വാട്ടര്‍പ്രൂഫ് മേക്കപ്പും ചില കാര്യങ്ങളും

വാട്ടര്‍ പ്രൂഫ് മേക്കപ്പ് ചര്‍മത്തിന് നല്ലതല്ലെന്ന് പൊതുവെ ഒരു വിശ്വാസമുണ്ട്. മാത്രമല്ലാ, ഇതിടുമ്പോള്‍ ശ്രദ്ധയും സമയവും അല്‍പം കൂടുതല്‍ വേണം. പ്രത്യേകിച്ചും കണ്ണുകളില്‍ വാട്ടര്‍ പ്രൂഫ് മഷിയെഴുതുമ്പോള്‍. സൂക്ഷിച്ചിട്ടില്ലെങ്കില്‍ ഇത് കണ്ണിനുള്ളില്‍ പോകാനും സാധ്യതയുണ്ട്. ഈ മേക്കപ്പ് മുഖത്ത് നിന്ന് കളയുവാനും അല്‍പം ബുദ്ധിമുട്ടാണ്.

എന്നാല്‍ ഇത്തരം ചില പ്രശ്‌നങ്ങളുണ്ടെങ്കിലും വാട്ടര്‍ പ്രൂഫ് മേക്കപ്പിന് നിരവധി ഗുണങ്ങളുമുണ്ട്. കണ്‍മഷി പോകാതെ കരയണമെന്നുണ്ടോ. എന്നാല്‍ വാട്ടര്‍പ്രൂഫ് കണ്‍മഷി ഉപയോഗിച്ചാല്‍ മതി.

സാധാരണ ലിപസ്റ്റിക്കിട്ട് ഭക്ഷണം കഴിച്ചാല്‍ ചുണ്ടിലെ പല ഭാഗത്തും ലിപ്സ്റ്റിക് പോയി വൃത്തികെട്ട പാടുകളുണ്ടാകും. ചുണ്ടൊന്ന് തുടച്ചാലും ഈ പ്രശ്‌നമുണ്ടാകും. എന്നാല്‍ വാട്ടര്‍പ്രൂഫ് ലിപ്സ്റ്റിക് ചുണ്ടിലിട്ടാല്‍ പിന്നെ തുടച്ചു കളയാതെ പോകില്ല. അതുകൊണ്ടു തന്നെ ദീര്‍ഘനേരം നീണ്ടു നില്‍ക്കുന്ന ആഘോഷങ്ങള്‍ക്ക് പറ്റിയതാണ് വാട്ടര്‍ പ്രൂഫ് മേക്കപ്പ്.

ഒരോരോ കാലാവസ്ഥയനുസരിച്ച് മേക്കപ്പ് രീതികളും മാറ്റണം. വേനല്‍ക്കാലത്ത് ഒരു തരം, മഞ്ഞുകാലത്ത് മറ്റൊരു തരം എന്നിങ്ങനെ. എന്നാല്‍ വാട്ടര്‍പ്രൂഫ് മേക്കപ്പ് എല്ലാക്കാലങ്ങള്‍ക്കും ചേരുന്നതാണ്. മഴവെള്ളം വീണാല്‍ ഒലിച്ചുപോകുകയുമില്ല. വിയര്‍ത്താല്‍ മാഞ്ഞുപോകുകയുമില്ല.

വാട്ടര്‍ പ്രൂഫ് മേക്കപ്പില്‍ പ്രധാനമായും ശ്രദ്ധിക്കേണ്ട ഒന്നുണ്ട്. മേക്കപ്പ് കളയുവാന്‍ വാട്ടര്‍ പ്രൂഫ് മേക്കപ്പ് റിമൂവര്‍ തന്നെ വാങ്ങണം. പ്രത്യേകിച്ച് വാട്ടര്‍ പ്രൂഫ് കണ്‍മഷി തുടച്ചു കളയുന്നതിന്. അതുകൊണ്ട് വാട്ടര്‍ പ്രൂഫ് മേക്കപ്പ് സാധനങ്ങള്‍ വാങ്ങുമ്പോള്‍ ഇതിന്റെ തന്നെ റിമൂവറും വാങ്ങുവാന്‍ ശ്രദ്ധിക്കണം.