നിങ്ങളുടെ കണ്ണുകള്‍ കുഴിഞ്ഞതാണോ?

കണ്ണിലേക്കു നോക്കിയാല്‍ ഒരാളുടെ മനസറിയാമെന്നു പറയും. സന്തോഷവും സങ്കടവും ദേഷ്യവും സ്‌നേഹവുമെല്ലാം മനസില്‍ തെളിയുമ്പോള്‍ ഇത് കണ്ണിലും പ്രതിഫലിക്കും. കവിഭാവനയില്‍ കണ്ണുകള്‍ക്ക് പ്രധാന സ്ഥാനം കിട്ടാനും ഒരു കാരണമിതാണ്.

മനസു മാത്രമല്ല, ആരോഗ്യസ്ഥിതിയെ വിലയിരുത്താനും കണ്ണിനു കഴിയും.

ചിലരുടേത് കുഴിഞ്ഞ കണ്ണുകള്‍, ഉള്ളിലേക്കുപോയ കണ്ണുകള്‍ എന്നൊക്കെ വിശേഷിപ്പിക്കാനാവും. ചിലപ്പോഴിത് പ്രകൃത്യാ ഉള്ളതായിരിക്കും. എന്നാല്‍ ചിലപ്പോള്‍ ഇത്തരം കണ്ണുകള്‍ക്കു പുറകില്‍ ചില ആരോഗ്യകാരണങ്ങളുണ്ടാകും, ഇതല്ലാത്ത കാരണങ്ങളും കാണും.

കുഴിഞ്ഞ കണ്ണുകള്‍ക്കുള്ള ഒരു കാരണം ഉറക്കക്കുറവാണ്. ഉറക്കക്കുറവ് ഏറ്റവും കൂടുതല്‍ പ്രതിഫലിയ്ക്കുക നിങ്ങളുടെ കണ്ണിലാണ്. കണ്ണുകള്‍ക്കുപരിയായി ഇതു വരുത്തു വയ്ക്കുന്ന ആരോഗ്യപ്രശ്‌നങ്ങളും ധാരാളമുണ്ട്.

ശരീരഭാരം പെട്ടെന്നു കുറയുമ്പോഴും കണ്ണുകള്‍ കുഴിഞ്ഞുപോകും. പ്രത്യേകിച്ച് മുഖത്തെ വണ്ണം കുറയുമ്പോള്‍. ഇത് കണ്ണിന്റെ ആരോഗ്യത്തെയും ഭംഗിയേയും ബാധിയ്ക്കുകയും ചെയ്യും.

ശരീരത്തിനു വേണ്ട രീതിയില്‍ വെള്ളം ലഭിയ്ക്കാതെ വരുമ്പോഴും ക്ണ്ണുകള്‍ കുഴിയിലാകും. ഇലക്ട്രോളൈറ്റുകളുടെ കുറവാണ് ഇതിനു കാരണം. വെള്ളത്തില്‍ പഞ്ചസാരയും അല്‍പം ഉപ്പും ചേര്‍ത്തു കുടിയ്ക്കുന്നത് ഇതിനുള്ള പ്രതിവിധിയാണ്.

മലേറിയ പോലുള്ള രോഗങ്ങള്‍ വന്നു മാറിയ ശേഷം ഇത്തരത്തില്‍ കണ്ണുകള്‍ കാണാം. ഇത് ക്ഷീണവും പോഷണക്കുറവുമാണ് കാണിയ്ക്കുന്നത്.

വൈറ്റമിന്‍ കുറവും ഇത്തരത്തിലുള്ളൊരു പ്രശ്‌നം കണ്ണുകള്‍ക്കുണ്ടാക്കും. പ്ര്േത്യകിച്ച് വൈറ്റമിന്‍ കെ, സി എന്നിവയുടെ കുറവ്. വൈറ്റമിനുകളുടെ മാത്രമല്ല, അയേണ്‍ കുറവും കണ്ണുകള്‍ കുഴിയാന്‍ ഇടയാക്കും.

വളരെ ചുരുക്കമായി ഇത്തരം കണ്ണുകള്‍ക്കു പുറകില്‍ പാരമ്പര്യവുമുണ്ടാകും.