ചര്‍മസംരക്ഷണത്തിന് തൈര്

കുറച്ചു തൈരില്‍ പൊടിച്ച പഞ്ചസാര, മഞ്ഞള്‍പ്പൊടി, കറ്റാര്‍വാഴയിലെ കൊഴുപ്പ് എന്നിവ ചേര്‍ത്ത് ഉപയോഗിക്കുന്നത് നല്ലതാണ്. പഞ്ചസാര സ്‌ക്രബറിന്റെയും മഞ്ഞള്‍ മരുന്നിന്റെയും ഗുണം നല്‍കുന്നു. കറ്റാര്‍ വാഴ ചര്‍മത്തിലെ ഈര്‍പം നിലനിര്‍ത്തുകയും ചര്‍മത്തിന് മിനുസമേകുകയും ചെയ്യുന്നു. വേണമെങ്കില്‍ ഈ മിശ്രിതത്തില്‍ ഓട്‌സ് പൊടിച്ചതും ചേര്‍ക്കാം.

തൈരില്‍ മുള്‍ത്താണി മിട്ടി, പനിനീര്‍ എന്നിവ ചേര്‍ത്ത് ദേഹത്ത് തേക്കാം. ഇത് ശരീരത്തിന് മിനുസം നല്‍കും. കൈമുട്ട്, കാല്‍മുട്ട് എന്നിവിടങ്ങളിലെ ചര്‍മം മൃദുലമാക്കാന്‍ ഇത് നല്ലതാണ്.

തൈരിന്റെ കൂടെ ഏതെങ്കിലും എണ്ണ ചേര്‍ത്ത് കുളിക്കുന്നതിന് മുന്‍പ് ദേഹത്ത് പുരട്ടുന്നത് നല്ലതാണ്. ഇത് ചര്‍മത്തിലെ പാടുകളും കരുവാളിപ്പും അകറ്റുകയും ചര്‍മത്തിന് മിനുസം നല്‍കുകയും ചെയ്യും.

കാരറ്റ് ജ്യൂസ്, കുങ്കുമപ്പൂ, തേന്‍ എന്നിവ തൈരില്‍ ചേര്‍ത്ത് ബോഡി പായ്ക്ക് ഉണ്ടാക്കാം. ഇത് കുളിക്കുന്നതിന് മുന്‍പ് ദേഹത്തു പുരട്ടി ഉണങ്ങിയ ശേഷം കഴുകിക്കളയാം. ചര്‍മത്തിന് മിനുസവും തിളക്കവും ലഭിക്കും. വരള്‍ച്ച മാറുകയും ചെയ്യും.

ആഫ്റ്റര്‍ ഷേവ് ലോഷനായും തൈര് ഉപയോഗിക്കാം. ഇതില്‍ കുക്കുമ്പര്‍ ജ്യൂസ് ചേര്‍ത്ത് ഷേവ് ചെയ്ത ശേഷം മുഖത്തു പുരട്ടി കഴുകിക്കളയാം. മുറിവുകള്‍ ഉണങ്ങാനും നീറ്റല്‍ മാറാനും ഇത് നല്ലതാണ്.