അമർനാഥ് യാത്ര നിർത്തിവെച്ചു; കഠിനമായ തണുപ്പിൽ ചർമ്മവും പാദങ്ങളും സുരക്ഷിതമാക്കാൻ ഈ മുൻകരുതലുകൾ മറക്കരുത്

കനത്ത മഴയെയും മോശം കാലാവസ്ഥയെയും തുടർന്ന് ജൂലൈ 19 മുതൽ അമർനാഥ് യാത്ര താൽക്കാലികമായി നിർത്തിവെച്ചു. തീർത്ഥാടകരുടെ സുരക്ഷ കണക്കിലെടുത്ത് ബാൽതാൽ, പഹൽഗാം പാതകളിലൂടെയുള്ള യാത്ര അധികൃതർ തടഞ്ഞിരിക്കുകയാണ്. ഉയർന്ന പ്രദേശങ്ങളിൽ മഴ തുടരുന്ന സാഹചര്യത്തിൽ, സ്ഥിതിഗതികൾ സൂക്ഷ്മമായി വിലയിരുത്തിയ ശേഷമേ യാത്ര പുനരാരംഭിക്കുന്ന കാര്യത്തിൽ തീരുമാനമെടുക്കൂ.

യാത്ര പുനരാരംഭിക്കുമ്പോൾ കഠിനമായ തണുപ്പിനെയും ഈർപ്പമുള്ള കാലാവസ്ഥയെയും നേരിടാൻ തീർത്ഥാടകർ തയ്യാറെടുക്കണം. കനത്ത തണുപ്പും മഴയും ചർമ്മം ഉരിയുന്നതിനും വേദനയേറിയ 'വിൻഡ് ബേണിനും' (windburn) കാരണമായേക്കാം. ശരിയായ മുൻകരുതലുകൾ എടുത്തില്ലെങ്കിൽ ഫംഗസ് ബാധയോ ഫ്രോസ്റ്റ്നിപ്പോ (frostnip) ഉണ്ടാകാൻ സാധ്യതയുണ്ട്. അതിനാൽ യാത്രയ്ക്കിടെ പാദങ്ങളുടെ സംരക്ഷണത്തിന് പ്രത്യേക ശ്രദ്ധ നൽകേണ്ടതുണ്ട്.

ചർമ്മ സംരക്ഷണത്തിന് വേണം പ്രത്യേക ശ്രദ്ധ

ആകാശം മേഘാവൃതമാണെങ്കിൽ പോലും ഉയർന്ന പ്രദേശങ്ങളിൽ അൾട്രാവയലറ്റ് രശ്മികൾ ചർമ്മത്തിന് ദോഷകരമായി ബാധിക്കാം. ഇത് തടയാൻ നല്ലൊരു സൺസ്ക്രീൻ (SPF) ഉപയോഗിക്കുന്നത് നന്നായിരിക്കും. കഠിനമായ കാറ്റിൽ നിന്ന് ചർമ്മത്തെ സംരക്ഷിക്കാൻ പെട്രോളിയം ജെല്ലിയോ ബാരിയർ ബാമുകളോ ഉപയോഗിക്കാം. തണുത്ത കാറ്റേറ്റ് ചുണ്ടുകൾ പൊട്ടാതിരിക്കാൻ ലിപ് ബാം കരുതുന്നതും ഗുണകരമാണ്.

പാദങ്ങളിൽ കുമിളകൾ വരാതിരിക്കാൻ ശ്രദ്ധിക്കാം

പാദങ്ങളിൽ എപ്പോഴും ഈർപ്പം തട്ടുന്നത് ഫംഗസ് ബാധയ്ക്കും കുമിളകൾ (blisters) വരാനും കാരണമാകും. മെഡിക്കൽ ടേപ്പും മോൾസ്കിനും (moleskin) അടങ്ങുന്ന 700 രൂപയിൽ താഴെ മാത്രം ചിലവ് വരുന്ന ഒരു കെയർ കിറ്റ് കയ്യിൽ കരുതുന്നത് നന്നായിരിക്കും. നനഞ്ഞ സോക്സുകൾ ഉടൻ മാറ്റാൻ ശ്രദ്ധിക്കുക, ഇതിനായി അധികം സോക്സുകൾ കരുതണം. പാദങ്ങൾ എപ്പോഴും ഉണങ്ങിയിരിക്കാൻ ആന്റിഫംഗൽ പൗഡർ ഉപയോഗിക്കുന്നത് 'ട്രെഞ്ച് ഫൂട്ട്' (trench foot) പോലുള്ള അവസ്ഥകൾ ഒഴിവാക്കാൻ സഹായിക്കും.

ചർമ്മം നീലനിറമാകുകയോ തരിപ്പ് അനുഭവപ്പെടുകയോ ചെയ്താൽ ഉടൻ വൈദ്യസഹായം തേടണം. ഇത് രക്തയോട്ടം കുറയുന്നതിന്റെയോ ഫ്രോസ്റ്റ്നിപ്പിന്റെയോ ലക്ഷണമാകാം. യാത്ര താൽക്കാലികമായി നിർത്തിവെച്ചിരിക്കുന്ന ഈ സമയത്ത് ശരീരം ചൂടോടെ നിലനിർത്താനും ധാരാളം വെള്ളം കുടിക്കാനും ശ്രദ്ധിക്കുക. കാലാവസ്ഥാ മാറ്റങ്ങൾക്കനുസരിച്ച് ആരോഗ്യകാര്യത്തിൽ മുൻകരുതൽ എടുക്കുന്നത് സുരക്ഷിതമായ യാത്രയ്ക്ക് അത്യാവശ്യമാണ്.