കോരിച്ചൊരിയുന്ന മഴ ശരീരത്തിന് കേട്; മഴക്കാലത്ത് വര്‍ധിക്കുന്ന ചര്‍മ്മ അണുബാധകള്‍

Monsoon Skin Care Tips: മഴക്കാലം ഇങ്ങെത്തി. ഈ സീസണ്‍ വളരെയേറെ ഈര്‍പ്പം നിറഞ്ഞ ഒന്നാണ്. ആരോഗ്യത്തിന്റെ കാര്യത്തില്‍ വളരെയേറെ ശ്രദ്ധിക്കേണ്ട സമയമാണിത്. ഈ സമയത്ത് ബാക്ടീരിയയും ഫംഗസുമെല്ലാം എല്ലായിടത്തും വളരാന്‍ തുടങ്ങുന്നു. അതിനാല്‍ ചര്‍മ്മ അണുബാധകളുടെയും സാധ്യത വര്‍ദ്ധിക്കുന്നു. മഴക്കാലത്ത് ചര്‍മ്മ അണുബാധ ഒരു സാധാരണ പ്രശ്‌നമാണ്. അതിനാല്‍ ഈ കാലയളവില്‍ നിങ്ങള്‍ ഇത് കഴിയുന്നത്ര ശ്രദ്ധിക്കുക.

മഴക്കാലത്ത് പലതരത്തിലുള്ള ചര്‍മ്മ അണുബാധകള്‍ ഉണ്ടാകാനുള്ള സാധ്യതയുണ്ട്, അതില്‍ ഏറ്റവും സാധാരണമായത് ചൊറിച്ചിലാണ്. ഇതുകൂടാതെ, മറ്റ് ചില തരത്തിലുള്ള അണുബാധകളും ഉണ്ടാകാനുള്ള സാധ്യതയുണ്ട്. മഴക്കാലത്ത് വരുന്ന ചില ചര്‍മ്മ സംബന്ധമായ പ്രശ്‌നങ്ങളും അത് തടയാനുള്ള വഴികളും ഈ ലേഖനത്തില്‍ നിങ്ങള്‍ക്ക് വായിച്ചറിയാം.

അത്‌ലറ്റ്‌സ് ഫൂട്ട്

അത്ലറ്റ്‌സ് ഫൂട്ട് അണുബാധ ടിനിയ പീഡിയാസ് എന്നും അറിയപ്പെടുന്നു. ഇത് ഒരു ഫംഗസ് അണുബാധയാണ്. ഇത് പാദങ്ങളുടെ ചര്‍മ്മത്തെ ബാധിക്കുകയും കാല്‍വിരലിലെ നഖങ്ങളിലേക്ക് അതിവേഗം പടരുകയും ചെയ്യുന്നു. നിരന്തരമായ ചൊറിച്ചില്‍, കുത്തുന്ന പോലെ തോന്നല്‍, കുമിളകള്‍, വിണ്ടുകീറിയ പാദം, വളഞ്ഞ കാല്‍വിരലുകള്‍ എന്നിവയാണ് ഇതിന്റെ ലക്ഷണങ്ങള്‍.

റിംഗ് വേം

മഴക്കാലത്തെ ഏറ്റവും സാധാരണമായ അണുബാധകളില്‍ ഒന്നാണ് റിംഗ് വേം. സാധാരണ ഫംഗസ് പോലുള്ള പരാന്നഭോജികള്‍ മൂലമുണ്ടാകുന്ന അതിവേഗം പടരുന്ന ഫംഗസ് അണുബാധയാണിത്. ചര്‍മ്മത്തിന്റെ പുറം പാളിയിലെ കോശങ്ങളിലാണ് റിംഗ് വേം വരുന്നത്. റിംഗ്വേം ചര്‍മ്മത്തില്‍ വൃത്താകൃതിയിലുള്ളതും ചെതുമ്പലും ഉള്ള പാടുകള്‍ ഉണ്ടാക്കുന്നു. ഇത് തുടര്‍ച്ചയായ ചൊറിച്ചിലിന് കാരണമാകുകയും കുമിളകള്‍ പോലെയുള്ള മുറിവുകള്‍ ഉണ്ടാക്കുകയും ചെയ്യുന്നു.

ഇന്റര്‍ട്രിഗോ

ചര്‍മ്മത്തിന്റെ പാളികളില്‍ സാധാരണയായി രൂപം കൊള്ളുന്ന ഒരു കോശജ്വലന അവസ്ഥയാണ് ഇന്റര്‍ട്രിഗോ അല്ലെങ്കില്‍ ഇന്റര്‍ട്രിജിനസ് ഡെര്‍മറ്റൈറ്റിസ്. ചൂട്, ഈര്‍പ്പം, ചര്‍മ്മം ഉരസല്‍ എന്നിവ കാരണം ഈ പ്രശ്‌നം കൂടുതലായി വഷളാകുന്നു. ചൊറിച്ചില്‍, തൊലി മടക്കുകളില്‍ കുത്തുന്ന വേദന, ദുര്‍ഗന്ധം, നീര് തുടങ്ങിയവയാണ് ഇതിന്റെ ലക്ഷണങ്ങള്‍.

ഫംഗസ് രോഗം (ടിനിയ കാപ്പിറ്റിസ്)

ഹെര്‍പ്പസ് ടോണ്‍സുറന്‍സ് അണുബാധ എന്നും ഇത് അറിയപ്പെടുന്നു. ഇത് മൈക്രോസ്‌പോറം, ട്രൈക്കോഫൈറ്റണ്‍ തുടങ്ങിയ ഡെര്‍മറ്റോഫൈറ്റ് സ്പീഷിസുകളാല്‍ സംഭവിക്കുന്നു. കഷണ്ടി പാടുകള്‍, നരച്ച രോമം, ചര്‍മ്മത്തിന് ചുറ്റുമുള്ള വീക്കം, ചൊറിച്ചില്‍, വേദനാജനകമായ വ്രണങ്ങള്‍ തുടങ്ങിയവയാണ് ഇതിന്റെ ലക്ഷണങ്ങള്‍.

