കമ്മല്‍ തെരഞ്ഞെടുക്കുമ്പോള്‍ മുഖാകൃതി പ്രധാനം

Make Up

oi-Saritha

By Veena

Published: Monday, November 28, 2011, 10:07 [IST]

വസ്ത്രങ്ങള്‍ക്കനുസരിച്ച് പല സ്ത്രീകളും കാതിലെ കമ്മലുകള്‍ തെരഞ്ഞെടുക്കാറുണ്ട്. നിറവും ഫാഷനും അനുസരിച്ച് ഇവ തെരഞ്ഞെടുക്കുമ്പോള്‍ പലപ്പോഴും അവ തങ്ങളുടെ മുഖത്തിന് ചേര്‍ന്നതാണോ എന്ന് പലരും ചിന്തിക്കാറില്ല. മുഖത്തിന്റെ ആകൃതിയനുസരിച്ച് ചേര്‍ന്ന കമ്മലുകള്‍ തെരഞ്ഞെടുക്കുക എന്നത് പ്രധാനമാണ്.

വട്ടമുഖമുള്ളവര്‍ക്ക് സ്റ്റഡുകള്‍ യോജിച്ചതല്ല. സാമാന്യം വലിയ, തൂങ്ങിക്കിടക്കുന്ന കമ്മലുകള്‍ തന്നെയാണ് ഇത്തരക്കാര്‍ക്ക് നല്ലത്. സ്റ്റഡുകള്‍ ഇത്തരക്കാര്‍ ഉപയോഗിച്ചാല്‍ കമ്മലിട്ട തോന്നല്‍ പോലും ഉണ്ടാകില്ല.

ചെറിയ മുഖമുള്ളമുള്ളവര്‍ക്ക് വല്ലാതെ വലിയ കമ്മലുകളോ നീളം കൂടിയ കമ്മലുകളോ നന്നായിരിക്കില്ല. ഇത്തരക്കാര്‍ക്ക് സ്റ്റഡുകളും വളഞ്ഞിരിക്കുന്ന കമ്മലുകളും യോജിക്കും.

നീണ്ട മുഖമുള്ളവര്‍ക്ക് റൗണ്ട്, ഓവല്‍ തുടങ്ങിയ കമ്മലുകള്‍ യോജിക്കും. s ആകൃതിയിലുള്ള കമ്മലുകളും ഇത്തരക്കാര്‍ക്ക് നല്ലതായിരിക്കും. അല്‍പം നീളമുള്ള കമ്മലുകളും ഇത്തരക്കാര്‍ക്ക് ചേരും. സ്റ്റഡിനേക്കാള്‍ കാതില്‍ നിന്ന് അല്‍പം ഇറങ്ങിനില്‍ക്കുന്ന കമ്മലുകളായിരിക്കും ഇവര്‍ക്ക് നല്ലത്.

സമചതുരാകൃതിയിലുള്ള മുഖത്തിന് ഓവല്‍, റൗണ്ട് കമ്മലുകള്‍ തീരെ ചേരില്ല. സ്‌ക്വയര്‍, ക്യൂബ്, സ്റ്റാര്‍, ട്രയാംഗിള്‍ മാതൃകയിലുള്ള കമ്മലുകളായിരിക്കും ഇത്തരക്കാര്‍ക്ക് ചേരുക.

ഏതു തരം കമ്മലുകളും ഓവല്‍ മുഖമുള്ളവര്‍ക്ക് ചേരും. അതുകൊണ്ട് തന്നെ ഓവലാണ് മുഖത്തിന് പററിയ ഏറ്റവും നല്ല ആകൃതിയെന്നും പറയാം. മുടിക്കെട്ടിനനുസരിച്ച് ഇത്തരക്കാര്‍ കമ്മലുകള്‍ തെരഞ്ഞെടുക്കുന്നത് കൂടുതല്‍ നല്ലതായിരിക്കും.