എണ്ണമയവും താരന്‍ വരുത്തും

തലയോട് മാന്തുമ്പോള്‍ വെളുത്ത നിറത്തിലുള്ള ഒരു പേസ്റ്റ് നഖത്തിനുള്ളില്‍ വരുന്നുണ്ടോയെന്ന് നോക്കണം. ഇതാണ് എണ്ണമയമുള്ള താരന്‍ തിരിച്ചറിയാനുള്ള മാര്‍ഗം. സെബോറിക് ഡെര്‍മാറ്റൈറ്റിസ് എന്നാണ് ഈ താരന്റെ പേര്. ശിരോചര്‍മം കൂടുതല്‍ എണ്ണ ഉല്‍പാദിപ്പിക്കുമ്പോഴാണ് ഇത്തരം രോഗമുണ്ടാകുന്നത്.

ഇത്തരം താരന് കാരണം പാരമ്പര്യമാകാം. പൊടി, ടെന്‍ഷന്‍, അമിതവണ്ണം തുടങ്ങിയ കാരണങ്ങളുമാകാം. എയ്ഡ്‌സ്, പാര്‍ക്കിന്‍സണ്‍സ് രോഗം എന്നിവയുടെ ലക്ഷണങ്ങളുമാകാം. വെറും താരന്‍ എന്നു പറഞ്ഞ് തള്ളിക്കളയാനാവില്ലെന്നര്‍ത്ഥം.

അസുഖലക്ഷണങ്ങളല്ലെങ്കില്‍ ഇത്തരം താരന് വീട്ടില്‍ തന്നെ ചെയ്യാവുന്ന പരിഹാരമാര്‍ഗങ്ങളുമുണ്ട്.

ടീ ട്രീ ഓയില്‍, വിനെഗര്‍, വെളുത്തുള്ളി അരച്ചത്, ആര്യവേപ്പില അരച്ചത് എന്നിവ തലയില്‍ തേക്കുന്നത് ഇതിനുള്ള പരിഹാരമാര്‍ഗങ്ങളാണ്.

വെളിച്ചെണ്ണ, ആവണക്കെണ്ണ എന്നിവ കൊണ്ട് മസാജ് ചെയ്ത് തല ചൂടുവെള്ളത്തില്‍ കഴുകുന്നതും ഗുണം ചെയ്യും.

ചെമ്പരത്തി താളി, കറ്റാര്‍വാഴ എന്നിവ തലയോട്ടിയിലെ എണ്ണമയം നീക്കും. കറ്റാര്‍ വാഴ അരച്ചതില്‍ നാരങ്ങാനീര് ചേര്‍ത്താല്‍ കൂടുതല്‍ നല്ലത്.

ആപ്പിള്‍ സിഡാര്‍ വിനെഗറും നല്ലതാണ്. ഇത് തലയില്‍ തേച്ചു മസാജ് ചെയ്ത് കഴുകിക്കളയാം.

തലയില്‍ ഹെന്ന ചെയ്യുന്നതും ഷിക്കാക്കായ് പൊടി തേച്ചുകുളിക്കുന്നതും ഗുണം ചെയ്യും.

സാലിസൈക്ലിക് ആസിഡ്, സെലീനിയം സള്‍ഫൈഡ് എന്നിവയങ്ങിയ ഷാംപൂ ഇത്തരം താരന്‍ മാറാന്‍ നല്ലതാണ്.