മുടിത്തുമ്പ് പിളരാതിരിക്കാന്‍ ചില പൊടിക്കൈകള്‍

മുടിയുടെ തുമ്പ് പിളരുന്നത് മിക്കവാറും സ്ത്രീകള്‍ നേരിടുന്ന പ്രശ്‌നമാണ്. മുടിയുടെ ഭംഗിയും ഗുണവും നശിപ്പിക്കുന്ന ഒന്നാണിത്. തുമ്പ് മുറിച്ചുകളയുകയാണ് പലരും ഇതിന് പരിഹാരമായി ചെയ്യാറുള്ളത്.

മുടി അശ്രദ്ധമായി ചീകുന്നതാണ് പലപ്പോഴും മുടിത്തുമ്പ് പിളരാന്‍ ഇടയാക്കുന്നത്. മുടി കെട്ടുപിടിക്കുമ്പോള്‍ ചീപ്പുപയോഗിച്ച് ബലമായി വലിയ്ക്കുന്നത് ജടയുണ്ടാക്കും. ഇത് മിക്കപ്പോഴും മുടിത്തുമ്പ് പിളരാന്‍ ഇടയാക്കുകയും ചെയ്യും. നനഞ്ഞ മുടി ചീകുന്നത് ജട പിടിക്കാനുള്ള സാധ്യത വര്‍ദ്ധിപ്പിക്കും. അതുകൊണ്ട് മുടി ചീകുമ്പോള്‍ മൃദുവായി തിരക്കു കൂട്ടാതെ ചീകുക. ഈറന്‍ മുടി ചീകരുത്.

രാസവസ്തുക്കളടങ്ങിയ ഷാംപൂവും കണ്ടീഷണറും മുടി പിളരാനും കൊഴിയാനും ഇടയാക്കും. കഴിവതും പ്രകൃതിദത്ത മാര്‍ഗങ്ങള്‍ ഉപയോഗിക്കുക. പിളര്‍ന്ന അറ്റത്തിന് മുട്ട നല്ലൊരു പരിഹാരമാണ്. ഇത് നല്ല കണ്ടീഷണറിന്റെ ഗുണം ചെയ്യുന്നുണ്ട്.

മുടി ഉണക്കാന്‍ ഹെയര്‍ ഡ്രയര്‍ ഉപയോഗിക്കുന്നതും മുടി പിളരുവാന്‍ ഇടയാക്കും. ഡ്രയറില്‍ നിന്നുളള കാറ്റ് നേരിട്ട് മുടിയില്‍ ഏല്‍ക്കുന്നത് നല്ലതല്ല. കഴിവുതും സാധാരണ കാറ്റേറ്റ് മുടിയുണങ്ങട്ടെ.

മുടിയില്‍ മെറ്റല്‍ ബാന്റുകളും റബ്ബര്‍ബാന്റുകളും ഉപയോഗിക്കരുത്. ഇത് മുടി പൊട്ടുവാന്‍ ഇടയാക്കുന്നു. മുടിയിലിടാവുന്ന ക്ലിപ്പുകളാണ് നല്ല മാര്‍ഗം.

ഭക്ഷണവും മുടിയുടെ ആരോഗ്യവും പരസ്പരം ബന്ധപ്പെട്ടിരിക്കുന്നു. ഫോളിക് ആസിഡ്, ബയോട്ടിന്‍, വൈറ്റമിന്‍ ബി തുടങ്ങിയവ മുടിവളര്‍ച്ചയെയും ആരോഗ്യത്തെയും സഹായിക്കുകയും മുടി പൊട്ടുന്നത് തടയുകയും ചെയ്യുന്നു. ഇലക്കറികളും മുടിയുടെ ആരോഗ്യത്തിന് നല്ലതാണ്.