മുടികൊഴിച്ചിലിന് എളുപ്പം പരിഹാരം

Hair Care

oi-Saritha

By Veena

Published: Monday, January 30, 2012, 13:49 [IST]

മുടി കൊഴിച്ചില്‍ കൊണ്ട് ബുദ്ധിമുട്ടുന്നവര്‍ ധാരാളം. പ്രതിവിധികള്‍ പലതുണ്ടെങ്കിലും അതൊന്നും ഫലിക്കണമെന്നില്ല. മാത്രമല്ലാ, പല പ്രതിവിധികളും ധാരാളം സമയമെടുക്കുന്നതുമായിരിക്കും.

മുടി കൊഴിച്ചിലിന് ആദ്യം കാരണം കണ്ടെത്തുകയാണ് വേണ്ടത്. ഇതനുസരിച്ചായിരിക്കും പരിഹാരവും ചെയ്യേണ്ടത്.

ബ്യൂട്ടി പാര്‍ലറില്‍ പോകാതെ തന്നെ മുടികൊഴിയുന്നതിന് ചെയ്യാവുന്ന ചില ലളിതമായ പ്രതിവിധികളുമുണ്ട്. വീട്ടില്‍ തന്നെ അല്‍പമൊന്ന് ശ്രദ്ധ വച്ചാല്‍ ചെയ്യാവുന്ന ചില കാര്യങ്ങള്‍.

മുടി കൊഴിച്ചിലിന് ഏറ്റവും ഫലപ്രദമായ മാര്‍ഗം ഹോട്ട് ഓയില്‍ മസാജ് തന്നെയാണ്. ഇളം ചൂടുള്ള വെളിച്ചെണ്ണ തലയോടില്‍ തിരുമ്മി പിടിപ്പിക്കുന്നത് രക്തപ്രവാഹം വര്‍ദ്ധിപ്പിക്കുകയും മുടികൊഴിച്ചില്‍ കുറയ്ക്കാന്‍ സഹായിക്കുകയും ചെയ്യും. അരമണിക്കൂറെങ്കിലും കഴിഞ്ഞ ശേഷമെ ഇത് കഴുകിക്കളയാന്‍ പാടൂ. ഒലീവ് ഓയില്‍, വെളിച്ചെണ്ണ, ബദാം ഓയില്‍ എന്നിവ കൂട്ടിച്ചേര്‍ത്ത് ഉപയോഗിക്കുന്നത് നല്ലതാണ്. ആയുര്‍വേദ എണ്ണകള്‍ ഉപയോഗിക്കുന്നവര്‍ക്ക് അതുമാകാം.

തലയോടില്‍ മസാജ് ചെയ്യുന്നതും മുടികൊഴിച്ചില്‍ കുറയ്ക്കും. ഇത് രക്തപ്രവാഹം വര്‍ദ്ധിപ്പിക്കുകയാണ് ചെയ്യുന്നത്. ഇളംചൂടുള്ള വെളിച്ചെണ്ണ പുരട്ടി മസാജ് ചെയ്യുന്നത് കൂടുതല്‍ ഗുണം ചെയ്യും.

തലയോടില്‍ വെളുത്തുളളി, ഉള്ളി, ഇഞ്ചി എന്നിവയുടെ നീര് പുരട്ടുന്നതും നല്ലതാണ്. ഇത് രാത്രി മുഴുവന്‍ തലയില്‍ ഇരിയ്ക്കുകയും വേണം. ഇവയുടെ ഗന്ധം സഹിക്കാന്‍ ബുദ്ധിമുട്ടാണെങ്കിലും മുടികൊഴിച്ചില്‍ തടയാന്‍ പറ്റിയ നല്ലൊരു മാര്‍ഗമാണിത്.

ഗ്രീന്‍ ടീ ബാഗ് വെള്ളത്തില്‍ മുക്കി നനച്ച് തേയില മിശ്രിതം തലയോടില്‍ തേക്കുന്നത് നല്ലതാണ്. ഇത് അരമണിക്കൂര്‍ കഴിഞ്ഞ് കഴുകിക്കളയാം. ഗ്രീന്‍ ടീയിലെ ആന്റി ഓക്‌സിഡന്റുകള്‍ മുടികൊഴിച്ചിലിനെ തടയുന്നു.

പോഷകക്കുറവു മൂലമുള്ള മുടികൊഴിച്ചിലിന് നല്ല ഭക്ഷണങ്ങള്‍ കഴിയ്ക്കുകയാണ് പരിഹാരം.

മുടി കൊഴിച്ചില്‍ തടയാന്‍ യോഗയും സഹായിക്കും. ടെന്‍ഷനും സ്‌ട്രെസും മുടി കൊഴിച്ചിലിന് കാരണമാകുന്നതു കൊണ്ടാണിത്.