വെളിച്ചെണ്ണ, ഇങ്ങനെയും ചില ഉപയോഗങ്ങള്‍

മൗത്ത്‍വാഷ്

വെളിച്ചെണ്ണ ഒരു മൗത്ത് വാഷായി ഉപയോഗിക്കാമെന്ന് ആയുര്‍വേദത്തില്‍ നിര്‍ദ്ദേശിക്കുന്നുണ്ട്. വിപണിയില്‍ ലഭ്യമായ മൗത്ത് വാഷുകള്‍ ആല്‍ക്കഹോളും ഫ്ലുവോറൈഡ്സും നിറഞ്ഞതാണ്. ഇവ ആരോഗ്യത്തിന് ഏറെ ദോഷമുണ്ടാക്കും. വായില്‍ വെളിച്ചെണ്ണ കൊണ്ട് കുലുക്കുഴിഞ്ഞാല്‍ ദിവസം മുഴുവനും വായ ബാക്ടീരിയ മുക്തമായി സംരക്ഷിക്കാനാവും.

ഷേവിങ്ങ് ക്രീം

വെളിച്ചെണ്ണ ഷേവിങ്ങ് ക്രീം ആയി ഉപയോഗിക്കാമെന്ന് നിങ്ങള്‍ക്ക് അറിയാമോ? മുഖം നനച്ച ശേഷം വെളിച്ചെണ്ണ തേയ്ക്കുക. തുടര്‍ന്ന് ഷേവ് ചെയ്യാം. ഇത് രോമം നീക്കം ചെയ്യുക മാത്രമല്ല നീറ്റലുണ്ടാകുന്നത് തടയുകയും ചെയ്യും.

പ്രകൃതിദത്ത ഡിയോഡൊറന്‍റ്

വെളിച്ചെണ്ണ ഉപയോഗിച്ച് വിയര്‍പ്പ് നാറ്റം അകറ്റാനാവും. ഏറെ വിയര്‍പ്പുള്ള ശരീര ഭാഗങ്ങളില്‍ രാവിലെ വെളിച്ചെണ്ണ തേക്കുക. ഇത് വിയര്‍‌പ്പ് നാറ്റത്തില്‍ നിന്ന് ദിവസം മുഴുവന്‍ സംരക്ഷിക്കും. ആറ് സ്പൂണ്‍ വെളിച്ചെണ്ണ, കാല്‍കപ്പ് ബേക്കിംഗ് സോഡ, കാല്‍ കപ്പ് കൂവപ്പൊടി, ഏതാനും തുള്ളി പുതിന ഓയില്‍ എന്നിവ കൂട്ടിക്കലര്‍ത്തുക. ഇത് കുപ്പിയില്‍ ഭദ്രമായി അടച്ച് ഡിയോഡൊറന്‍റായി ഉപയോഗിക്കാം.

ബാത്ത്റൂം ക്ലീനര്‍

വെളിച്ചെണ്ണ ഉപയോഗിച്ച് ബാത്ത്റൂമിലെ ടാപ്പുകളും, ഷവറും വൃത്തിയാക്കാം. ഇത് സ്വഭാവികമായ തിളക്കം മടക്കി നല്കും.

ചര്‍മ്മത്തിലെ ചുളിവുകള്‍ കുറയ്ക്കുക

ഒരു വിറ്റാമിന്‍ ഇ ക്യാപ്സൂള്‍ വെളിച്ചെണ്ണയുമായി കലര്‍ത്തി ചര്‍മ്മത്തില്‍ ചുളിവുകളുള്ള ഭാഗത്ത് തേയ്ക്കുക. ഇത് തേച്ച് രാത്രി മുഴുവനും ഇരിക്കാന്‍ അനുവദിക്കുക. രാവിലെ വെള്ളം ഉപയോഗിച്ച് കഴുകുക. ഇത് ചര്‍മ്മത്തിന് മുറുക്കം നല്കുകയും ചുളിവുകള്‍ കുറയ്ക്കുകയും ചെയ്യും.

ഡയപ്പര്‍ ക്രീം

ഡയപ്പര്‍ ഏറെ നേരം ഉപയോഗിക്കുന്നത് കുഞ്ഞുങ്ങളുടെ ശരീരത്തില്‍ തിണര്‍പ്പുകളുണ്ടാക്കും. ഈ പ്രശ്നം ഉണ്ടാകാതിരിക്കാന്‍ അവരുടെ ചര്‍മ്മം വരളാന്‍ അനുവദിക്കരുത്. വെളിച്ചെണ്ണ ചര്‍മ്മത്തില്‍ പുരട്ടുന്നത് തിണര്‍‌പ്പുകളുണ്ടാകുന്നത് തടയും.