മുടികൊഴിച്ചില്‍ തടയാന്‍ വീട്ടുവൈദ്യം

1. മുട്ട

സള്‍ഫറിനാല്‍ സമ്പന്നമായ മുട്ടയില്‍ നിരവധി പ്രോട്ടീനുകളും മിനറലുകളും അടങ്ങിയിട്ടുണ്ട്. സെലെനിയം, സിങ്ക്, അയണ്‍, അയഡിന്‍, ഫോസ്ഫറസ് എന്നീ ഘടകങ്ങള്‍ മുട്ടയിലടങ്ങിയിരിക്കുന്നു. മുടി വളര്‍ച്ചക്ക് ഏറെ ഉപകാരപ്രദമാണ് മുട്ട. ഇത് കൂടുതല്‍ ഫലപ്രദമാകാന്‍ ഒലിവ് ഓയിലുമായി ചേര്‍ത്ത് ഉപയോഗിച്ചാല്‍ മതി.

ഒരു മുട്ടയുടെ വെള്ളയും ഒരു ടീസ്പൂണ്‍ ഒലിവ് ഓയിലും ചേര്‍ത്ത് പേസ്റ്റ് തയ്യാറാക്കുക. ഇവ നന്നായി കൂട്ടിക്കലര്‍ത്തി തലയോട്ടിയിലും മുടിയിലും തേക്കാം. 15-20 മിനുട്ട് കഴിഞ്ഞ് തണുത്ത വെള്ളം ഉപയോഗിച്ച് കഴുകി വൃത്തിയാക്കുക.

2. നെല്ലിക്ക

മുടികൊഴിച്ചില്‍ പരിഹരിക്കുന്നതിനുള്ള ഒരു മികച്ച മാര്‍ഗ്ഗമാണ് നെല്ലിക്ക. വിറ്റാമിന്‍ സി ധാരാളമായി അടങ്ങിയ നെല്ലിക്ക സെല്ലുകളെ ശക്തിപ്പെടുത്തും എന്നതാണ് ഇതിന് കാരണം. നെല്ലിക്ക തലയോട്ടിയില്‍ തേക്കാം. എന്നാല്‍ തലമുടിക്ക് മാത്രമല്ല മൊത്തത്തിലുള്ള ആരോഗ്യത്തിനും നെല്ലിക്ക ഗുണകരമാണ് എന്ന കാര്യവും ഓര്‍മ്മിക്കുക. വിറ്റാമിന്‍ സി തന്നെയാണ് ഇതിനുള്ള കാരണം.

നെല്ലിക്ക ചതച്ച് നീരെടുക്കുകയോ ഹെല്‍ത്ത് സ്റ്റോറില്‍ നിന്ന് നെല്ലിക്കപ്പൊടി വാങ്ങുകയോ ചെയ്യാം. രണ്ട് സ്പൂണ്‍ നെല്ലിക്ക നീരോ പൊടിയോ അതേ അളവ് നാരങ്ങ നീരില്‍ ചേര്‍ത്ത് ഇളക്കുക. ഇത് തലയില്‍ തേച്ച് ഉണങ്ങിയ ശേഷം വെള്ളം ഉപയോഗിച്ച് കഴുകുക.

3. വെളുത്തുള്ളിയും ഉള്ളിയും

തലമുടിയുടെ വളര്‍ച്ചക്ക് അനിവാര്യമായ കൊലാജന്‍ ഉത്പാദനം വര്‍ദ്ധിപ്പിക്കാന്‍ സള്‍ഫര്‍ സഹായിക്കും. സള്‍ഫറിന്‍റെ രണ്ട് പ്രധാന ഉറവിടങ്ങളാണ് വെളുത്തുള്ളിയും ഉള്ളിയും. മുടി വളര്‍ച്ചക്കുള്ള പരമ്പരാഗതമായ ഔഷധങ്ങളില്‍ ഉള്ളി ഒരു പ്രധാന ഘടകമാണ്.

1-5 വെളുത്തുള്ളി ഇതളുകള്‍ വെളിച്ചെണ്ണയുമായി കലര്‍ത്തി തീയില്‍ വെച്ച് തിളപ്പിക്കുക. 2-3 മിനുട്ട് തിളച്ച ശേഷം തണുക്കാനനുവദിക്കുക. തണുത്ത ശേഷം തലയോട്ടിയില്‍ തേച്ച് മസാജ് ചെയ്യുക. നല്ല ഫലം ലഭിക്കാന്‍ ആഴ്ചയില്‍ 2-3 തവണ ഇത് ചെയ്യണം. ഉള്ളി ചതച്ച് നീരെടുത്ത് ഉപയോഗിക്കാം. ഉള്ളിയുടെ നീര് തലയോട്ടിയില്‍ തേച്ച് 25 മിനുട്ടിന് ശേഷം കഴുകുക.

4. മൈലാഞ്ചി

മുടിക്ക് ആരോഗ്യവും ഉറപ്പും ലഭിക്കാന്‍ മൈലാഞ്ചി ഉത്തമമാണെന്ന് ഏഷ്യാ ഭൂഖണ്ഡത്തിലെ ജനങ്ങള്‍ക്ക് ഏറെ മുമ്പ് തന്നെ അറിയാവുന്ന കാര്യമാണ്. കടുകെണ്ണയുമായി ചേര്‍ത്ത് ഉപയോഗിച്ചാല്‍ ഇത് കൂടുതല്‍ ഫലപ്രദമാകും.

250 മില്ലി കടുകെണ്ണയും 60 ഗ്രാം മൈലാഞ്ചിയും ചേര്‍ത്ത് മൈലാഞ്ചി ഇല ഉണങ്ങുന്നത് വരെ ചൂടാക്കുക. തണുത്ത് കഴിയുമ്പോള്‍ ഒരു പാത്രത്തില്‍ അടച്ച് വെയ്ക്കുക. ഇത് പതിവായി തലയില്‍ തേക്കുക.

5. ചെമ്പരത്തി

മുടിക്ക് പുനര്‍ജ്ജീവനും വളര്‍ച്ചയും ലഭിക്കുന്നതിന് ചെമ്പരത്തി ഉത്തമമാണ്. കൂടാതെ മുടി നരയ്ക്കുന്നതില്‍ നിന്നും, താരനില്‍ നിന്നും ചെമ്പരത്തി സംരക്ഷിക്കും. ചെമ്പരത്തി പതിവായി ഉപയോഗിച്ചാല്‍ കഷണ്ടി അകറ്റി നിര്‍ത്താന്‍ സാധിക്കും. കേരളത്തില്‍ മുടിക്ക് കട്ടി ലഭിക്കാന്‍ ആളുകള്‍ വെളിച്ചെണ്ണയില്‍ ചെമ്പരത്തിപ്പൂ ചേര്‍ത്ത് എണ്ണ തയ്യാറാക്കി ഉപയോഗിക്കുന്നു.

നിങ്ങള്‍ക്ക് സ്വയം ചെമ്പരത്തിപ്പൂ പേസ്റ്റ് തയ്യാറാക്കി ഉപയോഗിക്കാം. രണ്ട് ചെമ്പരത്തിപ്പൂവ് എടുത്ത് വെളിച്ചെണ്ണ അല്ലെങ്കില്‍ എള്ളെണ്ണയുമായി കലര്‍ത്തി ബ്ലെന്‍ഡറിലിട്ട് അരച്ചെടുക്കുക. ഇത് തേച്ച് 2-3 മണിക്കൂറിന് ശേഷം വെള്ളം ഉപയോഗിച്ച് കഴുകുക.