മുടിയുടെ തിളക്കവും മൃദുത്വവും വര്‍ദ്ധിപ്പിയ്ക്കാം

ഉള്ളിയും വെളുത്തുള്ളിയും

സള്‍ഫറിന് കൊലാജന്‍ ഉത്പാദനം വര്‍ദ്ധിപ്പിക്കാന്‍ കഴിവുണ്ട്. ഇത് മുടി വളര്‍ച്ചയെ പ്രോത്സാഹിപ്പിക്കും. ഉള്ളിയും വെളുത്തുള്ളിയും സള്‍ഫറിന്‍റെ മികച്ച സ്രോതസ്സുകളാണ്. ഇക്കാരണത്താലാ​ണ് കാലങ്ങളായി ഇവയെ ഹെയര്‍ കണ്ടീഷണറുകളായി ഉപയോഗിച്ച് വരുന്നത്. ഉള്ളിയുടെ നീര് തലയോട്ടിയില്‍ തേയ്ക്കുക. 15 മിനുട്ടിന് ശേഷം കടുപ്പം കുറഞ്ഞ ഷാംപൂ ഉപയോഗിച്ച് കഴുകുക. നന്നായി അരിഞ്ഞ വെളുത്തുള്ളി വെളിച്ചെണ്ണയില്‍ ചേര്‍ത്ത് അഞ്ച് മിനുട്ട് തിളപ്പിക്കുക. ഇത് തണുത്ത ശേഷം ഉപയോഗിക്കാം.

തേങ്ങാപ്പാല്‍

മുടിയുടെ വരള്‍ച്ച മാറ്റാന്‍ മികച്ചതാണ് വീട്ടില്‍ തന്നെ നിര്‍മ്മിക്കാവുന്ന ഫലപ്രദമായ കണ്ടീഷണറായ തേങ്ങാപ്പാല്‍. തേങ്ങയിലെ വിവധ ഘടകങ്ങള്‍ മുടിയെ പ്രകൃതിദത്തമായി കണ്ടീഷന്‍ ചെയ്യുകയും മുടിവളര്‍ച്ച പ്രോത്സാഹിപ്പിക്കുകയും ചെയ്യും.

മൈലാഞ്ചിയും കടുകെണ്ണയും

വരണ്ട മുടിക്ക് ഏറെ അനുയോജ്യമായ വീട്ടില്‍ നിര്‍മ്മിക്കാവുന്ന കണ്ടീഷണറാണ് ഇത്. മുടിക്ക് കരുത്ത് നല്കാനും നിറം നിലനിര്‍ത്താനും ഇത് സഹായിക്കും. മൈലാഞ്ചി കടുകെണ്ണ അല്ലെങ്കില്‍ ഒളിവ് ഓയിലുമായി ചേര്‍ത്ത് ഉപയോഗിച്ചാല്‍ കൂടുതല്‍ ഫലപ്രദമാകും.

നെല്ലിക്ക

വിറ്റാമിന്‍ സി, ആന്‍റി ഓക്സിഡന്‍റുകള്‍ എന്നിവയാല്‍ സമ്പന്നമായ നെല്ലിക്ക മുടികൊഴിച്ചിലിന് ഫലപ്രദമാണ്. ഇത് മുടിക്ക് മൃദുത്വവും തിളക്കവും നല്കും. നെല്ലിക്ക അരച്ച് നാരങ്ങ നീരുമായി ചേര്‍ത്ത് തലയോട്ടിയില്‍ തേച്ച് ഉണങ്ങാന്‍ അനുവദിക്കുക. ശേഷം ചൂടുള്ള വെള്ളം ഉപയോഗിച്ച് കഴുകുക.

മുട്ടയും ഒലിവ് ഓയിലും

മുട്ട വെള്ള ഒലിവ് ഓയിലുമായി ചേര്‍ത്ത് തലയോട്ടിയില്‍ തേക്കുക. 20 മിനുട്ടിന് ശേഷം തണുത്ത വെള്ളം ഉപയോഗിച്ച് കഴുകുക.

ചെമ്പരത്തി

ഏതാനും ചെമ്പരത്തിപ്പൂവ് അരച്ച് വെളിച്ചെണ്ണയില്‍ ചേര്‍ത്ത് കുഴമ്പ് രൂപത്തിലാക്കുക. ഇത് മുടിയില്‍ തേച്ച് ഏതാനും മണിക്കൂറുകള്‍ക്ക് ശേഷം കടുപ്പം കുറഞ്ഞ ഷാംപൂ ഉപയോഗിച്ച് കഴുകുക.