മുടിവരള്‍ച്ച മാറ്റാന്‍ പ്രകൃതിദത്ത കണ്ടീഷണറുകള്‍

Hair Care

oi-Saritha

By Veena

Published: Thursday, December 15, 2011, 14:28 [IST]

മഞ്ഞുകാലത്ത് ചര്‍മം മാത്രമല്ലാ, മുടിയും വരണ്ടതാകും. ഇത് മുടി കൊഴിയാനും താരന്‍ പോലുള്ള പ്രശ്‌നങ്ങള്‍ക്കും കാരണമാകുകയും ചെയ്യും. ഓയില്‍ മസാജ് ഒരു പരിധി വരെ പ്രശ്‌നപരിഹാരമാകുമെങ്കിലും പ്രശ്‌നം പൂര്‍ണമായും പരിഹരിക്കപ്പെട്ടെന്നു വരില്ല. പ്രകൃതി ദത്തമായ ചില കണ്ടീഷണറുകള്‍ ഉപയോഗിച്ചാല്‍ മുടിയുടെ വരള്‍ച്ച കുറയും. ഇവ തികച്ചും പ്രകൃതിദത്ത മാര്‍ഗങ്ങളിലൂടെ വീട്ടില്‍ തന്നെ ഉണ്ടാക്കാന്‍ സാധിക്കുമെന്നതാണ് ഗുണം.

തൈര് മുടിസംരക്ഷണത്തില്‍ ഒന്നാമനാണ്. ഉലുവ വെള്ളത്തില്‍ കുതിര്‍ത്ത് അരച്ച് തൈരില്‍ ചേര്‍ത്ത് മുടിയില്‍ തേക്കാം. ഒരു മണിക്കൂറിന് ശേഷം വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയാം. താരന്‍ അകറ്റാനും മുടിക്ക് തിളക്കം വര്‍ദ്ധിക്കാനുമുള്ള ഒരു മാര്‍ഗമാണ് ഇത്.

ചെമ്പരത്തിയുടെ പൂവും ഇലയും പ്രകൃതിദത്ത കണ്ടീഷണറാണ്. ഇവ അരച്ച് താളിയാക്കി കുളിക്കുമ്പോള്‍ മുടിയില്‍ തേക്കുന്നത് നല്ലതാണ്.

ബട്ടര്‍ ഫ്രൂട്ടിന്റെ പള്‍പ്പ് നാരങ്ങാനീരും ഏതെങ്കിലും എണ്ണയുമായും കൂട്ടിച്ചേര്‍ത്ത് തലയില്‍ തേക്കാം. ഇത് പ്രകൃതിദത്ത കണ്ടീഷണറിന്റെ ഗുണം നല്‍കും. കളര്‍ ചെയ്ത മുടിയുടെ പ്രശ്‌നങ്ങള്‍ തീര്‍ക്കാനുള്ള നല്ലൊന്നാന്തരം പരിഹാരം കൂടിയാണിത്.

മഞ്ഞള്‍, കറിവേപ്പില, മയിലാഞ്ചിയില എന്നിവ ഉണക്കിപ്പൊടിച്ച് എള്ളെണ്ണയില്‍ ചേര്‍ത്ത് മുടിയില്‍ തേക്കുന്നത് താരന്‍ അകറ്റുകയും മുടിക്ക് കൂടുതല്‍ കരുത്തു നല്‍കുകയും ചെയ്യും.

കറ്റാര്‍ വാഴയുടെ നീര് തലയില്‍ തേക്കുന്നത് നല്ല കണ്ടീഷറാണ്. മുടിയുടെ വരള്‍ച്ച മാറ്റാന്‍ ഇതിന് സാധിക്കും.