സ്ത്രീകള്‍ക്കും വരും കഷണ്ടി

സാധാരണ കഷണ്ടി വരിക പുരുഷന്മാര്‍ക്കാണെന്നു പറയും. എന്നാല്‍ അപൂര്‍വമായി സ്ത്രീകള്‍ക്കും കഷണ്ടി വരാറുണ്ട്. സ്ത്രീകള്‍ക്ക് കഷണ്ടി വരുന്നതിന് പല കാരണങ്ങളുണ്ട്.

സ്ത്രീകള്‍ക്ക് കഷണ്ടി വരുന്നതിന് ഒരു പ്രധാന കാരണം പാരമ്പര്യമാണ്. പ്രത്യേകിച്ചും കുടുംബത്തില്‍ മുന്‍പാര്‍ക്കെങ്കിലും കഷണ്ടി വന്ന ചരിത്രമുണ്ടെങ്കില്‍ പ്രത്യേകിച്ചും. പാരമ്പര്യമാണ് കഷണ്ടിക്കു കാരണമെങ്കില്‍ മരുന്നുകള്‍ കൊണ്ട് പ്രത്യേകിച്ച് പ്രയോജനമൊന്നും തന്നെ ഉണ്ടാവുകയില്ല.

ഹോര്‍മോണ്‍ പ്രശ്‌നങ്ങളും സ്ത്രീകളിലെ കഷണ്ടിക്കു കാരണമാകാറുണ്ട്. പ്രത്യേകിച്ച് ആന്‍ഡ്രൊജന്‍ എന്ന ഹോര്‍മോണ്‍ തോത് വര്‍ദ്ധിക്കുന്നത് മുടി കൊഴിച്ചിലിന് കാരണമാകും. മെനോപോസ് സമയത്ത് സ്ത്രീകളില്‍ മുടി കൊഴിച്ചില്‍ സാധാരണമാണ്. ഇത് ഹോര്‍മോണ്‍ പ്രശ്‌നം കൊണ്ടാണ്. എന്നാല്‍ ചെറുപ്പം സ്ത്രീകളിലും ഹോര്‍മോണ്‍ പ്രശ്‌നങ്ങള്‍ കാരണം ചിലപ്പോള്‍ മുടി കൊഴിച്ചിലും കഷണ്ടിയും ഉണ്ടാകാറുണ്ട്.

ശരീരത്തിന്റെ പ്രതിരോധ ശേഷി കുറയുന്നത് മുടി കൊഴിച്ചിന് ഇടയാക്കാറുണ്ട്. ശരീരം വളരെ ദുര്‍ബലമാകുമ്പോഴും മുടികൊഴിച്ചില്‍ ഉണ്ടാകാറുണ്ട്. രോഗങ്ങളും ഇത്തരത്തില്‍ മുടികൊഴിച്ചിലും കഷണ്ടിയും ഉണ്ടാകാന്‍ സാധ്യതയുണ്ടാക്കുന്നുണ്ട്. എന്നാല്‍ ഇത്തരം അവസ്ഥകള്‍ താല്‍ക്കാലികമാണെന്നു പറയാം. ശരീരത്തിന് ആരോഗ്യമുണ്ടാകുമ്പോള്‍ മുടിയുടെ ആരോഗ്യവും മെച്ചപ്പെടും.

ചിലതരം മരുന്നുകള്‍, കെമിക്കലുകള്‍ എന്നിവയുടെ ഉപയോഗവും ചില സ്ത്രീകളില്‍ അമിതമായ മുടികൊഴിച്ചിലിനും അതുവഴി കഷണ്ടിക്കും ഇട വരുത്തുന്നുണ്ട്. മുടിയില്‍ ഉപയോഗിക്കുന്ന ഷാംപൂ, മറ്റു ക്രീമുകള്‍ എന്നിവയും ചിലപ്പോള്‍ മുടി കൊഴിച്ചിലിന് കാരണമാകും.

പോഷകാഹാരക്കുറവും മുടികൊഴിച്ചിലിന് ഇട വരുത്തുന്ന മറ്റു ചില കാരണമങ്ങളാണ്. മുടിയുടെ വളര്‍ച്ചക്ക് പോഷകങ്ങള്‍ അത്യാവശ്യമാണ്. പോഷകാഹാരക്കുറവ് കാരണമുള്ള മുടികൊഴിച്ചില്‍ പരിഹരിക്കാവുന്നതേയുള്ളൂ.

താരന്‍ പോലുള്ള പ്രശ്‌നങ്ങള്‍ മുടികൊഴിച്ചിലിനും ഗുരുതരമായാല്‍ കഷണ്ടിക്കും വരെ വഴി വയ്ക്കും. എന്നാല്‍ ഇത്തരം പ്രശ്‌നങ്ങളും പരിഹാരമുള്ളവ തന്നെയാണ്.