സാരിയുടുക്കൂ, സുന്ദരിയാകൂ

Beauty

oi-Saritha

By Veena

Published: Tuesday, October 4, 2011, 15:38 [IST]

സാരിയുടെ പാരമ്പര്യം അവകാശപ്പെടാവുന്നത് ഭാരതീയ സ്ത്രീകള്‍ക്കു മാത്രമാണ്. അഞ്ചരമുഴം നീളമുള്ള ഇത് സ്ത്രീകളുടുക്കുന്നത് വിദേശവനിതകള്‍ക്ക് അദ്ഭുതം തന്നെയാണ്. തമിഴ് ബ്രാഹ്മണസമുദായത്തില്‍പ്പെട്ട സ്ത്രീകള്‍ പരമ്പരാഗതമായി ഉടുക്കുന്ന സാരി ഒന്‍പതു മീറ്റര്‍ വരും. ഇവര്‍ സാരിയുടുക്കുന്ന രീതിയും വ്യത്യസ്തമാണ്.

കാണുന്ന പോലെ അത്ര എളുപ്പമല്ല സാരിയുടുക്കാന്‍. എളുപ്പം ഉടുക്കാന്‍ സഹായിക്കുന്ന ചില വഴികളിതാ.

സാരിക്കുളള ബ്ലൗസും പാവാടയും ആദ്യം ധരിക്കണം. ആവശ്യത്തിനുള്ള സേഫ്റ്റി പിന്നുകളും അടുത്തുതന്നെ സൂക്ഷിക്കണം.

സാരിയുടുക്കാന്‍ ആദ്യമായി സാരിയുടെ അറ്റം പാവാടക്കു മുകളില്‍ കുത്തുക. പിന്നീട് ഇടതു വശത്തു കൂടി സാരി പാവാടക്കു മുകളിലൂടെ ചുററിയെടുക്കണം. സാരിയുടെ നീളം അവരവരുടെ പൊക്കത്തിനനുസരിച്ച സൗകര്യമുളള രീതിയില്‍ എടുക്കുക. മുന്‍ഭാഗത്തായി ഞൊറിവുകളെടുക്കുക. ഇത് പൊക്കിളിനു സമീപത്തായി പാവാടയ്ക്കുള്ളിലേക്കു തിരുകി വയ്ക്കണം.

സാരിയുടെ ബാക്കിയുള്ള ഭാഗം അരക്കെട്ടിനു മുകളിലൂടെയെടുത്ത് മുന്താണിയെടുത്ത് ഇടതുതോളിലേക്കിട്ട് സേഫ്‌ററി പിന്‍ ഉപയോഗിച്ച് ബ്ലൗസോടു ചേര്‍ത്ത് കുത്തുക.

മുന്താണിയുടെ നീളം അവരവരുടെ സൗകര്യവും ഇഷ്ടവും പോലെ തീരുമാനിക്കാം. വണ്ണം കുറവു തോന്നാന്‍ വീതി കുറഞ്ഞ ഞൊറിവുകളെടുക്കുകയാണ് നല്ലത്. മുന്താണിയില്‍ ഞൊറിവുകളെടുക്കാതെ വെറുതേയിടുന്ന രീതിയും ചില സാരികള്‍ക്കു ചേരും. സാരിക്കു ചേരുന്ന ബ്ലൗസും പാവാടയും തെരഞ്ഞെടുക്കാന്‍ ശ്രദ്ധിക്കുക.