മുടിക്കു നല്‍കാം വര്‍ണഭംഗി

മുടിക്ക് ശരിയായ രീതിയില്‍ നിറം നല്‍കുന്നത് നല്ലതാണെന്നാണ് ഇപ്പോഴത്തെ കണ്ടെത്തല്‍. എന്നാല്‍ നിറം നല്‍കാന്‍ ഉപയോഗിക്കുന്നത് നല്ല ഉല്‍പന്നമായിരിക്കണം. നിലവാരം കുറഞ്ഞ കളറുകള്‍ ഉപയോഗിച്ചാല്‍ മുടിയുടെ ആരോഗ്യത്തെ ഇത് ബാധിക്കും. നിറം കൊടുത്താല്‍ മുടിക്ക് കൂടുതല്‍ കരുത്തുണ്ടാകും. മാത്രമല്ലാ, ചൂടില്‍ നിന്നും പൊടിയില്‍ നിന്നും ഒരു പരിധി വരെ ഇത് മുടിയെ സംരക്ഷിക്കുകയും ചെയ്യും.

നിറം നല്‍കുമ്പോള്‍ ശ്രദ്ധിക്കേണ്ട പല കാര്യങ്ങളുമുണ്ട്. എല്ലാവര്‍ക്കും മുടി കളര്‍ ചെയ്യുന്നത് ചേര്‍ന്നെന്നു വരില്ല. മുടിയുടെ സ്വഭാവമനുസരിച്ച് കൊടുക്കേണ്ട കളറുകളും വ്യത്യാസപ്പെട്ടിരിക്കും. ഇതിന് കേശാലങ്കാര വിദഗ്ധന്റെ അഭിപ്രായം നേടുന്നത് നന്നായിരിക്കും.

നീളമുള്ള കോലന്‍ മുടിക്ക് ചേരുക കറുപ്പോ ചുവപ്പോ നിറങ്ങളായിരിക്കും.

സ്‌പൈസ്, സ്റ്റെപ്പ് ആയി മുറിച്ചിരിക്കുന്ന മുടിക്ക് ബര്‍ഗണ്ടി കളര്‍ കൂടുതല്‍ ചാരുത പകരും. ഈ നിറം നല്‍കിയാല്‍ മുടിക്ക് കൂടുതല്‍ മിനുസം അനുഭവപ്പെടും.

മുഴുവന്‍ മുടിയിലല്ലാതെ മുന്‍ഭാഗത്തു മാത്രമോ ചില മുടിയിഴകളില്‍ മാത്രമോ നിറം നല്‍കുന്ന രീതിയും നിലവിലുണ്ട്. രണ്ടു തരം നിറങ്ങളും മുടിക്കു നല്‍കി വരുന്നുണ്ട്.

മുടിയില്‍ പലരും ഹെന്ന (മയിലാഞ്ചി) ചെയ്യാറുണ്ട്. ഇത് മുടിയുടെ ആരോഗ്യത്തിന് നല്ലതാണെങ്കിലും നിറം നല്‍കിയ മുടിയില്‍ ഹെന്ന ചെയ്യാതിരിക്കുകയാണ് നല്ലത്. ഇത് മുടി കൂടുതല്‍ വരണ്ടതാക്കും.

മുടിക്ക് നിറം നല്‍കിക്കഴിഞ്ഞാലും മുടിസംരക്ഷത്തില്‍ ഏറെ ശ്രദ്ധിക്കണം. ഒലീവെണ്ണ, ബദാം എണ്ണ തുടങ്ങിയവ അടങ്ങിയിട്ടുള്ള ഉല്‍പന്നങ്ങള്‍ മുടിയിലുപയോഗിക്കുന്നത് നല്ലതാണ്.