വിയര്‍പ്പുനാറ്റം പോകാന്‍ സിംപിള്‍ സൂത്രങ്ങള്‍

വേനല്‍ക്കാലത്തെ പ്രധാന പ്രശ്‌നങ്ങളിലൊന്നാണ് വിയര്‍പ്പുനാറ്റം. അവനവനും മറ്റുള്ളവര്‍ക്കും ഒരുപോലെ ബുദ്ധിമുട്ടുണ്ടാകകുന്ന പ്രശ്‌നം. ഈ പ്രശ്‌നത്തിന് നമ്മെക്കൊണ്ടാവുന്ന പരിഹാരങ്ങള്‍ ചെയ്യാം.

ആദ്യമെ വേണ്ടത് കോട്ടന്‍ വസ്ത്രങ്ങള്‍ തെരഞ്ഞെടുക്കുകയെന്നതാണ്. അല്‍പം അയഞ്ഞ വസ്ത്രങ്ങളാണെങ്കില്‍ കൂടുതല്‍ നല്ലത്.

വിയര്‍ക്കുന്ന ശീലമുണ്ടെങ്കില്‍ ഒരു പ്രാവശ്യം ധരിച്ച ശേഷം വസ്ത്രങ്ങള്‍ കഴുകുന്നതാണ് നല്ലത്. പ്രത്യേകിച്ച് ടോപ്പുകളും ഷര്‍ട്ടുകളും. കഴുകുന്നത് സുഗന്ധമുള്ള ഡിറ്റെര്‍ജന്റു കൊണ്ടാണെങ്കില്‍ നല്ലത്. കഴുകിയ തുണികള്‍ നല്ല വെയിലിലിട്ട് ഉണക്കിയെടുത്താല്‍ വിയര്‍പ്പുമണം പോകും.

കുളിയ്ക്കുന്ന വെള്ളത്തില്‍ ചന്ദനത്തൈലം, പനിനീര്, ലാവെന്‍ഡര്‍ ഓയില്‍ എന്നിവയിലേതെങ്കിലും ഒന്നുരണ്ടു തുള്ളി ഒഴിയ്ക്കുന്നത് നല്ലതായിരിക്കും. കുളി കഴിഞ്ഞ് കസ്തൂരിത്തൈലം പുരട്ടുന്നതും നല്ലതാണ്. ദിവസം നീണ്ടുനില്‍ക്കുന്ന നല്ല സുഗന്ധം ലഭിക്കും. ഡിയോഡറന്റുകള്‍ ഈ ഗുണം തരില്ല.

സ്‌പ്രെ, ഡിയോഡറന്റ് എന്നിവയാണ് മറ്റൊരു മാര്‍ഗം. അല്‍പസമയത്തേക്കെങ്കിലും ഇവ രക്ഷ നല്‍കും. കഴുത്ത്, കക്ഷം എന്നിങ്ങനെ വിയര്‍പ്പ് കൂടുതല്‍ വരാന്‍ സാധ്യതയുള്ള ഭാഗങ്ങളില്‍ നല്ല മണമുള്ള പൗഡര്‍ ഇടുന്നതും നല്ലതാണ്.

തണുത്ത വെള്ളത്തിലോ ഇളംചൂടുവെള്ളത്തിലോ കുളിയ്ക്കുക. വെള്ളത്തില്‍ അല്‍പം ചെറുനാരങ്ങാനീര് ചേര്‍ക്കുന്നതും നല്ലതാണ്.