മുടിയുടെ വളര്‍ച്ചയ്ക്ക് ചെമ്പരത്തി എണ്ണ; തയ്യാറാക്കാം ഈ വിധം

മുടിയുടെ വളർച്ചയ്ക്ക് ഏറ്റവും നല്ലതാണ് പ്രകൃതിദത്ത ചേരുവ​കളാൽ നിർമ്മിക്കുന്ന എണ്ണകൾ. നമ്മുടെ കേരളത്തിൽ വളരെ പണ്ടുകാലം മുതൽ എണ്ണകളിൽ ചേർക്കുന്ന പ്രധാന ചേരുവയാണ് ചെമ്പരത്തി. 5 ഇതളുകളോട് കൂടിയ ഔഷധ ചെമ്പരത്തി ഉപയോ​ഗിക്കുന്നത് സത്യത്തിൽ മുടിയുടെ ആരോ​ഗ്യം നിലനിർത്താൻ വളരെയധികം സഹായിക്കുന്നുണ്ട്. കൂടാതെ, ചെമ്പരത്തി താളി ഉപയോ​ഗിക്കുന്ന ശീലവും നമ്മൾ മലയാളികൾക്ക് ഉണ്ട്. പണ്ടുകാലത്ത് ഷാംപൂവിന് പകരം ഉപയോ​ഗിച്ചിരുന്ന പ്രധാന ചെടികൂടിയായിരുന്നു ചെമ്പരത്തി. ചെമ്പരത്തിയുടെ ഇലയും പൂവും കേശ സംരക്ഷണത്തിന് ഉത്തമമാണ്. അത്തരത്തിൽ മുടിയുടെ ആരോ​ഗ്യം നിലനിർത്താൻ സഹായിക്കുന്ന ഒരു ചെമ്പരത്തി എണ്ണ നമുക്ക് പരിചയപ്പെടാം.

Photo Credit: AI

ചെമ്പരത്തി എണ്ണ

നിങ്ങളുടെ മുടിയെ പോഷിപ്പിക്കാനും മുടിയെ വേരിൽ നിന്നും ബലപ്പെടുത്തി ഉള്ളോടെ വളർത്തിയെടുക്കാനും, നര അകറ്റാനും, മുടിയെ മോയ്സ്ച്വറൈസ് ചെയ്ത് നിലനിർത്താനും സഹായിക്കുന്ന ചെമ്പരത്തി എണ്ണ തയ്യാറാക്കേണ്ടത് ഈ വിധം.

ആവശ്യമുള്ള സാധനങ്ങള്‍

വെളിച്ചെണ്ണ അല്ലെങ്കില്‍ ഒലിവ് ഓയില്‍: 1 കപ്പ്
ഉണക്കിയ ചെമ്പരത്തി പൂക്കള്‍: 10-15 എണ്ണം അല്ലെങ്കില്‍ പുതിയ ചെമ്പരത്തി പൂക്കള്‍: 20-25 എണ്ണം

തയ്യാറാക്കുന്ന വിധം

ഇന്‍ഫ്യൂഷന്‍ രീതി: വൃത്തിയുള്ള ഒരു ഗ്ലാസ് ജാറില്‍ ചെമ്പരത്തി പൂക്കളും എണ്ണയും ചേര്‍ക്കുക.
വെയിലത്ത് വയ്ക്കുക: ജാര്‍ 4-6 ആഴ്ച വെയിലത്ത് വയ്ക്കു. ഇടയ്ക്കിടെ കുലുക്കുക.
അരിച്ചെടുക്കുക: ഒരു തുണിക്കോ നേര്‍ത്ത അരിപ്പ ഉപയോഗിച്ചോ എണ്ണ അരിച്ചെടുക്കുക.
സൂക്ഷിക്കുക: ഈ ചെമ്പരത്തി എണ്ണ ഇരുണ്ട നിറത്തിലുള്ള ഒരു ഗ്ലാസ് കുപ്പിയിലേക്ക് മാറ്റുക.

