ഒഴുകുന്ന വെള്ളത്തിൽ ബാക്ടീരിയകളും മറ്റ് മാലിന്യങ്ങളും ധാരാളമുണ്ടാകും. അണുബാധ ഒഴിവാക്കാൻ അഞ്ച് ഘട്ടങ്ങളിലായുള്ള ശുചീകരണ രീതിയാണ് വിദഗ്ധർ നിർദ്ദേശിക്കുന്നത്. ആദ്യം പൈപ്പ് വെള്ളത്തിൽ കാലുകൾ നന്നായി കഴുകുക. വീര്യം കുറഞ്ഞ സോപ്പ് ഉപയോഗിച്ച് അഴുക്ക് പൂർണ്ണമായും നീക്കം ചെയ്യാം. വിരലുകൾക്കിടയിലെ ഭാഗങ്ങളിൽ ബാക്ടീരിയകൾ വളരാൻ സാധ്യതയുള്ളതിനാൽ അവിടെ പ്രത്യേകം ശ്രദ്ധിച്ച് വൃത്തിയാക്കാൻ മറക്കരുത്.

മഴക്കാലത്തെ ഫംഗസ് ബാധ തടയാൻ ശ്രദ്ധിക്കേണ്ട കാര്യങ്ങൾ

മഴയത്ത് ഹെൽമറ്റോ തൊപ്പിയോ ധരിക്കുമ്പോൾ മുടിയിലെ ഈർപ്പം തലയോട്ടിയിൽ അണുബാധയുണ്ടാക്കാൻ കാരണമാകും. ഇത് വളരെ വേഗത്തിൽ താരൻ വർദ്ധിപ്പിക്കും. അതിനാൽ മുടി എപ്പോഴും നന്നായി ഉണക്കി സൂക്ഷിക്കുക. മഴവെള്ളം കണ്ണിൽ തെറിച്ചാൽ ഉപ്പുവെള്ളം (Saline rinse) ഉപയോഗിച്ച് കഴുകുന്നത് അഴുക്കുകൾ നീക്കം ചെയ്യാൻ സഹായിക്കും. ശുദ്ധജലത്തിൽ അല്പം ഉപ്പ് ചേർത്ത് കണ്ണുകൾ വൃത്തിയാക്കുന്നത് നഗരങ്ങളിലെ മഴവെള്ളത്തിലുള്ള മലിനാംശങ്ങളെ നീക്കം ചെയ്യാൻ ഫലപ്രദമാണ്.

മഴക്കാലത്ത് കുട്ടികൾക്കും മുതിർന്നവർക്കും പ്രത്യേക കരുതൽ ആവശ്യമാണ്. ദീർഘനേരം ഷൂസിനുള്ളിൽ പാദങ്ങൾ നനഞ്ഞിരിക്കുന്നത് ചർമ്മം അമിതമായി മൃദുവാകാനും വേദനയുള്ള വിള്ളലുകൾ ഉണ്ടാകാനും കാരണമാകും. ഇത് ഗുരുതരമായ അണുബാധയിലേക്ക് നയിച്ചേക്കാം. അതിനാൽ ഈർപ്പം വലിച്ചെടുക്കുന്ന തരം സോക്സുകൾ ഉപയോഗിക്കാൻ ശ്രദ്ധിക്കുക. പുറത്തിറങ്ങുന്നതിന് മുൻപ് ബാരിയർ ക്രീമുകൾ (Barrier cream) പുരട്ടുന്നത് മലിനജലത്തിൽ നിന്നുള്ള അണുബാധ തടയാൻ സഹായിക്കും.

മഴ നനഞ്ഞ ശേഷം ചർമ്മത്തിൽ ചുവന്ന തടിപ്പോ വീക്കമോ ഉണ്ടോ എന്ന് പ്രത്യേകം ശ്രദ്ധിക്കണം. പഴുപ്പോ പനിയോ അനുഭവപ്പെട്ടാൽ ഉടൻ ഡോക്ടറുടെ സഹായം തേടുക. തുടക്കത്തിലേ ശ്രദ്ധിച്ചാൽ ചെറിയ അസ്വസ്ഥതകൾ വലിയ ആരോഗ്യപ്രശ്നങ്ങളായി മാറുന്നത് തടയാം. കൃത്യമായ ശുചിത്വ ശീലങ്ങളിലൂടെ ഈ മഴക്കാലം സുരക്ഷിതമായി ആസ്വദിക്കാം.