അടിഞ്ഞുകൂടിയ താരന്‍ പൂര്‍ണമായും നീക്കാം; ഫലപ്രദമായ ആയുര്‍വേദ പ്രതിവിധി ഇത്‌

തൈര്, ഉലുവ

1 പാത്രം തൈരില്‍ 1 ടേബിള്‍സ്പൂണ്‍ ഉലുവ പൊടിയും 1 ടീസ്പൂണ്‍ ത്രിഫല ചൂര്‍ണവും ഒരു രാത്രി മുഴുവന്‍ കുതിര്‍ക്കുക. പിറ്റേന്ന് രാവിലെ ഇത് മാസ്‌ക് ആയി മുടിയില്‍ പുരട്ടി ഒരു മണിക്കൂര്‍ കഴിഞ്ഞ് വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയുക. ആഴ്ചയില്‍ ഒന്നോ രണ്ടോ തവണ ഇങ്ങനെ ചെയ്യുന്നത് നിങ്ങളുടെ താരന്‍ പ്രശ്‌നം പരിഹരിക്കാന്‍ സഹായിക്കും.

വെളിച്ചെണ്ണ, നാരങ്ങനീര്

ഒരു ബൗള്‍ വെളിച്ചെണ്ണ എടുത്ത് 2 മിനിറ്റ് ചൂടാക്കുക. അതിനുശേഷം ഇതിലേക്ക് 1 ടീസ്പൂണ്‍ നാരങ്ങാനീര് ചേര്‍ത്ത് നന്നായി ഇളക്കുക. ഇത് മുടിയില്‍ പുരട്ടി രാത്രി മുഴുവന്‍ വയ്ക്കുക. അല്ലെങ്കില്‍ പുരട്ടി 2 മണിക്കൂര്‍ കഴിഞ്ഞശേഷം കഴുകിക്കളയുക. ആഴ്ചയില്‍ ഒരിക്കല്‍ ഇങ്ങനെ ചെയ്യുന്നത് താരന്‍ നീക്കാനുള്ള മികച്ച പ്രതിവിധിയാണ്.

കറ്റാര്‍ വാഴ, ആവണക്കെണ്ണ

1 കപ്പ് കറ്റാര്‍ വാഴ ജെല്‍ രണ്ട് ടീസ്പൂണ്‍ ആവണക്കെണ്ണയുമായി യോജിപ്പിക്കുക. ഇത് നിങ്ങളുടെ തലയോട്ടിയില്‍ നന്നായി പുരട്ടി രാത്രി മുഴുവന്‍ വിടുക. പിറ്റേന്ന് രാവിലെ ഇത് കഴുകി കളയുക. ആഴ്ചയില്‍ ഒരിക്കല്‍ ഇങ്ങനെ ചെയ്യുന്നത് താരന്‍ നീക്കാന്‍ സഹായിക്കും.

ഉലുവ, കറ്റാര്‍വാഴ

ഒരു കപ്പ് ഉലുവ ഒരു രാത്രി മുഴുവന്‍ വെള്ളത്തില്‍ കുതിര്‍ക്കുക. ഇത് ഒരു പേസ്റ്റ് രൂപത്തിലാക്കി അതില്‍ 2 ടീസ്പൂണ്‍ കറ്റാര്‍ വാഴ ജെല്‍ ചേര്‍ക്കുക. നന്നായി ഇളക്കിയശേഷം ഈ പേസ്റ്റ് നിങ്ങളുടെ തലയില്‍ പുരട്ടി 1 മണിക്കൂര്‍ വിടുക. ശേഷം വീര്യം കുറഞ്ഞ ഷാംപൂ ഉപയോഗിച്ച് നിങ്ങളുടെ മുടി ശുദ്ധമായ വെള്ളത്തില്‍ കഴുകുക. ആഴ്ചയില്‍ രണ്ടുതവണ ഇങ്ങനെ ചെയ്യുന്നത് താരന്‍ നീക്കാന്‍ സഹായിക്കും.

