ഭംഗിയുള്ള മുടി വേണോ?

മുടിസംരക്ഷണത്തിന് പഴം നല്ലൊരു വസ്തുവാണ്. നല്ലപോലെ പഴുത്ത പഴമുടച്ച് തലയില്‍ തേച്ച് അല്‍പം കഴിയുമ്പോള്‍ കഴുകിക്കളയാം. വരണ്ട മുടിയ്ക്കു ചേര്‍ന്ന ഒരു സംരക്ഷണമാര്‍ഗമാണിത്.

ഒരു മുട്ടയുടെ മഞ്ഞയുടെ അല്‍പവും രണ്ട് മുട്ടവെള്ളയും ചേര്‍ത്തു യോജിപ്പിക്കുക. ഇതില്‍ ഒരു ടീസ്പൂണ്‍ ഒലീവ് ഓയിലും രണ്ടോ മൂന്നോ വൈറ്റമിന്‍ ഇ ഓയില്‍ ക്യപ്‌സൂളുകളും പൊട്ടിച്ചൊഴിച്ച് കൂട്ടി യോജിപ്പിച്ച് തലയില്‍ തേയ്ക്കാം. അല്‍പം കഴിഞ്ഞ് ഷാംപൂവിട്ട് കഴുകിക്കളയാം. മുടി വളരെ മൃദുവാകും.

മുടിയ്ക്കു പറ്റിയ നല്ലൊരു കണ്ടീഷണറാണ് ബിയര്‍. ഇതുപയോഗിച്ച് മുടി കഴുകാം. അല്ലെങ്കില്‍ മുടി കഴുകിയ ശേഷം അല്‍പം ബിയര്‍ മുടിയില്‍ സ്േ്രപ ചെയ്യാം. മുടിയ്ക്ക് തിളക്കം ലഭിക്കും.

നനഞ്ഞ മുടിയില്‍ അല്‍പം മയോനീസ് പുരട്ടുക. ഇത് 15 മിനിറ്റിനു ശേഷം ഷാംപൂവിട്ട് കഴുകിക്കളയാം. മുടിയുടെ വരള്‍ച്ച മാറ്റാന്‍ ഇത് നല്ലൊരു വഴിയാണ്.

ചെറുചൂടുള്ള വെളിച്ചെണ്ണ തലയോടില്‍ പുരട്ടി മസാജു ചെയ്യുന്നത് മുടിയ്ക്ക് ഏറെ നല്ലതാണ്. വെളിച്ചെണ്ണയ്‌ക്കൊപ്പം ബദാം ഓയില്‍, ഒലീവ് ഓയില്‍ എന്നിവ ചേര്‍ത്ത മിശ്രിതവും ഉപയോഗിക്കാം.

ഒലീവ് ഓയില്‍ തനിയെ തലയില്‍ പുരട്ടുന്നതും നല്ലതു തന്നെ. ഇത് മുടി വളര്‍ച്ചയെ സഹായിക്കും. മുടി പൊട്ടിപ്പോകുന്നത് ഒഴിവാക്കുകയും ചെയ്യും.

നെല്ലിക്കാപ്പൊടിയും ചെറുനാരങ്ങാനീരും ചേര്‍ന്ന മിശ്രിതം മുടിയ്ക്ക്് വളരെ നല്ലതാണ്. ഒരു ടീസ്പൂണ്‍ നെല്ലിക്കാപ്പൊടി ഒരു ചെറുനാരങ്ങയുടെ നീരും കൂട്ടിയോജിപ്പിച്ച് തലയില്‍ പുരട്ടാം.

സ്‌ട്രോബെറിയും മുടിവളര്‍ച്ചയ്ക്ക് വളരെ നല്ലതാണ്. സ്‌ട്രെബെറി ഉടച്ച് തലയില്‍ തേക്കാം. സ്‌ട്രെബെറിയും മയോനിസും കലര്‍ന്ന മിശ്രിതം തലയില്‍ തേച്ച് കഴുകിക്കളഞ്ഞ് പിന്നീട് മുടിയില്‍ ആവി കൊള്ളിക്കുന്നതും നല്ലതു തന്നെ.

ഉലുവ ഷാംപൂവിന് പകരം വയ്ക്കാവുന്ന ഒന്നാണ്. ഉലുവ വെള്ളത്തിലിട്ട് കുതിര്‍ത്തി അരച്ച് തലയില്‍ തേച്ചു പിടിപ്പിച്ച് അല്‍പം കഴിയുമ്പോള്‍ കഴുകിക്കളയാം.

നല്ല ഭക്ഷണവും വ്യായാമവും മുടിക്ക് ഗുണം ചെയ്യും. മുടി വളര്‍ച്ചയ്ക്കും പോഷകങ്ങള്‍ ആവശ്യമാണ്. സ്‌ട്രെസ് മുടികൊഴിയാന്‍ ഇടവരുത്തും. വ്യായാമങ്ങള്‍ ഇതിനുള്ളൊരു പ്രതിവിധിയാണ്.