പുരുഷന്മാരുടെ പാദ സംരക്ഷണം

1. വൃത്തി

പതിവായി ചെയ്യേണ്ടുന്ന ഒരു കാര്യമാണ് പാദങ്ങള്‍ വൃത്തിയാക്കല്‍. ദിവസവും കുളിക്കുമ്പോഴല്ലാതെ തന്നെ പാദങ്ങള്‍ കഴുകി വൃത്തിയാക്ക​ണം. പാദങ്ങള്‍ ശ്രദ്ധയോടെ കഴുകുകയും വിരലുകള്‍ക്കിടയിലെ ഇടുങ്ങിയ ഭാഗങ്ങള്‍ വൃത്തിയാക്കുകയും ചെയ്യണം. അതുപോലെ നഖത്തിന്‍റെ അടിഭാഗത്തെ ചളിയും നീക്കി വൃത്തിയാക്കാന്‍ ശ്രദ്ധിക്കണം.

2. പാദസംരക്ഷണം

സ്ത്രീകളുടെ വിഷയമെന്ന് തോന്നാമെങ്കിലും പുരുഷന്മാരും പതിവായി പാദസംരക്ഷണത്തിനുള്ള കാര്യങ്ങള്‍ ചെയ്യേണ്ടതുണ്ട്. ഒരു സ്ക്രബ് ഉപയോഗിച്ച് പാദങ്ങള്‍ ഉരസി മൃതകോശങ്ങള്‍ നീക്കം ചെയ്യണം. നഖങ്ങള്‍ വെട്ടി നിര്‍ത്തണം. നഖങ്ങളുടെ അരികുകള്‍ മയപ്പെടുത്താനായി ക്യുട്ടിക്കിള്‍ ഓയില്‍ ഉപയോഗിക്കാം.

3. മോയ്സചറൈസര്‍

കുളിക്ക് ശേഷം പാദങ്ങള്‍ മോയ്ചറൈസ് ചെയ്യണം. ഇത് വഴി ഉണങ്ങിയ പാദങ്ങള്‍ക്ക് നനവ് വീണ്ടുകിട്ടും. മറ്റൊന്ന് കിടക്കാന്‍ പോകുന്നതിന് മുമ്പായി ഏതെങ്കിലും ലോഷനോ, പെട്രോളിയം ജെല്ലിയോ പാദങ്ങളില്‍ തേച്ച് ഒരു സോക്സും ധരിക്കുകയെന്നതാണ്.

4. ചെരുപ്പ്

ഷൂപോലെ പാദങ്ങള്‍ മൂടിനില്‍ക്കുന്ന ചെരുപ്പുകള്‍ ഉപയോഗിക്കുക. ഇത് പാദങ്ങളിലെ നനവ് നഷ്ടമാകുന്നത് തടയുകയും, ചൂടുള്ളതും മൃദുലവുമാക്കി നിലനിര്‍ത്തുകയും ചെയ്യും. വൃത്തിയുള്ള സോക്സും ഷൂസും ധരിക്കാന്‍ പ്രത്യേക ശ്രദ്ധ വേണം. അല്ലെങ്കില്‍ അണുബാധയ്ക്കും, ദുര്‍ഗന്ധത്തിനും കാരണമാകും.

5. മസാജ്

നിങ്ങളുടെ ഭാരമടക്കം വഹിക്കുന്നതാണ് പാദങ്ങള്‍. അതിനാല്‍‌ തന്നെ പാദങ്ങള്‍ മസാജ് ചെയ്യുന്നത് നല്ലതാണ്. പാദത്തില്‍ അവസാനിക്കുന്ന നിരവധി ഞരമ്പുകള്‍ ശരീരത്തിലുണ്ട്. അതിനാല്‍ പാദങ്ങളില്‍ മസാജ് ചെയ്യുന്നത് ഏറെ സുഖം നല്കും.