സ്വാഭാവിക രീതിയിലൂടെ മുടിയുടെ തിളക്കം കൂട്ടൂ

Published: Monday, January 9, 2012, 12:19 [IST]

പരസ്യങ്ങളില്‍ തിളങ്ങുന്ന മുടിയുള്ള സുന്ദരിയക്കണ്ട് നോക്കിയിരിക്കാറില്ലേ, ഇതു വെറും ക്യാമറ ടെക്‌നിക് എന്നു പറഞ്ഞ് സമാധാനിക്കാന്‍ വരട്ടെ, അല്‍പം ശ്രദ്ധയുണ്ടെങ്കില്‍ തിളങ്ങുന്ന മുടി യാഥാര്‍ത്ഥ്യമാക്കാവുന്നതേയുള്ളൂ.

കുളിക്കുന്നതിന് അല്‍പം സമയം മുന്‍പ് മുടിയില്‍ ഒലീവ് ഓയില്‍ പുരട്ടി മസാജ് ചെയ്യുന്നത് മുടിക്കു തിളക്കവും മൃദുത്വവും നല്‍കും. ബട്ടര്‍ ഫ്രൂട്ട് ഉടച്ച് അതില്‍ ഒലീവെണ്ണയും അല്‍പം ബേക്കിംഗ് പൗഡറും ചേര്‍ത്ത് തലയില്‍ തേച്ചു പിടിപ്പിച്ച്് അരമണിക്കൂര്‍ കഴിഞ്ഞ് കഴുകുന്നതും നല്ലതാണ്.

മുട്ട മുടിയുടെ തിളക്കം കൂട്ടുന്നതിന് സഹായിക്കും. മുട്ട അടിച്ച് തലയില്‍ തേച്ചു പിടിപ്പിക്കുക. അല്‍പസമയത്തിന് ശേഷം കഴുകിക്കളയുക.

ഷാംപൂ ഉപയോഗിച്ചു മുടി കഴുകിയാല്‍ കണ്ടീഷണറും പുരട്ടുവാന്‍ ശ്രദ്ധിക്കുക. മുടി ഒതുങ്ങിയിരിക്കുകയും തിളക്കം കൂടുകയും കൂടുതല്‍ മൃദുവാകുകയും ചെയ്യും. കണ്ടീഷണര്‍ പുരട്ടുമ്പോള്‍ മുടിയില്‍ തേച്ചുപിടിപ്പിച്ച് രണ്ടുമിനിറ്റു നേരം കഴിഞ്ഞേ കഴുകാവൂ. വേണമെങ്കില്‍ വിനെഗര്‍ വെള്ളത്തില്‍ ചേര്‍ത്ത് കണ്ടീഷണറിന് പകരം ഉപയോഗിക്കാവുന്നതേയുള്ളൂ. ഇതും മുടിക്കു തിളക്കം നല്‍കും.

ചൂടുവെള്ളത്തില്‍ ഒരിക്കലും മുടി കഴുകരുത്. മുടിയുടെ സ്വാഭാവിക ആരോഗ്യത്തിനും തിളക്കത്തിനും എപ്പോഴും തണുത്തവെള്ളമാണ് നല്ലത്.

ഉണങ്ങിയ ശേഷം മാത്രം മുടി ചീകുക. അല്ലെങ്കില്‍ മുടി പൊട്ടിപ്പോവുകയും ജട പിടിക്കുകയും ചെയ്യും. മുടിയുടെ സ്വാഭാവിക ആരോഗ്യത്തെ ഇത് ബാധിക്കും. മുടി കഴിവതും കാറ്റേറ്റു തന്നെ ഉണങ്ങട്ടെ. ഹെയര്‍ ഡ്രയര്‍ ഉപയോഗിക്കുന്നത് മുടിയുടെ തിളക്കം കുറയ്ക്കുകയും മുടി വരണ്ടതാക്കുകയും ചെയ്യും.

ആര്‍ക്കഹോള്‍ അടങ്ങിയ ഹെയര്‍ ജെല്ലുകള്‍ ഉപയോഗിക്കരുത്. ഇത് മുടിയുടെ സ്വാഭാവിക തിളക്കം കളയും. എന്നാല്‍ ബിയര്‍ കൊണ്ട് മുടി കഴുകുന്നത് മുടി തിളങ്ങാന്‍ നല്ലതാണ്.