താരനകറ്റാന്‍ വിവിധ എണ്ണകള്‍

താരനുള്ള നല്ലൊരു മരുന്നാണ് വെളിച്ചെണ്ണയും ചെറുനാരങ്ങാനീരും കൂട്ടിക്കലര്‍ത്തിയ മിശ്രിതം. വെളിച്ചെണ്ണ ശിരോചര്‍മത്തിന് ഈര്‍പ്പം നല്‍കുന്നു. ചെറുനാരങ്ങയാകട്ടെ, താരന്‍ അകറ്റുകയും ചെയ്യുന്നു. ചെറുചൂടുള്ള വെളിച്ചെണ്ണയില്‍ ചെറുനാരങ്ങാനീര് ചേര്‍ത്തു തലയില്‍ പുരട്ടി അല്‍പം കഴിഞ്ഞ് കഴുകിക്കളയാം.

തൈര്, ബദാം എണ്ണ, ചെറുനാരങ്ങാനീര് എന്നിവ കലര്‍ത്തിയ മിശ്രിതം തലയോടില്‍ പുരട്ടുന്നത് താരന്‍ അകറ്റാന്‍ സഹായിക്കും. ബദാം എണ്ണ മുടി വളരുന്നതിനും സഹായിക്കുന്ന ഒന്നാണ്.

ചെമ്പരത്തിയും താരന്‍ മാറുന്നതിനുള്ള നല്ലൊരു വഴിയാണ്. തിളയ്ക്കുന്ന വെള്ളത്തില്‍ ചെമ്പരത്തിപ്പൂ അരച്ചതിടുക. ഈ മിശ്രിതം അരിച്ചെടുത്ത് അല്‍പം വെളിച്ചെണ്ണയോ ആവണക്കെണ്ണയോ ചേര്‍ത്ത് പുരട്ടാം. ഇത് 1 മണിക്കൂര്‍ കഴിഞ്ഞ് കഴുകിക്കളയാം.

എള്ളെണ്ണ താരനുള്ള നല്ലൊരു മരുന്നാണ്. എള്ളെണ്ണ അല്‍പം ചൂടാക്കി തലയോടില്‍ തേച്ചു പിടിപ്പിക്കുക. അല്‍പം കഴിഞ്ഞ് കഴുകിക്കളയാം.

ഉലുവ വെള്ളത്തിലിട്ട് കുതിര്‍ത്ത് അരച്ചെടുക്കുക. ഇതില്‍ അല്‍പം വെളിച്ചെണ്ണയും ചേര്‍ത്ത് ശിരോചര്‍മത്തില്‍ തേച്ചു പിടിപ്പിക്കുക. ഇത് താരന്‍ അകറ്റുക മാത്രമല്ല, മുടി മൃദുവാകാനും സഹായിക്കും.