ഗുണങ്ങള്‍

മുടി വളർച്ചയെ പ്രോത്സാഹിപ്പിക്കാൻ സഹായിക്കുന്ന എണ്ണയാണ് ഇത്. കാരണം, ചെമ്പരത്തി എണ്ണ തലയോട്ടിയിലെ രക്തചംക്രമണം വർദ്ധിപ്പിക്കുന്നു. ഇത് മുടി വളരാൻ സഹായിക്കുന്നു. അതുപോലെ, മുടിക്ക് കണ്ടീഷനിംഗ് നൽകാനും ഈ എണ്ണ സഹായിക്കുന്നതാണ്. കാരണം, ആന്റിഓക്സിഡന്റുകളും ഫാറ്റി ആസിഡുകളും ധാരാളമായി ഈ എണ്ണയിൽ അടങ്ങിയിരിക്കുന്നു. അതിനാൽ, മുടിയ്ക്ക് വേണ്ട പോഷകങ്ങൾ നൽകാനും, മുടിയെ കണ്ടീഷൻ ചെയ്തെടുക്കാനും ഇവ സഹായിക്കുന്നു. ഇവ കൂടാതെ, ഇതിൽ ആന്റി-ഫംഗൽ, ആന്റി ബാക്ടീരിയൽ ഗുണങ്ങളുണ്ട്. ഇവ താരൻ കുറയ്ക്കാൻ വളരെയധികം സഹായിക്കുന്നതാണ്. മുടിയെ പോഷിപ്പിക്കുകയും ഈർപ്പം നൽകി സംരക്ഷിക്കാനും ഈ എണ്ണ സഹായിക്കും. കൂടാതെ മുടി പൊട്ടിപ്പോകുന്നത് തടയുന്നതിനും, മുടിയെ വേരിൽ നിന്നും ബലപ്പെടുത്താനും സഹായിക്കുന്നതാണ്.

ഉപയോഗിക്കേണ്ട രീതി

എണ്ണ കുറച്ച് എടുത്ത് തലയോട്ടിയിലും മുടിയിലും നന്നായി തേച്ച് പിടിപ്പിച്ച് മസാജ് ചെയ്യുക. രാത്രി മുഴുവൻ അല്ലെങ്കിൽ 30 മിവനിറ്റ് തലയിൽ ഈ എണ്ണ പുരട്ടി വെയ്ക്കുക. രാത്രി പുരട്ടി കിടക്കാതിരിക്കുന്നതാണ് നല്ലത്. കാരണം, താരന്റെ പ്രശ്നം, നീരിറക്കം എന്നീ പ്രശ്നങ്ങൾ ഉള്ളവർക്ക് ഇവ വർദ്ധിക്കാൻ കാരണമാകാം. അതുപോലെ, ആഴ്ചയിൽ ഒന്നോ രണ്ടോ തവണ ഉപയോഗിക്കുക.

ശ്രദ്ധിക്കേണ്ട കാര്യങ്ങള്‍

ഉപയോഗിക്കുന്നതിന് മുമ്പ് ഒരു ചെറിയ ഭാഗത്ത് പുരട്ടി പാച്ച് ടെസ്റ്റ് നടത്തേണ്ടത് അനിവാര്യമാണ്. അതുപോലെ, മുടിയുടെ നീളത്തിനും ആവശ്യത്തിനും അനുസരിച്ച് അളവിൽ മാറ്റം വരുത്താം. തണുപ്പുള്ളതും ഇരുണ്ടതുമായ സ്ഥലത്ത് സൂക്ഷിക്കുക.

Disclaimer: ഇവിടെ നല്‍കിയിരിക്കുന്ന വിവരങ്ങള്‍ ഇന്റര്‍നെറ്റില്‍ നിന്ന് ലഭിച്ച പൊതുവായ അനുമാനങ്ങളുടെയും വിവരങ്ങളുടെയും അടിസ്ഥാനത്തിലാണ്. മലയാളം ബോള്‍ഡ്സ്‌കൈ ഇത് സ്ഥിരീകരിക്കുന്നില്ല. ഇത്തരം കാര്യങ്ങള്‍ ചെയ്യുന്നതിന് മുന്‍പ് വിദഗ്ധന്റെ ഉപദേശം സ്വീകരിക്കേണ്ടതാണ്