സൗന്ദര്യസംരക്ഷണത്തിന് കടുകെണ്ണ

കടുകെണ്ണ പലയിടങ്ങളിലും പാചകത്തിന് ഉപയോഗിക്കുന്നുണ്ട്. ഇതിന് ധാരാളം ആരോഗ്യഗുണങ്ങളുമുണ്ട്. എന്നാല്‍ ഇത് ശരീര സംരക്ഷണത്തിനും വളരെ നല്ലതാണ്. ചര്‍മത്തിനും മുടിയ്ക്കും ഒരുപോലെ ഗുണപ്രദം.

കടുകെണ്ണ ശരീരം മസാജ് ചെയ്യാന്‍ ഉപയോഗിക്കാറുണ്ട്. ഇത് നല്ലൊരു ക്ലെന്‍സറിന്റെ ഗുണമാണ് നല്‍കുന്നത്. ആഴ്ചയില്‍ രണ്ടു ദിവസമെങ്കിലും കടുകെണ്ണ കൊണ്ട് ശരീരം മസാജ് ചെയ്യുന്നത് ശരീരത്തിലെ അഴുക്കുകള്‍ നീക്കം ചെയ്യാന്‍ സഹായിക്കും. ഇതിനൊപ്പം മറ്റ് സാധനങ്ങളൊന്നും തന്നെ ഉപയോഗിക്കേണ്ടതില്ല.

ശരീരവേദന കുറയ്ക്കാനും തണുപ്പു കാലത്ത് ശരീരത്തിന് ചൂടു നല്‍കാനും കടുകെണ്ണ നല്ലൊരു മരുന്നാണ്.

കൊഴുപ്പുള്ള എണ്ണയായതു കൊണ്ട് നല്ലൊന്നാന്തരം മോയിസ്ചറൈസര്‍ കൂടിയാണ് ഇതെന്നു പറയാം. ചര്‍മത്തിലെ ഈര്‍പ്പം നിലനിര്‍ത്താന്‍ ഇത് സഹായിക്കും. തനിയെ ഇത് ഉപയോഗിക്കാന്‍ ബുദ്ധിമുട്ടുണ്ടെങ്കില്‍ ഫേസ് പാക്കിലോ മറ്റോ ചേര്‍ത്ത് ഉപയോഗിക്കാം. ഇതുപയോഗിച്ച് മുഖത്ത് അല്‍പനേരം മസാജ് ചെയ്യാം.

കടുകെണ്ണ അല്‍പം കടലമാവും നാരങ്ങാനീരുമായി ചേര്‍ത്ത് പുരട്ടുന്നത് തിളങ്ങുന്ന ചര്‍മം നല്‍കും. ഈ മിശ്രിതം മുഖത്തു പുരട്ടി പത്തു പതിനഞ്ച് മിനിറ്റു കഴിയുമ്പോള്‍ കഴുകിക്കളയാം. മുഖത്തെ ടാന്‍, കറുത്ത കുത്തുകള്‍ എന്നിവ മാറിക്കിട്ടും. ആഴ്ചയില്‍ രണ്ടോ മൂന്നോ തവണ ഇതു ചെയ്യാം.

കടുകെണ്ണ മുടി സമൃദ്ധമായി വളരാനും മുടി നരയ്ക്കാതിരിക്കാനും നല്ലതാണ്. ഇളം ചൂടുള്ള കടുകെണ്ണ തലയില്‍ മസാജ് ചെയ്താല്‍ തല തണുത്തു കിട്ടും. റിലാക്‌സ് ചെയ്യാന്‍ പറ്റിയ നല്ലൊരു വഴിയാണിത്.