More Lifestyle Updates on: http://m.boldsky.com/malayalam/
വലിയവര്ക്കു മാത്രമല്ലാ, കുഞ്ഞുങ്ങള്ക്കും ചര്മപ്രശ്നങ്ങളുണ്ടാകാം. പ്രത്യേകിച്ച് നവജാത ശിശുക്കള്ക്ക്.
അമ്മയുടെ വയറ്റില് സുരക്ഷിതമായി കിടന്ന ഇവര് പുറത്തെത്തുമ്പോള് വരുന്ന വ്യത്യാസങ്ങളുമായി പൊരുത്തപ്പെടാന് സമയമെടുക്കും. ഇതുപോലെയാണ് ചര്മത്തിന്റെ കാര്യവും. മാത്രമല്ലാ, വളരെ മൃദുവായ ചര്മമായതു കൊണ്ട് പെട്ടെന്ന് പ്രശ്നങ്ങളുണ്ടാവുകയും ചെയ്യും.
നവജാത ശിശുക്കളുടെ മുഖത്ത് ചുവന്ന പാടുകളും കുരുക്കളും ഉണ്ടാകുന്നത് ഇത്തരത്തിലുള്ള ഒരു ചര്മപ്രശ്നമാണ്. വേണ്ട രീതിയില് ശ്രദ്ധിച്ചില്ലെങ്കില് അലര്ജി പോലുള്ള പ്രശ്നങ്ങളും സ്ഥിരമായുള്ള പാടുകളും കുഞ്ഞിനുണ്ടാകാന് സാധ്യതയുണ്ട്.
എക്സീമ എന്നൊരു ചര്മപ്രശ്നം ജനിച്ചയുടന് കുഞ്ഞുങ്ങള്ക്കുണ്ടാകും. കവിളുകള് വല്ലാതെ ചുവന്നു തടിച്ചിരിക്കുന്നതാണ് ഇതിന്റെ ലക്ഷണം. വിയര്പ്പു ഗ്രന്ഥികള് തടസപ്പെടുന്നതാണ് ഈ അവസ്ഥയ്ക്കു കാരണം. ഇത് സാധാരണ ഗതിയില് അല്പം കഴിഞ്ഞാല് മാറുകയും ചെയ്യും.
നവജാത ശിശുക്കള്ക്കും മുഖക്കുരുവുണ്ടാകാം. അമ്മയുടെ ഹോര്മോണ് ചര്മവുമായി സമ്പര്ക്കത്തില് വരുന്നതാണ് ഇതിന് കാരണം. ഇതും കാലക്രമേണ തനിയെ മാറുന്ന പ്രശ്നം തന്നെയാണ്.
ചില കുഞ്ഞുങ്ങളുടെ തലയോടിലും പുരികത്തിനടുത്തുമെല്ലാം മഞ്ഞ നിറത്തിലുള്ള ചര്മപാളികള് കാണാം. ക്രാഡില് ക്യാപ് എന്നാണ് ഇത് അറിയപ്പെടുന്നത്. വരണ്ട ചര്മമാണ് ഇതിന് ഒരു പരിധി വരെ കാരണം. മോയിസ്ചറൈസര് പുരട്ടുന്നതോ ഒലീവ് ഓയില് തേയ്ക്കുന്നതോ ഇതിനുള്ള പരിഹാരമാണ്. അല്ലെങ്കില് ഇത് തനിയെ മാറുകയും ചെയ്യും.
മഞ്ഞപ്പിത്തം, വരണ്ട ചര്മം, അലര്ജി എന്നിവയും കുഞ്ഞുങ്ങളുടെ ശരീരത്തില് അലര്ജിയുണ്ടാക്കും. അമ്മ നട്സ്, സിട്രസ് അടങ്ങിയ പഴവര്ഗങ്ങള് മുതലായവ കഴിച്ചാല് ചിലപ്പോള് കുഞ്ഞുങ്ങളുടെ ചര്മത്തില് അലര്ജിയുണ്ടാകാന് സാധ്യതയുണ്ട്.
ഇത്തരം ചര്മപ്രശ്നങ്ങള്ക്കൊപ്പം ഛര്ദി, പനി തുടങ്ങിയ അസ്വസ്ഥതകള് കൂടിയുണ്ടെങ്കില് കുഞ്ഞിനെ ഡോക്ടറെ കാണിക്കേണ്ടത് അത്യാവശ്യമാണ്. ഇത്തരം ചര്മപ്രശ്നങ്ങള് ചിലപ്പോള് രോഗങ്ങളുടെ ലക്ഷണങ്ങള് കൂടിയാകാം.
