മേക്കപ്പ് : ശ്രദ്ധിക്കേണ്ട ചില കാര്യങ്ങള്‍

മുഖത്തെ ചുളിവുകളകറ്റി നിറം നല്‍കാനാണ് സാധാരണ ഫൗണ്ടേഷന്‍ ക്രീമുകള്‍ ഉപയോഗിക്കാറ്. എന്നാല്‍ അധികം ഫൗണ്ടേഷന്‍ ക്രീം ഉപയോഗിച്ചാല്‍ കഥ മാറും. ഇത് ചര്‍മം വരണ്ടതാക്കും. മുഖത്തെ ചുളിവുകള്‍ എടുത്തുകാണിക്കുകയും ചെയ്യും. ഇത്തരം അബദ്ധം ഒഴിവാക്കുവാന്‍ മോയിസ്ചറൈസര്‍ നല്ലൊരു മാര്‍ഗമാണ്.

ഇളം നിറത്തിലുള്ള ഫൗണ്ടേഷന്‍ ക്രീമും കണ്‍സീലറുകളും ഉപയോഗിക്കരുത്. ഇതും പ്രായം കൂടുതലാക്കും. ചര്‍മത്തിന്റെ നിറത്തിനു ചേര്‍ന്ന ക്രീമുകള്‍ ഉപയോഗിച്ചോളൂ.

കണ്ണിന്റെ ചുറ്റുമുള്ള കറുപ്പുവളയം നോക്കി നെടുവീര്‍പ്പിടാത്തവര്‍ കുറവാണ്. ഇതിന് പരിഹാരമായി കണ്‍സീലര്‍ വാരിപ്പൊത്തിയതു കൊണ്ടു കാര്യമില്ല. ഇത് മുഖത്തെ ചുളിവുകള്‍ കൂടുതല്‍ വെളിപ്പെടുത്തുകയേയുള്ളൂ. ഇതിനുള്ള പരിഹാരമാണ് മോയിസചറൈസര്‍. കണ്‍സീലര്‍ ഉപയോഗിക്കുന്നതിന് മുന്‍പ് മുഖത്ത് മോയിസ്ചറൈസര്‍ തേയ്ക്കുക.

പൗഡറിടുന്നതു കൊണ്ട് ഗുണങ്ങളുണ്ട്. എന്നാല്‍ കണ്ണിന് ചുറ്റും പൗഡറിട്ടാല്‍ പ്രായക്കൂടുതല്‍ തോന്നിക്കും.

ഇളം, കടും നിറങ്ങളിലുള്ള ലിപ്സ്റ്റിക്കുകളാണ് സാധാരണയായി എല്ലാവരും ഉപയോഗിക്കാറ്. കടുംചുവപ്പ്, മെറൂണ്‍, ബ്രൗണ്‍ ലിപ്സ്റ്റിക്കുകള്‍ ഒഴിവാക്കുന്നതാണ് നല്ലത്.

മസ്‌കാരയിടുന്നത് കണ്‍പീലികളെ ഭംഗിയാക്കുമെന്ന കാര്യത്തില്‍ സംശയമില്ല. എന്നാല്‍ കണ്ണിനു താഴെയുള്ള കണ്‍പീലികളില്‍ മസ്‌കാരയിടുന്നത് കണ്‍തടത്തിലെ കറുപ്പും ചുളിവുകളും എടുത്തുകാണിക്കും.

ഐഷാഡോ കണ്ണുകള്‍ ഭംഗിയാക്കുവാനാണ് സാധാരണ ഉപയോഗിക്കാറ്. ഇത് ഉപയോഗിക്കുമ്പോള്‍ ചെയ്യേണ്ട ഒരു പ്രധാന കാര്യമുണ്ട്, ഐഷാഡോ ഒരിക്കലും കണ്ണിന്റെ പുറംഭാഗത്തേക്ക് പരക്കരുത്. ഇത് മുഖത്തെ ചുളിവുകള്‍ എടുത്തുകാണിക്കും. ഐഷാഡോ കണ്ണിന്റെ ഉള്‍ഭാഗത്തും പുരികത്തിനു താഴെയുമാണ് ഇടേണ്ടത്.