യീസ്റ്റ് അണുബാധ

യീസ്റ്റ് അണുബാധ സാധാരണയായി ചര്‍മ്മത്തിന്റെ പുറം പാളിയില്‍ സംഭവിക്കുന്നു. ഈര്‍പ്പമുള്ളതും മോശമായി വായുസഞ്ചാരമുള്ളതുമായ പ്രദേശങ്ങളില്‍ താമസിക്കുന്നവരിലാണ് ഇത് കൂടുതലായി കണ്ടുവരുന്നത്. നിതംബത്തിന്റെ മടക്കുകളെയോ സ്തനങ്ങള്‍ക്ക് താഴെയുള്ള ഭാഗത്തെയോ യീസ്റ്റ് അണുബാധ പെട്ടെന്ന് ബാധിക്കുന്നു. ചുണങ്ങ്, ചൊറിച്ചില്‍, കുരുക്കള്‍ തുടങ്ങിയവയാണ് ഇതിന്റെ ലക്ഷണങ്ങള്‍.

ചര്‍മ്മത്തിന്റെ തരവും അവസ്ഥയും മഴക്കാലത്ത് പെട്ടെന്ന് ചര്‍മ്മ അണുബാധകള്‍ക്ക് കാരണമാകുന്നു. മണ്‍സൂണിന്റെ ദോഷകരമായ ഫലങ്ങളില്‍ നിന്ന് നിങ്ങളുടെ ചര്‍മ്മത്തെ സംരക്ഷിക്കാന്‍ നിങ്ങള്‍ ഈ കാര്യങ്ങള്‍ ശ്രദ്ധിക്കണം.

ഭക്ഷണക്രമത്തില്‍ പ്രത്യേക ശ്രദ്ധ

ചര്‍മ്മപ്രശ്നങ്ങള്‍ തടയാന്‍ ആന്റിഓക്സിഡന്റുകള്‍ അടങ്ങിയ ഭക്ഷണങ്ങള്‍ നിങ്ങളെ സഹായിക്കുന്നു. ഈ കാലയളവില്‍, സീസണല്‍ പഴങ്ങളും പച്ചക്കറികളും ധാരാളം കഴിക്കുക. ലസ്സിയോ നാരങ്ങാവെള്ളമോ തേങ്ങാവെള്ളമോ കുടിക്കുന്നത് ശരീരത്തെ തണുപ്പിക്കും. ഉയര്‍ന്ന പ്രോട്ടീനും കുറഞ്ഞ കാര്‍ബോഹൈഡ്രേറ്റ് ഭക്ഷണങ്ങളും കഴിക്കുന്നത് ചര്‍മ്മത്തെ സംരക്ഷിക്കും. ഇത് മുടിയെ ശക്തിപ്പെടുത്തുകയും മുഖക്കുരു പോലുള്ള ചര്‍മ്മ സംബന്ധമായ പ്രശ്‌നങ്ങള്‍ വരാതെ കാക്കുകയും ചെയ്യും.

ശുചിത്വം

ദിവസത്തില്‍ രണ്ടുതവണയെങ്കിലും കുളിക്കുക, പ്രത്യേകിച്ചും നിങ്ങള്‍ ഈര്‍പ്പമുള്ള പ്രദേശത്താണ് താമസിക്കുന്നതെങ്കില്‍. ഉയര്‍ന്ന ഈര്‍പ്പം അമിതമായ വിയര്‍പ്പിന് കാരണമാകുന്നു. ഇത് ഫംഗസ് അണുബാധ, ചൂട് തിണര്‍പ്പ്, വിയര്‍പ്പ് മൂലമുള്ള വീക്കം, ചൊറിച്ചില്‍ മുതലായവയ്ക്ക് കാരണമാകും.

മോയ്‌സ്ചറൈസിംഗ്, സണ്‍സ്‌ക്രീന്‍

ഈ കാര്യങ്ങള്‍ എല്ലാ സീസണിലും പ്രധാനമാണ്. എന്നാല്‍ മഴക്കാലത്ത് അവ കൂടുതല്‍ പ്രാധാന്യമര്‍ഹിക്കുന്നു, കാരണം അമിതമായ ഈര്‍പ്പം ചര്‍മ്മത്തെ കൂടുതല്‍ എണ്ണമയമുള്ളതാക്കും. ഇത് ചര്‍മ്മ അണുബാധകളിലേക്ക് നയിക്കുന്നു. സാലിസിലിക് ആസിഡ് അടിസ്ഥാനമാക്കിയുള്ള ക്ലെന്‍സര്‍ ഒരു ദിവസം 2 മുതല്‍ 3 തവണ വരെ ഉപയോഗിക്കുക. ദിവസത്തില്‍ മൂന്ന് തവണയില്‍ കൂടുതല്‍ മുഖം കഴുകുന്നത് ഒഴിവാക്കുക. ഇത് വരള്‍ച്ചയ്ക്കും ചിലപ്പോള്‍ അമിതമായ എണ്ണമയത്തിനും കാരണമാകും. ദിവസത്തില്‍ രണ്ടുതവണ നിങ്ങളുടെ ചര്‍മ്മത്തിന് അനുയോജ്യമായ മോയ്‌സ്ചറൈസര്‍ ഉപയോഗിക്കുക.