മോര്, ത്രിഫല

2 ഗ്ലാസ് മോര് എടുത്ത് അതില്‍ 1 ടീസ്പൂണ്‍ ത്രിഫല ചൂര്‍ണം കലര്‍ത്തി രാത്രി മുഴുവന്‍ സൂക്ഷിക്കുക. അടുത്ത ദിവസം രാവിലെ ഈ മോര് ഉപയോഗിച്ച് മുടി കഴുകുക. തുടര്‍ന്ന് വീര്യം കുറഞ്ഞ ഷാംപൂ ഉപയോഗിച്ച് തല കഴുകുക. ആഴ്ചയില്‍ രണ്ടുതവണ ഇങ്ങനെ ചെയ്യുന്നതിലൂടെ താരന്‍ പ്രശ്‌നം പരിഹരിക്കാന്‍ സാധിക്കും.

വേപ്പ്

പണ്ടുകാലം മുതല്‍ക്കേ ഇന്ത്യയില്‍ പ്രചാരത്തിലുള്ള മുടി സംരക്ഷണ ഘടകമാണ് വേപ്പ്. ഫംഗസ് അണുബാധ കാരണമായുണ്ടാകുന്ന താരന്‍ സുഖപ്പെടുത്താന്‍ അണുനാശിനി ഗുണങ്ങളുള്ള വേപ്പ് എണ്ണ നിങ്ങളെ സഹായിക്കും. വേപ്പിന് ആന്റിഫംഗല്‍, ആന്റിവൈറല്‍ ഗുണങ്ങള്‍ ഉണ്ട്. ഇതിന്റെ ആന്റിമൈക്രോബയല്‍ ഗുണങ്ങള്‍ താരനെ പ്രതിരോധിക്കാന്‍ സഹായിക്കും. വേപ്പില അരച്ച് പേസ്റ്റ് ആക്കി തൈര് ചേര്‍ത്ത് തലയോട്ടിയില്‍ പുരട്ടുക. 15-20 മിനിറ്റ് ഉണങ്ങാന്‍ വിട്ട ശേഷം മുടി കഴുകുക.

മുട്ടയുടെ വെള്ള, നാരങ്ങ നീര്

ഒരു ചെറിയ പാത്രത്തില്‍ രണ്ട് മുട്ടയുടെ വെള്ള എടുത്ത് അതില്‍ ഒരു നാരങ്ങയുടെ നീര് പിഴിഞ്ഞ് ചേര്‍ത്ത് മുടിയില്‍ പുരട്ടുക. അരമണിക്കൂറോളം ഉണങ്ങാന്‍ വിട്ട ശേഷം മുടി നന്നായി കഴുകുക. മുട്ടയുടെ വെള്ളയിലെ പ്രോട്ടീന്‍ മുടിയുടെ ആരോഗ്യം വര്‍ധിപ്പിക്കും. നാരങ്ങയിലെ വിറ്റാമിന്‍ സി രക്തചംക്രമണം വര്‍ദ്ധിപ്പിക്കാനും കൊളാജന്‍ ഉത്പാദനത്തിനും സഹായിക്കുന്നു. ഇത് തലയോട്ടിയുടെ ആരോഗ്യം വര്‍ദ്ധിപ്പിക്കുകയും താരനെ നീക്കുകയും ചെയ്യുന്നു.

നെല്ലിക്ക

നെല്ലിക്കയില്‍ ധാരാളമായി വിറ്റാമിന്‍ സി അടങ്ങിയിട്ടുണ്ട്. ഇത് തലയോട്ടിയിലെ വരള്‍ച്ച നീക്കുകയും താരന്‍ അടിഞ്ഞുകൂടുന്നത് തടയുകയും ചെയ്യുന്നു. ആന്റി-ഇന്‍ഫ്ളമേറ്ററി, ആന്റി ബാക്ടീരിയല്‍ ഗുണങ്ങളുള്ള നെല്ലിക്ക താരന്‍ നീക്കാന്‍ മികച്ച രീതിയില്‍ പ്രവര്‍ത്തിക്കുന്നു. താരന്‍ മൂലമുണ്ടാകുന്ന ചൊറിച്ചില്‍ തടയാനും ഇത് സഹായിക്കും. നെല്ലിക്ക പൊടി വെള്ളത്തില്‍ ചേര്‍ത്ത് പേസ്റ്റ് രൂപത്തിലാക്കുക. 8-10 തുളസി ഇലകള്‍ അരച്ച് ഈ പേസ്റ്റിലേക്ക് ചേര്‍ക്കുക. ഇത് തലയില്‍ പുരട്ടി ഏകദേശം 30 മിനിറ്റ് കഴിഞ്ഞ് തണുത്ത വെള്ളവും ഷാമ്പൂവും ഉപയോഗിച്ച് മുടി നന്നായി കഴുകുക.